ഒരു ബിസിനസ്സിന്റെ വളർച്ചയെ തല്ലിക്കെടുത്തുന്ന ഏറ്റവും വലിയ തെറ്റ് എന്താണെന്നറിയാമോ? വാങ്ങാൻ ഉറപ്പിച്ചു നിൽക്കുന്ന ഒരു ഹോട്ട് കസ്റ്റമറെ സ്വന്തം അശ്രദ്ധ കൊണ്ട് നഷ്ടപ്പെടുത്തുക എന്നത്!

കാരണം, ഒരു ഹോട്ട് കസ്റ്റമർ വെറുമൊരു അന്വേഷകനല്ല. അയാൾ മനസ്സുകൊണ്ട് നിങ്ങളുടെ ഉൽപ്പന്നം വാങ്ങിപ്പറ്റി കഴിഞ്ഞ ആളാണ്.

• അയാൾ നിങ്ങളുടെ കടയിലേക്ക് കയറി വന്നത് ഒരു പ്രത്യേക ആവശ്യമുള്ളതുകൊണ്ടാണ്.
• അയാൾ ഫോൺ എടുത്തു വിളിച്ചത് വലിയൊരു പ്രതീക്ഷയോടെയാണ്.
• അയാൾ വാട്സ്ആപ്പിൽ മെസ്സേജ് അയച്ചത് നിങ്ങളുടെ മറുപടി കാത്താണ്.

ആ പ്രതീക്ഷ തകർക്കുന്ന നിമിഷം, അയാൾ തൊട്ടടുത്ത കടയിലേക്ക് നടന്നു പോകും. ഇന്നത്തെ കാലത്ത് ഒരു കസ്റ്റമർക്കും നിങ്ങളെ മാത്രം കാത്തിരിക്കേണ്ട കാര്യവുമില്ല. മൊബൈൽ ഫോൺ തുറന്നാൽ നിങ്ങളുടെ കോമ്പറ്റിറ്റർമാർ അയാളെ സ്വീകരിക്കാൻ റെഡിയായി നിൽപ്പുണ്ട്. അതുകൊണ്ട് ഒരു ഹോട്ട് കസ്റ്റമറെ നഷ്ടപ്പെടുത്തുക എന്നാൽ ഒരു സെയിൽസ് നഷ്ടപ്പെടുത്തുക മാത്രമല്ല; ഭാവിയിലെ വലിയൊരു അവസരത്തെ തല്ലിക്കെടുത്തുക കൂടിയാണ്.

ഒരേ തെരുവിലെ രണ്ട് മൊബൈൽ ഷോപ്പുകൾ

ഒരു വലിയ നഗരത്തിലെ ഒരേ തെരുവിൽ രണ്ട് മൊബൈൽ ഷോപ്പുകൾ ഉണ്ടായിരുന്നു.

പുതിയ ഫോൺ വാങ്ങാൻ ഉറപ്പിച്ച ഒരു യുവാവ് ആദ്യത്തെ ഷോപ്പിൽ കയറി. അവിടെയുള്ള സെയിൽസ്മാൻ ഫോണിൽ സംസാരിച്ചുകൊണ്ട് തിരക്കിലായിരുന്നു. 'അഞ്ച് മിനിറ്റ് അവിടെ ഇരിക്കൂ സാറേ, ഇപ്പോൾ വരാം' എന്ന് പറഞ്ഞ് അയാൾ യുവാവിനെ ഇരുത്തി. അഞ്ച് മിനിറ്റ്, പത്ത് മിനിറ്റായി മാറി... ആരും തിരിഞ്ഞു നോക്കിയില്ല. യുവാവ് കടയിൽ നിന്നിറങ്ങി തൊട്ടടുത്ത ഷോപ്പിലേക്ക് പോയി.

രണ്ടാമത്തെ കടയിലെ ജീവനക്കാരൻ അയാളെ ചിരിയോടെ സ്വീകരിച്ചു: 'സാർ, ഏത് മോഡലാണ് നോക്കുന്നത്?' യുവാവ് ആവശ്യം പറഞ്ഞു, ജീവനക്കാരൻ മൂന്ന് ബെസ്റ്റ് മോഡലുകൾ കാണിച്ചു. പതിനഞ്ച് മിനിറ്റിനുള്ളിൽ ബില്ലടിച്ച് ഫോൺ കൈയിൽ കൊടുത്തു!

വ്യത്യാസം വിലയിലോ മൊബൈലിന്റെ ക്വാളിറ്റിയിലോ ആയിരുന്നില്ല; പ്രതികരിച്ച വേഗതയിലായിരുന്നു. ആദ്യത്തെ കടക്കാരൻ അനാവശ്യമായി കാത്തിരിപ്പിച്ച് കളഞ്ഞത് കൈയിലിരുന്ന ഒരു ഹോട്ട് കസ്റ്റമറെയാണ്!

മികച്ച ഉൽപ്പന്നം മാത്രം പോരാ; ബിസിനസ് വിജയത്തിന് മാർക്കറ്റിംഗ് അനിവാര്യം... Read More

വേഗതയാണ് നിങ്ങളുടെ ഏറ്റവും വലിയ ആയുധം!

ഇന്നത്തെ കസ്റ്റമർക്ക് ക്ഷമ വളരെ കുറവാണ്. അതിൽ അവരെ കുറ്റം പറഞ്ഞിട്ടും കാര്യവില്ല; കാരണം നമ്മൾ ജീവിക്കുന്ന ലോകം അത്രയ്ക്കും വേഗത്തിലാണ് ഓടുന്നത്. ഭക്ഷണം 10 മിനിറ്റിൽ വീട്ടിലെത്തുന്നു, ഫോണിലെ ഒരു ക്ലിക്കിൽ പണം കൈമാറാം!

അങ്ങനെയൊരു ലോകത്തിരുന്ന് നിങ്ങളുടെ ഒരു മെസ്സേജിനോ ഫോൺ കോളിനോ വേണ്ടി ഒരു കസ്റ്റമർ മണിക്കൂറുകളോ ദിവസങ്ങളോ കാത്തിരിക്കുമെന്ന് കരുതുന്നത് പച്ചക്കള്ളമാണ്.

കാർഷിക ഉപകരണ വ്യാപാരിയുടെ പാഠം:

മഴക്കാലം തുടങ്ങുന്നതിന് തൊട്ടുമുൻപ് ഒരു കർഷകൻ കാർഷിക ഉപകരണം അന്വേഷിച്ച് മൂന്ന് കടകളിലേക്ക് വിളിച്ചു. ആദ്യത്തെ കടക്കാർ ഫോൺ എടുത്തില്ല. രണ്ടാമത്തെ കടക്കാർ 'പിന്നീട് വിളിക്കാം' എന്ന് പറഞ്ഞ് വച്ചു. എന്നാൽ മൂന്നാമത്തെ കടക്കാരൻ ഉടൻ തന്നെ വിവരങ്ങൾ കൈമാറി, ഉൽപ്പന്നത്തിന്റെ വീഡിയോ വാട്സ്ആപ്പിൽ അയച്ചു, വീട്ടിലെത്തിക്കാമെന്ന് ഉറപ്പും നൽകി! പറയേണ്ടതില്ലല്ലോ, ഓർഡർ മൂന്നാമത്തെയാൾക്ക് കിട്ടി. അത് അവർ ഏറ്റവും മികച്ച ഉൽപ്പന്നം നൽകിയതുകൊണ്ടല്ല, കൃത്യസമയത്ത് പ്രതികരിച്ചതുകൊണ്ടാണ്!

ബിസിനസ് വളരണമെങ്കിൽ അറിയണം: മാർക്കറ്റിംഗിന്റെ 3 പ്രധാന തൂണുകൾ... Read More

ഒരു ചെറിയ അശ്രദ്ധ... ഒരു വലിയ നഷ്ടം!

ഒരു ഫർണിച്ചർ കടയിൽ ദമ്പതികൾ വന്നു, ഒരു ഡൈനിംഗ് ടേബിൾ കണ്ടുപിടിച്ചു, വില ചോദിച്ചു. 'ഇത് വീട്ടിൽ എത്തിച്ചു തരുമോ?' എന്ന ചോദ്യത്തിന് കടയുടമ നൽകിയ മറുപടി: 'നിങ്ങൾ നാളെ ഒന്നുകൂടി വിളിച്ച് ചോദിക്കൂ, അപ്പോൾ പറയാം.'

അവർ പോയി, പിന്നീട് വിളിച്ചതുമില്ല. കാരണം അവർ ഇറങ്ങിപ്പോയത് മറ്റൊരു ഫർണിച്ചർ കടയിലേക്കായിരുന്നു! അവിടെ കാര്യങ്ങൾ അപ്പോൾ തന്നെ തീർപ്പാക്കി കൊടുക്കാൻ ആളുണ്ടായിരുന്നു.

ചിലപ്പോൾ ബിസിനസ്സിലെ വലിയ പരാജയങ്ങൾക്ക് കാരണം വലിയ തെറ്റുകളാകില്ല; 'നാളെ വിളിക്കൂ' എന്ന മട്ടിലുള്ള കൊച്ചു കൊച്ചു അശ്രദ്ധകളായിരിക്കും!

'ഞാൻ ആലോചിച്ചിട്ട് പറയാം' എന്ന് പറഞ്ഞാൽ പിന്നെന്ത് ചെയ്യണം?

ഒരു കസ്റ്റമർ സാധനങ്ങൾ കണ്ട ശേഷം 'ഞാൻ വൈകുന്നേരം വിളിക്കാം' എന്ന് പറഞ്ഞ് പോയാൽ, 90% ബിസിനസ്സുകാരും പിന്നെ മിണ്ടാതിരിക്കും. എന്നാൽ മിടുക്കനായ സംരംഭകൻ അടുത്ത ദിവസം മാന്യമായി അയാളെ വീണ്ടും ബന്ധപ്പെടും (Follow-up):

'സാർ, ഇന്നലെ ചോദിച്ച ആ ഡൈനിംഗ് ടേബിളിന്റെ കാര്യത്തിൽ എന്തെങ്കിലും സഹായം വേണമെന്നുണ്ടോ? ഇന്നുക്കൂടി നല്ലൊരു ഓഫറുണ്ട്.'

ഇത് ശല്യം ചെയ്യലല്ല, മറിച്ച് ഉത്തരവാദിത്തമാണ്. പല ബിസിനസ്സുകളിലും ആദ്യത്തെ സംഭാഷണത്തിലല്ല കച്ചവടം നടക്കുന്നത്; രണ്ടാമത്തെയോ മൂന്നാമത്തെയോ ഇത്തരം പിന്തുടരലുകളിലൂടെയാണ് (Follow-up) ഓർഡറുകൾ ഉറപ്പാകുന്നത്!

ആരാണ് നിങ്ങളുടെ യഥാർത്ഥ കസ്റ്റമർ?... Read More

ഹോട്ട് കസ്റ്റമറെ നഷ്ടപ്പെടുത്തുന്ന 5 പ്രധാന പിഴവുകൾ:

1. വൈകിയുള്ള പ്രതികരണം: മെസ്സേജിനോ കോളിനോ സമയത്ത് മറുപടി നൽകാതിരിക്കൽ.
2. വ്യക്തതയില്ലാത്ത മറുപടികൾ: 'നോക്കാം', 'അറിയില്ല', 'പിന്നീട് പറയാം' തുടങ്ങിയ വാചകങ്ങൾ വിശ്വാസം തകർക്കും.
3. അനാവശ്യ പ്രസംഗം: ഹോട്ട് കസ്റ്റമർ വാങ്ങാൻ ഉറപ്പിച്ചയാളാണ്; അയാളോട് കൂടുതൽ ക്ലാസ് എടുക്കാതെ ബില്ലടിച്ച് കാര്യങ്ങൾ എളുപ്പമാക്കുക.
4. വാക്ക് പാലിക്കാതിരിക്കൽ: 'ഒരു മണിക്കൂറിനുള്ളിൽ തിരിച്ചു വിളിക്കാം' എന്ന് പറഞ്ഞ് വിളിക്കാതിരിക്കുക, അല്ലെങ്കിൽ ഡെലിവറി തീയതി തെറ്റിക്കുക.
5. വിൽപ്പനയ്ക്ക് ശേഷം മിണ്ടാതിരിക്കൽ: സാധനം വിറ്റുകഴിഞ്ഞാൽ ബന്ധം അവസാനിപ്പിക്കരുത്. വാങ്ങി രണ്ട് ദിവസം കഴിഞ്ഞ് വിളിച്ചു സുഖവിവരങ്ങളും ഉൽപ്പന്നത്തിന്റെ സംതൃപ്തിയും അന്വേഷിക്കുക.

ആത്മാർത്ഥമായ കരുതൽ നൽകിയ ആശുപത്രി

ചികിത്സ കഴിഞ്ഞ് വീട്ടിലെത്തിയ രോഗിയെ അടുത്ത ദിവസം ആശുപത്രിയിൽ നിന്നും വിളിച്ച് അന്വേഷിച്ചു: 'സാറിന് ഇപ്പോൾ വേദന കുറവുണ്ടോ? മരുന്നൊക്കെ കൃത്യമായി കഴിക്കുന്നുണ്ടോ?' രോഗിക്ക് അത്ഭുതവും അളവറ്റ സന്തോഷവും തോന്നി. പിന്നീട് ആ കുടുംബത്തിൽ ആർക്ക് അസുഖം വന്നാലും അവർ പോയത് ആ ആശുപത്രിയിലേക്കായിരുന്നു!

ബിസിനസ്സിലും ഇതുതന്നെയാണ് സംഭവിക്കുന്നത്. നിങ്ങൾ പ്രൊഡക്റ്റ് മാത്രം വിൽക്കാതെ, ചെറിയൊരു കരുതൽ കൂടി വിൽക്കുമ്പോൾ കസ്റ്റമർ നിങ്ങളുടെ സ്ഥിരം ആളായി മാറും.

ദിവസാവസാനം സ്വയം ചോദിക്കേണ്ട 5 കാര്യങ്ങൾ:

1. ഇന്ന് എത്ര ഹോട്ട് കസ്റ്റമർമാർ എന്നെ സമീപിച്ചു?
2. അവരിൽ എത്രപേർക്ക് ഞാൻ ഉടനടി കൃത്യമായ മറുപടി നൽകി?
3. ആരൈയങ്കിലും അനാവശ്യമായി കാത്തിരുത്തിയോ?
4. മുൻപ് വന്ന ആരൈയെങ്കിലും തിരിച്ചുവിളിച്ച് ഫോളോ-അപ്പ് ചെയ്തോ?
5. എന്റെ അശ്രദ്ധ കൊണ്ട് ഇന്ന് ഏതെങ്കിലും ഒരു കസ്റ്റമർ നഷ്ടപ്പെട്ടോ?

'ഒരു ഹോട്ട് കസ്റ്റമർ നിങ്ങളുടെ വാതിൽക്കൽ മുട്ടുമ്പോൾ, അത് വെറുമൊരു കച്ചവടമല്ല; നിങ്ങളുടെ ബിസിനസ്സിന്റെ വളർച്ചയാണ് മുന്നിൽ വന്നു നിൽക്കുന്നത്. ആ വാതിൽ തുറക്കാൻ ഒട്ടും വൈകിക്കരുത്!'

എല്ലാ കസ്റ്റമേഴ്സും ഒരുപോലെയല്ല: ഹോട്ട്, വാം, കോൾഡ് കസ്റ്റമേഴ്സിനെ തിരിച്ചറിയാം... Read More

ചെറുകിട സംരംഭകർക്കും സംരംഭം ആരംഭിക്കാൻ ഉദ്ദേശിക്കുന്നവർക്കുമുള്ള ടിപ്പുകൾ നിരന്തരം ലഭിക്കുവാൻ വേണ്ടി ഞങ്ങളെ ഫോളോ ചെയ്യുക.