ആലപ്പുഴ: സംസ്ഥാന ടൂറിസം വകുപ്പ് സംഘടിപ്പിക്കുന്ന ചുണ്ടൻ വള്ളങ്ങളുടെ ഐപിഎൽ മാതൃകയിലുള്ള ലീഗ് മത്സരമായ ചാമ്പ്യൻസ് ബോട്ട് ലീഗ് അഞ്ചാം സീസണിലെ കുട്ടനാട് പുളിങ്കുന്നിൽ നടന്ന മത്സരത്തിൽ വീയപുരം വില്ലേജ് ബോട്ട് ക്ലബ്(പ്രൈഡ്ചേസേഴ്സ് ) (2:56:383 മിനിറ്റ്) തുഴഞ്ഞ വീയപുരം ചുണ്ടൻ ജേതാക്കളായി. കൈനകരി, താഴത്തങ്ങാടി, പിറവം, കോട്ടപ്പുറം എന്നിവിടങ്ങിലെ അജയ്യ തേരോട്ടം വീയപുരം ചുണ്ടൻ പുളിങ്കുന്നിലും നിലനിറുത്തി.

പള്ളാത്തുരുത്തി ബോട്ട് ക്ലബ് തുഴഞ്ഞ മേൽപ്പാടം ചുണ്ടൻ(ട്രോപ്പിക്കൽ ടൈറ്റൻസ്)(2:56:443 മിനിറ്റ് ) രണ്ടാം സ്ഥാനത്തും പുന്നമട ബോട്ട് ക്ലബ് തുഴഞ്ഞ നടുഭാഗം ചുണ്ടൻ (റിപ്പിൾ ബ്രേക്കേഴ്സ്) (2:57:819 മിനിറ്റ്) മൂന്നാമതും ഫിനിഷ് ചെയ്തു.

ആദ്യ മൂന്ന് മത്സരത്തിൽ പതിഞ്ഞു കളിച്ച് പകുതി കഴിയുമ്പോൾ മുന്നിട്ടു കയറുന്ന തന്ത്രം കോട്ടപ്പുറത്ത് തന്നെ വീയപുരം മാറ്റിക്കളിച്ചിരുന്നു. വള്ളം കളിയുടെ ഈറ്റില്ലമായ കുട്ടനാട്ടിലെ പരിചിതമായ നെട്ടായത്തിൽ തുടക്കം മുതൽ തന്നെ ലീഡുമായാണ് വീയപുരം കുതിച്ചത്. കഴിഞ്ഞ നാല് തവണയും സിബിഎൽ ചാമ്പ്യനായിരുന്ന പള്ളാത്തുരുത്തി ബോട്ട് ക്ലബിന്റെ പരിചയസമ്പത്ത് പൂർണമായും പുറത്തെടുത്തത് പകുതിയ്ക്ക് ശേഷമായിരുന്നു. അനായാസമെന്ന് തോന്നിയ വിജയത്തിൽ നിന്ന് ഫിനിഷ് ചെയ്യുമ്പോൾ വീയപുരം വിയർത്ത് കുളിച്ചു. ചാട്ടുളി പോലെ പാഞ്ഞ് കയറി വന്ന പിബിസി തുഴഞ്ഞ മേൽപ്പാടം വെറും 60 മൈക്രോ സെക്കന്റുകൾക്ക് പിന്നിലായി.

നടുവിലെ പറമ്പൻ (ഇമ്മാനുവേൽ ബോട്ട് ക്ലബ്-ചുണ്ടൻ വാരിയേഴ്സ്) നാല്, നിരണം ചുണ്ടൻ(നിരണം ബോട്ട് ക്ലബ്-സൂപ്പർ ഓർസ്) അഞ്ച്, കാരിച്ചാൽ (കാരിച്ചാൽ ചുണ്ടൻ ബോട്ട് ക്ലബ്-കെസിബിസി-തണ്ടർ ഓർസ്) ആറ്, പായിപ്പാടൻ (കുമരകം ടൗൺ ബോട്ട് ക്ലബ്-ബാക്ക് വാട്ടേഴ്സ് വാരിയേഴ്സ്) ഏഴ്, ചെറുതന (തെക്കേക്കര ബോട്ട് ക്ലബ്-ബാക്ക് വാട്ടർ ഷാർക്ക്സ്)എട്ട്, ചമ്പക്കുളം (ചങ്ങനാശേരി ബോട്ട് ക്ലബ്-വേവ് ഗ്ലൈഡേഴ്സ്) ഒമ്പത് എന്നിങ്ങനെയാണ് പുളിങ്കുന്നിലെ ഫിനിഷ് നില.

എംപി കൊടിക്കുന്നിൽ സുരേഷ് പുളിങ്കുന്നിലെ മത്സരങ്ങൾ ഉദ്ഘാടനം ചെയ്തു. തോമസ് കെ തോമസ് എംഎൽഎ അധ്യക്ഷത വഹിച്ചു. പുളിങ്കുന്ന് ഗ്രാമപഞ്ചായത്ത് പ്രസിഡന്റ് നീനു ജോസഫ്, വൈസ് പ്രസിഡന്റ് ജോഷി കൊല്ലാറ, ടൂറിസം വകുപ്പ് ജോയിന്റ് ഡയറക്ടറും സിബിഎൽ നോഡൽ ഓഫീസറുമായ അഭിലാഷ് കുമാർ ടി ജി, ഡെ. ഡയറക്ടറും സിബിഎൽ സംസ്ഥാന കോ-ഓർഡിനേറ്ററുമായ ഡോ. അൻസാർ കെ എ എസ്, ടൂറിസം വകുപ്പ് ആലപ്പുഴ ഡെപ്യൂട്ടി ഡയറക്ടർ പ്രഭാത് ഡി വി, സിബിഎൽ ടെക്നിക്കൽ കമ്മിറ്റിയംഗങ്ങൾ, ത്രിതല പഞ്ചായത്ത് പ്രതിനിധികൾ തുടങ്ങിയവർ പങ്കെടുത്തു.

ചാമ്പ്യൻഷിപ്പിൽ ഒന്നാം സ്ഥാനം കരസ്ഥമാക്കുന്ന ക്ലബിന് 25 ലക്ഷവും രണ്ടാം സ്ഥാനം നേടുന്നവർക്ക് 15 ലക്ഷവും മൂന്നാം സ്ഥാനത്തെത്തുന്ന ക്ലബിന് 10 ലക്ഷം രൂപയും സമ്മാനമായി ലഭിക്കും.

ഓരോ മത്സരവേദികളിലും വിജയികളാകുന്നവരിൽ ഒന്നാം സ്ഥാനക്കാർക്ക് അഞ്ച് ലക്ഷം രൂപയും രണ്ടാം സ്ഥാനക്കാർക്ക് മൂന്ന് ലക്ഷവും മൂന്നാം സ്ഥാനക്കാർക്ക് ഒരു ലക്ഷം രൂപയും ലഭിക്കും. ബോണസായി ഓരോ ടീമിനും നാല് ലക്ഷം രൂപ വീതവും നീക്കിവച്ചിട്ടുണ്ട്.