കുട്ടിക്ക് ഒരു ഇലക്ട്രിക് വീല്‍ചെയറും ഇന്‍ഡിഗോ സിഇഒ റോണോജോയ് ദത്ത വാഗ്ദാനം ചെയ്തു

മെയ് 7 ന് റാഞ്ചി വിമാനത്താവളത്തില്‍ ഭിന്നശേഷിയുള്ള കുട്ടിക്ക് ബോര്‍ഡിംഗ് നിഷേധിച്ചതിന് ഇന്‍ഡിഗോ എയര്‍ലൈന്‍സിന് 5 ലക്ഷം രൂപ പിഴ ചുമത്തിയതായി മെയ് 28 ശനിയാഴ്ച ഡയറക്ടറേറ്റ് ജനറല്‍ ഓഫ് സിവില്‍ ഏവിയേഷന്‍ (ഡിജിസിഎ) അറിയിച്ചു. കുട്ടിയെ കയറ്റുന്നതില്‍ നിന്ന് വിലക്കിയതിനാല്‍, ഒപ്പമുണ്ടായിരുന്ന മാതാപിതാക്കളും വിമാനത്തില്‍ കയറേണ്ടതില്ലെന്ന് തീരുമാനിച്ചു.സംഭവം പുറത്തറിഞ്ഞതിന് പിന്നാലെ വ്യാപക പ്രതിഷേധമുയര്‍ന്ന സംഭവത്തെക്കുറിച്ച് അന്വേഷിക്കാന്‍ ഡിജിസിഎ മെയ് 9ന് മൂന്നംഗ സംഘത്തിന് രൂപം നല്‍കിയിരുന്നു. 'ഇന്‍ഡിഗോ ഗ്രൗണ്ട് സ്റ്റാഫ് ഭിന്ന ശേഷിയുള്ള കുട്ടികളെ കൈകാര്യം ചെയ്തതില്‍ പോരായ്മയുള്ളതായി നിരീക്ഷിച്ചു.

'പ്രത്യേക സാഹചര്യങ്ങള്‍ അസാധാരണമായ പ്രതികരണങ്ങള്‍ അര്‍ഹിക്കുന്നു, പക്ഷേ എയര്‍ലൈനിന്റെ ജീവനക്കാര്‍ അവസരത്തിനൊത്ത് ഉയരുന്നതില്‍ പരാജയപ്പെട്ടു, ഈ സംഭവത്തില്‍ ഇന്‍ഡിഗോ സിവില്‍ ഏവിയേഷന്‍ നിയമങ്ങള്‍  പാലിക്കുന്നതില്‍ വീഴ്ച വരുത്തി. ഇത് കണക്കിലെടുത്ത്, ബന്ധപ്പെട്ട എയര്‍ക്രാഫ്റ്റ് നിയമങ്ങളിലെ വ്യവസ്ഥകള്‍ പ്രകാരം ഇന്‍ഡിഗോയ്ക്ക് അഞ്ച് ലക്ഷം രൂപ പിഴ ചുമത്തിയതായി ഡിജിസിഎ അറിയിച്ചു.

ഭാവിയില്‍ സ്വന്തം നിയന്ത്രണങ്ങള്‍ പുനരവലോകനം ചെയ്യുമെന്നും ഡിജിസിഎ പറഞ്ഞു, ഇതുപോലുള്ള സാഹചര്യങ്ങള്‍ വരുമ്പോള്‍ അവരുടെ സ്റ്റാന്‍ഡേര്‍ഡ് ഓപ്പറേറ്റിംഗ് നടപടിക്രമങ്ങളും (എസ്ഒപി) പരിശീലന പ്രക്രിയകളും പരിഷ്‌കരിക്കാനും ''കൂടുതല്‍ മാനുഷികമായ ഇടപെടലുകള്‍ കൊണ്ടുവരാനും'' എയര്‍ലൈനുകളോട് അഭ്യര്‍ത്ഥിച്ചു.

ഗള്‍ഫ് എയര്‍ലൈനുകള്‍ ലഗേജ് നിയമം കടുപ്പിക്കുന്നു... Read More

മെയ് 7 ന് നടന്ന സംഭവത്തിന്റെ  സഹയാത്രികയായ മനീഷ ഗുപ്ത ഫേസ്ബുക്കില്‍ ഷെയര്‍ ചെയ്ത പോസ്റ്റ് വൈറലായിരുന്നു. കുട്ടി ആദ്യം വിഷമത്തിലായിരുന്നുവെന്നും അവനെ എങ്ങനെ സമാധാനിപ്പിക്കണമെന്ന് മാതാപിതാക്കള്‍ക്ക് അറിയാമെന്നും അത് ചെയ്തുവെന്നും അവര്‍ പറഞ്ഞു.പോസ്റ്റ് പ്രകാരം കുട്ടിയെ യാത്ര ചെയ്യാന്‍ അനുവദിക്കാത്ത എയര്‍ലൈന്‍സിന്റെ തീരുമാനം മറ്റ് യാത്രക്കാര്‍ എതിര്‍ത്തു, കൂടാതെ വിമാനത്തില്‍ യാത്ര ചെയ്തിരുന്ന ഡോക്ടര്‍മാരുടെ ഒരു പ്രതിനിധി സംഘം ആരോഗ്യപരമായ എന്തെങ്കിലും സംഭവിക്കുകയാണെങ്കില്‍ കുട്ടിക്കും കുടുംബത്തിന് പിന്തുണ വാഗ്ദാനം ചെയ്തിരുന്നു.

പിന്നീട് സംഭവത്തെക്കുറിച്ച് അന്വേഷിക്കാന്‍ ഡിജിസിഎ മൂന്നംഗ സമിതിക്ക് രൂപം നല്‍കി.റാഞ്ചി വിമാനത്താവളത്തില്‍ നടന്ന സംഭവത്തില്‍ ഇന്‍ഡിഗോ സിഇഒ റോണോജോയ് ദത്ത ഖേദം പ്രകടിപ്പിച്ചു. വികലാംഗനായ ഒരു വ്യക്തിയെ പരിചരിക്കുന്നതില്‍ മാതാപിതാക്കളുടെ ആജീവനാന്ത സമര്‍പ്പണത്തിനുള്ള 'ഞങ്ങളുടെ അഭിനന്ദനത്തിന്റെ ചെറിയ അടയാളമായി' ആണ്‍കുട്ടിക്ക് ഒരു ഇലക്ട്രിക് വീല്‍ചെയറും ദത്ത വാഗ്ദാനം ചെയ്തു.'ഞങ്ങളുടെ ഉപഭോക്താക്കള്‍ക്ക് മര്യാദയുള്ളതും അനുകമ്പയുള്ളതുമായ സേവനം നല്‍കുന്നത് ഞങ്ങള്‍ക്ക് പരമപ്രധാനമാണ്, സുരക്ഷാ മാര്‍ഗ്ഗനിര്‍ദ്ദേശങ്ങള്‍ക്ക് അനുസൃതമായി, ഈ പ്രെശ്‌നം വിമാനത്തിനുള്ളില്‍ മുന്നോട്ട് കൊണ്ടുപോകുമോ എന്ന ബുദ്ധിമുട്ടുള്ള തീരുമാനമെടുക്കാന്‍ എയര്‍പോര്‍ട്ട് ജീവനക്കാര്‍ നിര്‍ബന്ധിതരായി,' അദ്ദേഹം പറഞ്ഞു. ''ശാരീരിക വൈകല്യമുള്ളവരുടെ പരിചരണത്തിനായി ജീവിതം സമര്‍പ്പിക്കുന്ന മാതാപിതാക്കളാണ് നമ്മുടെ സമൂഹത്തിന്റെ യഥാര്‍ത്ഥ നായകന്മാരെന്ന് ഞങ്ങള്‍ നന്നായി തിരിച്ചറിയുന്നു.