കേരളത്തിൽ ഇന്ന് ബിസിനസ് രംഗത്തേക്ക് കടന്നുവരുന്നവരുടെ എണ്ണം ദിനംപ്രതി വർധിച്ചുകൊണ്ടിരിക്കുന്നു. ചെറിയൊരു കട മുതൽ വലിയൊരു സംരംഭം വരെ - സ്വന്തം ജീവിതത്തിൽ കൂടുതൽ സാമ്പത്തിക സ്വാതന്ത്ര്യം നേടണം, കുടുംബത്തിന് മെച്ചപ്പെട്ടൊരു ഭാവി ഒരുക്കണം, സ്വന്തമായി എന്തെങ്കിലും സൃഷ്ടിക്കണം എന്ന ആഗ്രഹമാണ് പലരെയും ബിസിനസിലേക്കു നയിക്കുന്നത്.

ഒരു ജോലിക്ക് സാധാരണയായി വരുമാനത്തിന് ഒരു പരിധിയുണ്ടാകും. എന്നാൽ ബിസിനസിന് അത്തരമൊരു കൃത്യമായ പരിധിയില്ല. ശരിയായ രീതിയിൽ വളർത്തിയെടുക്കാൻ കഴിഞ്ഞാൽ കൂടുതൽ വരുമാനം നേടാനും, സമ്പത്ത് സൃഷ്ടിക്കാനും, സാമ്പത്തിക സ്വാതന്ത്ര്യം കൈവരിക്കാനും ബിസിനസ് വലിയ അവസരമാണ് നൽകുന്നത്. നല്ലൊരു വീട്, മികച്ച വാഹനം, കുട്ടികൾക്ക് നല്ല വിദ്യാഭ്യാസം, യാത്രകൾ, ജീവിതത്തിലെ സ്വപ്നങ്ങൾ - ഇതെല്ലാം സ്വന്തമാക്കാനുള്ള സാധ്യതകൾ ബിസിനസ് ഒരാൾക്ക് തുറന്നുകൊടുക്കുന്നു.

അതുകൊണ്ടുതന്നെയാണ് ബിസിനസ് പലർക്കും വലിയൊരു ആകർഷണമായി മാറുന്നത്. പക്ഷേ അതിന്റെ മറുവശവും നമ്മൾ കാണണം. ബിസിനസ് എന്നത് വെറും ഭാഗ്യപരീക്ഷണമല്ല. ഒരു ലോട്ടറി ടിക്കറ്റ് വാങ്ങുന്നതുപോലെ, ''വിജയിച്ചാൽ വിജയിച്ചു, ഇല്ലെങ്കിൽ നഷ്ടപ്പെട്ടു'' എന്ന സമീപനത്തോടെ ചെയ്യേണ്ട കാര്യമല്ല അത്. പലപ്പോഴും ഒരു ബിസിനസിന്റെ പിന്നിൽ ഒരാളുടെ ജീവിതകാല സമ്പാദ്യവും കുടുംബത്തിന്റെ പ്രതീക്ഷകളും കടവും വായ്പയും പണയവും എല്ലാം ഉണ്ടാകും.

ചിലർ വർഷങ്ങളായി സമ്പാദിച്ച പണം നിക്ഷേപിക്കുന്നു. ചിലർ ബാങ്ക് വായ്പ എടുക്കുന്നു. ചിലർ വീട് പണയം വയ്ക്കുന്നു. ചിലർ സുഹൃത്തുക്കളിൽ നിന്നോ ബന്ധുക്കളിൽ നിന്നോ പണം കണ്ടെത്തുന്നു. ചിലപ്പോൾ ഭാര്യയുടെ ആഭരണവും കുടുംബത്തിന്റെ ഭാവിക്കായി മാറ്റിവച്ച സമ്പാദ്യവും വരെ ബിസിനസിന്റെ ഭാഗമാകുന്നു. അതുകൊണ്ട് ഒരു ബിസിനസ് പരാജയപ്പെടുന്നത് ഒരു ജോലി നഷ്ടപ്പെടുന്നതുപോലെയല്ല. ഒരു ജോലി നഷ്ടപ്പെട്ടാൽ മറ്റൊരു ജോലി കണ്ടെത്താനുള്ള സാധ്യതയുണ്ട്. എന്നാൽ ഒരു ബിസിനസ് തകർന്നാൽ അതോടൊപ്പം പണവും സമയവും ആത്മവിശ്വാസവും സാമൂഹികമായ മാനവും കുടുംബത്തിന്റെ സുരക്ഷയും വരെ ബാധിക്കപ്പെടാം.

ഇന്ന് കോൾഡ്, നാളെ ഹോട്ട്: പുതിയ കസ്റ്റമറെ കണ്ടെത്താനുള്ള ബിസിനസ് രഹസ്യം... Read More

എന്നിട്ടും ഒരു വിചിത്രമായ കാര്യം നമ്മുടെ സമൂഹത്തിൽ നടക്കുന്നു. ഒരു ഡോക്ടറാകാൻ വർഷങ്ങളുടെ പഠനം വേണം. ഒരു അധ്യാപകനാകാൻ പരിശീലനം വേണം. ഒരു പോലീസുകാരനാകാൻ പരിശീലനം വേണം. ഒരു എഞ്ചിനീയറാകാനും അക്കൗണ്ടന്റാകാനും പോലും പഠനവും പരിശീലനവും ആവശ്യമാണ്. പക്ഷേ ലക്ഷങ്ങൾ നിക്ഷേപിച്ച് ഒരു ബിസിനസ് തുടങ്ങുമ്പോൾ പലരും ബിസിനസിനെക്കുറിച്ച് പഠിക്കാറില്ല.

ഒരാൾ വിജയകരമായി ഒരു കട നടത്തുന്നത് കണ്ടാൽ അതേ മാതൃകയിൽ മറ്റൊന്ന് തുടങ്ങുന്നു. ഒരു പ്രദേശത്ത് ഒരു പ്രത്യേക ബിസിനസ് നന്നായി പോകുന്നതു കണ്ടാൽ അതിന്റെ പകർപ്പ് മറ്റൊരാൾ ആരംഭിക്കുന്നു. ''അവൻ ചെയ്തു വിജയിച്ചല്ലോ, എനിക്കും ചെയ്യാം'' എന്ന ചിന്തയിൽ നിന്നാണ് പല ബിസിനസുകളും ജനിക്കുന്നത്.

പക്ഷേ ഒരു കട തുറക്കുന്നതും ഒരു ബിസിനസ് നിർമ്മിക്കുന്നതും ഒരേ കാര്യമല്ല.

ഒരു ഉൽപ്പന്നം വാങ്ങി വിൽക്കുന്നതും ഒരു ബ്രാൻഡ് നിർമ്മിക്കുന്നതും ഒരേ കാര്യമല്ല.

ഇന്നത്തെ കാലത്ത് ഈ വ്യത്യാസം മനസ്സിലാക്കുന്നത് മുമ്പെക്കാളും പ്രധാനമാണ്.

മാർക്കറ്റിംഗ് എങ്ങനെ ഒരു സിസ്റ്റം ആക്കാം? ബിസിനസ് വളർച്ചയ്ക്കായുള്ള 8 ഘട്ടങ്ങൾ... Read More

കാരണം വിപണി മാറിക്കൊണ്ടിരിക്കുകയാണ്. ഒരുകാലത്ത് വലിയ നഗരങ്ങളിൽ മാത്രം ഉണ്ടായിരുന്ന വലിയ ബ്രാൻഡുകളും ചെയിനുകളും ഹൈപ്പർമാർക്കറ്റുകളും ഇന്ന് ചെറിയ പട്ടണങ്ങളിലേക്കും ഗ്രാമങ്ങളിലേക്കും എത്തിത്തുടങ്ങിയിരിക്കുന്നു. വലിയ മൂലധനവും മികച്ച സംവിധാനങ്ങളും ശക്തമായ മാർക്കറ്റിംഗും സാങ്കേതികവിദ്യയും ഉപയോഗിച്ച് അവർ പ്രാദേശിക വിപണിയിലേക്ക് കടന്നുവരുന്നു. ഇതിന്റെ നേരിട്ടുള്ള ആഘാതം ഏറ്റുവാങ്ങേണ്ടിവരുന്നത് പലപ്പോഴും സാധാരണ ചെറുകിട ബിസിനസുകാരനാണ്.

അപ്പോൾ ഒരു ചോദ്യം ഉയരുന്നു. ഒരു സാധാരണ ബിസിനസുകാരൻ എങ്ങനെ നിലനിൽക്കും? എന്റെ ഉത്തരം വളരെ ലളിതമാണ്. വെറും ബിസിനസുകാരനായി മാത്രം നിൽക്കരുത്. ഒരു ബ്രാൻഡായി മാറുക. പക്ഷേ ഇവിടെ ഞാൻ പറയുന്ന ബ്രാൻഡ് എന്നത് കേരളം മുഴുവൻ അറിയപ്പെടുന്ന ഒരു വലിയ ബ്രാൻഡോ ഇന്ത്യ മുഴുവൻ അറിയപ്പെടുന്ന ഒരു ദേശീയ ബ്രാൻഡോ അല്ല. ആദ്യമായി വേണ്ടത് അതിലും ലളിതമാണ്. നിങ്ങളുടെ നാട്ടിൽ ഒരു ബ്രാൻഡാവുക. നിങ്ങളുടെ കടയുള്ള പ്രദേശത്ത്, നിങ്ങളുടെ സേവനം ലഭിക്കുന്ന പ്രദേശത്ത്, നിങ്ങളുടെ യഥാർത്ഥ ഉപഭോക്താക്കൾ ജീവിക്കുന്ന പ്രദേശത്ത് - ആളുകൾ നിങ്ങളെ അറിയണം. നിങ്ങളെ ഓർക്കണം. നിങ്ങളെ വിശ്വസിക്കണം.

നിങ്ങളുടെ മേഖലയിൽ ഒരു ആവശ്യം വന്നാൽ ആദ്യം അവരുടെ മനസ്സിൽ വരേണ്ട പേരുകളിൽ ഒന്ന് നിങ്ങളുടേതായിരിക്കണം. അതാണ് ഞാൻ ഈ ലേഖനത്തിൽ ''മൈക്രോ ബ്രാൻഡ്'' എന്ന് വിളിക്കുന്നത്. ഒരു ബേക്കറി ആണെങ്കിൽ, ആ പ്രദേശത്ത് ജന്മദിന കേക്ക് പറയുമ്പോൾ ആളുകൾക്ക് നിങ്ങളുടെ പേര് ഓർമ്മ വരണം. ഒരു സാരി ഷോപ്പ് ആണെങ്കിൽ, നല്ലൊരു സാരി വാങ്ങണമെന്ന് തോന്നുമ്പോൾ നിങ്ങളുടെ കട മനസ്സിൽ വരണം. ഒരു റെസ്റ്റോറന്റാണെങ്കിൽ, നിങ്ങൾ നൽകുന്ന പ്രത്യേക ഭക്ഷണം പറയുമ്പോൾ നിങ്ങളുടെ പേര് ഓർക്കണം. ഒരു സർവീസ് ബിസിനസ് ആണെങ്കിൽ, ആ പ്രശ്നത്തിന് പരിഹാരം തേടുമ്പോൾ ആദ്യം വിശ്വാസത്തോടെ സമീപിക്കാവുന്ന സ്ഥാപനമായി നിങ്ങളെ കാണണം.

കസ്റ്റമർമാരെ കണ്ടെത്താനും വിൽപ്പന കൂട്ടാനും 30 ദിവസത്തെ പ്രായോഗിക പ്ലാൻ... Read More

അതിന് നിങ്ങൾ ആദ്യം ലോകം കീഴടക്കേണ്ടതില്ല. ഇന്ത്യ മുഴുവൻ നിങ്ങളെ തിരിച്ചറിയേണ്ടതില്ല. കേരളം മുഴുവൻ നിങ്ങളെ അറിയേണ്ടതില്ല. ആദ്യം നിങ്ങളുടെ നാട്ടിൽ ഒരു ഹീറോ ആകുക. അവിടെനിന്നാണ് യഥാർത്ഥ ബ്രാൻഡ് യാത്ര തുടങ്ങുന്നത്.

ഒരു വലിയ ബ്രാൻഡ് നിങ്ങളുടെ പ്രദേശത്ത് കടന്നുവന്നാലും, നിങ്ങളെ വർഷങ്ങളായി അറിയുന്നവരും വിശ്വസിക്കുന്നവരും നിങ്ങളോടൊപ്പം നിൽക്കണം. വിലകൊണ്ടല്ല, വിശ്വാസം കൊണ്ടാണ് അവർ നിങ്ങളെ തിരഞ്ഞെടുക്കേണ്ടത്. അതാണ് ഒരു പ്രാദേശിക ബ്രാൻഡിന്റെ യഥാർത്ഥ ശക്തി.

ബ്രാൻഡ് എന്നത് ലോഗോ മാത്രമല്ല. ഒരു മനോഹരമായ പേര് മാത്രമല്ല. ഒരു കളർ കോമ്പിനേഷനോ ബോർഡോ പരസ്യമോ മാത്രവുമല്ല. മറ്റൊരാളുടെ മനസ്സിൽ നിങ്ങളുടെ ബിസിനസിനെക്കുറിച്ച് രൂപപ്പെടുന്ന വിശ്വാസവും ഓർമ്മയും അനുഭവവുമാണ് ബ്രാൻഡ്.

ഈ ലേഖനം ലോകത്തിലെ ഏറ്റവും വലിയ ബ്രാൻഡിനെ എങ്ങനെ നിർമ്മിക്കാം എന്നതിനെക്കുറിച്ചല്ല. ഒരു സാധാരണ ബിസിനസിനെ, അതിന്റെ സ്വന്തം പ്രദേശത്ത് ആളുകൾ അറിയുകയും വിശ്വസിക്കുകയും തിരഞ്ഞെടുക്കുകയും ചെയ്യുന്ന ഒരു ശക്തമായ മൈക്രോ ബ്രാൻഡാക്കി എങ്ങനെ മാറ്റാം എന്നതിനെക്കുറിച്ചാണ്.

വലിയ സ്വപ്നങ്ങൾ കാണുന്നതിൽ തെറ്റില്ല. പക്ഷേ വലിയ ബ്രാൻഡിലേക്കുള്ള യാത്ര പലപ്പോഴും വളരെ ചെറിയൊരു പ്രദേശത്തുനിന്നാണ് ആരംഭിക്കുന്നത്.

ആദ്യം നാട്ടിൽ പേര് നേടുക. പിന്നെ നാട്ടിന് പുറത്തേക്ക് വളരുക.

അറിവിൽ നിന്ന് പ്രവർത്തനത്തിലേക്ക്: ബിസിനസ് വളർത്താൻ ഇനി എന്ത് ചെയ്യണം?... Read More

ചെറുകിട സംരംഭകർക്കും സംരംഭം ആരംഭിക്കാൻ ഉദ്ദേശിക്കുന്നവർക്കുമുള്ള ടിപ്പുകൾ നിരന്തരം ലഭിക്കുവാൻ വേണ്ടി ഞങ്ങളെ ഫോളോ ചെയ്യുക.