സംസ്ഥാനത്ത് കേരളപ്പിറവി ദിനമായി ഇന്ന് വില ഇടിവോടെ സ്വർണവിപണി. ഒരു പവൻ സ്വർണത്തിന് 200 രൂപയുടെ ഇടിവാണിന്നുണ്ടായത്. ഇതോടെ ഒരു പവൻ സ്വർണത്തിന്റെ വില 90,200 രൂപയിലേക്ക് താഴ്ന്നു. ഇന്നലെ രണ്ട് തവണയായി 1,320 രൂപയുടെ വർധനവ് നേരിട്ട സ്ഥാനത്താണ് ഇന്ന് 200 രൂപയുടെ ഇടിവ് സംഭവിച്ചിരിക്കുന്നത്. ഇന്നലെ രാവിലെ ആദ്യം 880 രൂപ വർധിച്ച സ്വർണത്തിന് ഉച്ചയ്ക്ക് ശേഷം വീണ്ടും 440 രൂപ വർധിക്കുകയായിരുന്നു.

ഒക്ടോബർ മാസാരംഭം 87,000 രൂപയ്ക്ക് വിൽപ്പന ആരംഭിച്ച സ്വർണത്തിന് ഒക്ടോബർ മൂന്ന് ആയപ്പോഴേയ്ക്കും വില ഇടിഞ്ഞ് 86,560 രൂപയിലേക്ക് വില കുറഞ്ഞിരുന്നു. എന്നാൽ പിന്നീടുള്ള ദിവസങ്ങളിൽ സ്വർണവില പിടിവിട്ട് കുതിച്ചുയരുകയും നിരന്തരം റെക്കോർഡുകൾ തകർത്ത് മുന്നേറുകയുമായിരുന്നു. ഒക്ടോബർ എട്ടിന് ആദ്യമായി തൊണ്ണൂറായിരം രൂപ പിന്നിട്ട സ്വർണം അന്ന് രണ്ട് തവണ വില വർധിച്ച് വൈകുന്നേരം ആയപ്പോഴേയ്ക്കും 90,880 രൂപയിലേക്ക് എത്തിയിരുന്നു. തുടർന്നുള്ള ദിവസങ്ങളിൽ പിന്നെയും വില കുതിച്ചുയർന്ന സ്വർണം ഒക്ടോബർ 17ന് 97,360 രൂപയിലേക്ക് എത്തി സർവ്വ റെക്കോർഡുകളും തകർത്തിരുന്നു. പിന്നീടുള്ള രണ്ട് ദിവസം വില ഇടിഞ്ഞുവെങ്കിലും 21ന് വീണ്ടും 97,360 രൂപയിലേക്ക് ഉയരുകയും ചെയ്തിരുന്നു. തുടർന്നുള്ള ദിവസങ്ങളിൽ അന്താരാഷ്ട്ര വിപണിയിലെ വില ഇടിവിന്റെ പ്രതിഫലനം എന്നവണ്ണം ആഭ്യന്തര വിപണിയിലും വില കുറയുകയും ഒക്ടോബർ 30 ആയപ്പോഴേയ്ക്കും 88,360 രൂപവരെ വില താഴുകയും ചെയ്തിരുന്നു. എന്നാൽ ഒക്ടോബർ 30ന് ഉച്ചയ്ക്ക് ശേഷവും ഇന്നലെയുമായി വില വീണ്ടും വർധിക്കുകയും സ്വർണവില 90,400 രൂപയിലേക്ക് ഉയരുകയുമായിരുന്നു.

ഒരു ഗ്രാം സ്വർണത്തിന്റെ വില ഇന്ന്  25 രൂപ കുറഞ്ഞ് 11,275 രൂപയിലേക്ക് താഴ്ന്നു.

സ്വർണവിലയിൽ ദിവസവുമുണ്ടാകുന്ന മാറ്റം കൃത്യമായി അറിയുവാനായി ഈ പോർട്ടൽ ഫോളോ ചെയ്യുക.