സംസ്ഥാനത്ത് പുതുവത്സരാരംഭ ദിനം വില വർധനയോടെ ആരംഭിച്ച് സ്വർണവിപണി. ഒരു പവൻ സ്വർണത്തിന് 120 രൂപയുടെ വർധനയാണിന്നുണ്ടായത്. ഇതോടെ ഒരു പവൻ സ്വർണത്തിന്റെ വില 99,040 രൂപയിലേക്ക് ഉയർന്നു. കഴിഞ്ഞ മൂന്ന് ദിവസമായി സ്വർണവില തുടർച്ചയായി ഇടിയുകയായിരുന്നു. അതിൽതന്നെ ഇന്നലെ മൂന്ന് തവണ സ്വർണവിലയിൽ ഇടിവ് സംഭവിച്ചിരുന്നു. രാവിലെ 240 രൂപ കുറഞ്ഞ് 99,640 രൂപയിലേക്ക് താഴ്ന്ന സ്വർണവില ഉച്ചയ്ക്ക് 99,160 രൂപയിലേക്കും വൈകുന്നേരം 98,920 രൂപയിലേക്കും താഴ്ന്നിരുന്നു. മൂന്ന് തവണയായി 720 രൂപയുടെ ഇടിവാണിന്നലെ സ്വർണവിലയിൽ സംഭവിച്ചത്. ചൊവ്വാഴ്ച 2,240 രൂപ ഇടിഞ്ഞ സ്വർണത്തിന് തിങ്കളാഴ്ച നാല് തവണ വില ഇടിഞ്ഞിരുന്നു. നാല് തവണയായി 2,320 രൂപ ഒരു പവൻ സ്വർണത്തിന് തിങ്കളാഴ്ച കുറഞ്ഞിരുന്നു.

കഴിഞ്ഞ ഒരു വർഷത്തെ സ്വർണവില വിലയിരുത്തുമ്പോൽ 2025 ജനുവരി ഒന്നിന് 57,200 രൂപയ്ക്ക് വിൽപ്പന നടന്ന സ്വർണമാണ് 2025 ഡിസംബർ 27ന് 1,04,440 രൂപയിലേക്ക് ഉയർന്ന് റെക്കോർഡിട്ടത്. ഒരു വർഷത്തിനിടെ ഒരു പവൻ സ്വർണത്തിന് 47,240 രൂപയുടെ വർധനയാണ് സംഭവിച്ചത്.

2025 ജനുവരി ഒന്നിന് 57,200 രൂപയ്ക്ക് വിൽപ്പന നടന്ന സ്വർണം ജനുവരി 31 ആയപ്പോഴേയ്ക്കും 61,840 രൂപയിലേക്ക് ഉയർന്നിരുന്നു. തുടർന്നുള്ള മാസങ്ങളിലും ഏറ്റവും ഉയർന്ന നിരക്കിലെ റെക്കോർഡ് നിരന്തരം തിരുത്തി മുന്നേറിയ സ്വർണം ഫെബ്രുവരി 25ന് 64,600 രൂപയിലേക്കും മാർച്ച് 31ന് 67,400 രൂപയിലേക്കും ഉയർന്നിരുന്നു. തുടർന്ന് ഏപ്രിലിൽ വീണ്ടും വിലയിലെ കുതിപ്പ് ആവർത്തിച്ച സ്വർണം ഏപ്രിൽ 22ന് ആ മാസത്തെ ഏറ്റവും ഉയർന്ന നിരക്കായ 74,320 രൂപയിലേക്ക് എത്തിയിരുന്നു. മെയ് മാസത്തിൽ നേരിയ വില ഇടിവിലൂടെ കടന്നുപോയ സ്വർണത്തിന്റെ ആ മാസത്തെ ഏറ്റവും ഉയർന്ന നിരക്ക് മെയ് 8ന് വിൽപ്പന നടന്ന 73,040 രൂപയാണ്. ജൂണിൽ വീണ്ടും വില വർധനവ് തുടർന്ന സ്വർണം ജൂൺ 15ന് 74,560 രൂപയിലേക്ക് എത്തി റെക്കോർഡിട്ടു.

ജൂലൈ 23ന് 75,040 രൂപയിലേക്ക് എത്തി ചരിത്രതിലാദ്യമായി ഒരു പവൻ സ്വർണത്തിന് മുക്കാൽ ലക്ഷം രൂപ എന്ന റെക്കോർഡിട്ട സ്വർണം തൊട്ടടുത്ത മാസം 30ന് 76,960 രൂപയിലേക്ക് ഉയർന്നിരുന്നു. സെപ്റ്റംബർ 30ന് 86,760 രൂപയിലേക്ക് ഉയർന്ന സ്വർണവില ഒക്ടോബർ 17നും 21നും 97,360 രൂപയിലേക്ക് ഉയർന്ന റെക്കോർഡുകൾ തിരുത്തി. നവംബറിലുടനീളം വില ഇടിവിലൂടെ കടന്നുപോയെ സ്വർണം നവംബർ 30ന് വിൽപ്പന നടന്ന 95,200 രൂപയാണ് ആ മാസത്തെ ഏറ്റവും ഉയർന്ന നിരക്കായി രേഖപ്പെടുത്തിയത്. ഡിസംബർ മാസവും ആദ്യവാരം വില ഇടിവിലൂടെ തന്നെ മുന്നേറിയ സ്വർണവിപണി ഡിസംബർ 9ന് 94,920 രൂപയിലേക്ക് ഇടിഞ്ഞുവെങ്കിലും തുടർന്നുള്ള ദിവസങ്ങളിൽ വില പിടിവിട്ട് കുതിച്ചുയരുകയും ഡിസംബർ 23ന് ചരിത്രത്തിലാദ്യമായി ഒരു പവൻ സ്വർണത്തിന്റെ വില ഒരു ലക്ഷം രൂപ പിന്നിട്ട് മുന്നേറുകയും ചെയ്തിരുന്നു.

ഒരു ഗ്രാം സ്വർണത്തിന്റെ വില ഇന്ന് 15 രൂപ കൂടി 12,380 രൂപയിലേക്ക് ഉയർന്നു.

സ്വർണവിലയിൽ ദിവസവുമുണ്ടാകുന്ന മാറ്റം കൃത്യമായി അറിയുവാനായി ഈ പോർട്ടൽ ഫോളോ ചെയ്യുക.