കൊച്ചി: യെസ് ബാങ്ക് നടപ്പു സാമ്പത്തിക വർഷത്തെ രണ്ടാം പാദത്തിൽ വാർഷികാടിസ്ഥാനത്തിൽ 18.3 ശതമാനം വളർച്ചയോടെ 654 കോടി രൂപയുടെ അറ്റാദായം കൈവരിച്ചു. വാർഷികാടിസ്ഥാനത്തിൽ 32.9 വളർച്ചയോടെയും ത്രൈമാസാടിസ്ഥാനത്തിൽ 31.8 ശതമാനം വളർച്ചയോടെയും ബാങ്കിൻറെ പ്രവർത്തന ലാഭം 1,296 കോടി രൂപയായി വർദ്ധിച്ചു.

വാർഷികാടിസ്ഥാനത്തിൽ 4.6 ശതമാനം വളർച്ചയോടെ അറ്റപലിശ വരുമാനം രണ്ടാം പാദത്തിൽ 2,301 കോടി രൂപയിലെത്തി. അറ്റ പലിശ മാർജിൻ 2.5 ശതമാനമായി വാർഷികാടിസ്ഥാനത്തിൽ 10 ബേസിസ് പോയിൻറ് വർദ്ധിച്ചു. പലിശ ഇതര വരുമാനം 1,644 കോടി രൂപയിലെത്തി.

ബാങ്ക് തുടർച്ചയായ അഞ്ചാം ത്രൈമാസത്തിലും ചെലവ്-വരുമാന അനുപാതം കുറച്ച് ഇത് 67.1 ശതമാനം എന്ന നിലയിലെത്തിച്ചു. രണ്ടാം പാദത്തിൽ ആസ്തിയിന്മേലുള്ള വരുമാനം ആദ്യ പാദത്തിലെ 0.5 ശതമാനത്തിൽ നിന്ന് 0.6 ശതമാനമായി മെച്ചപ്പെട്ടു.

മൊത്തം നിക്ഷേപങ്ങൾ വാർഷികാടിസ്ഥാനത്തിൽ 6.9 ശതമാനവും ത്രൈമാസാടിസ്ഥാനത്തിൽ 7.4 ശതമാനവും വർദ്ധിച്ച് 2,96,276 കോടി രൂപയിലെത്തി. കറൻറ് അക്കൗണ്ട് സേവിംഗ്സ് അക്കൗണ്ട് നിക്ഷേപം വാർഷികാടിസ്ഥാനത്തിൽ 170 ബേസിസ് പോയിൻറും ത്രൈമാസാടിസ്ഥാനത്തിൽ 90 ബേസിസ് പോയിൻറും ഉയർന്ന് 33.7 ശതമാനമായി. അറ്റ വായ്പകൾ വാർഷികാടിസ്ഥാനത്തിൽ 6.4 ശതമാനവും ത്രൈമാസാടിസ്ഥാനത്തിൽ 3.8 ശതമാനവും വളർച്ചയോടെ 2,50, 212 കോടി രൂപയിലെത്തി.

നടപ്പു സാമ്പത്തിക വർഷത്തിലെ രണ്ടാം പാദത്തിൽ ബാങ്ക് ശക്തമായ പ്രകടനം കാഴ്ച വെച്ചെന്ന് യെസ് ബാങ്ക് മാനേജിംഗ് ഡയറക്ടറും സിഇഒയുമായ പ്രശാന്ത് കുമാർ പറഞ്ഞു. കറൻറ് അക്കൗണ്ട് സേവിംഗ്സ് അക്കൗണ്ട് നിക്ഷേപങ്ങളിൽ തുടർച്ചയായ മികച്ച പ്രകടനമാണ് ബാങ്ക് നടത്തിയത്. വിവിധ വിഭാഗങ്ങളിലുട നീളമുള്ള ശക്തമായ വളർച്ചയുടെ പിന്തുണയോടെ വിതരണത്തിൽ മികച്ച വളർച്ച രേഖപ്പെടുത്തി. റീട്ടെയിൽ വിഭാഗത്തിലെ ത്രൈമാസാടിസ്ഥാനത്തിലെ 20 ശതമാനം വളർച്ചയും ഇതിൽ ഉൾപ്പെടുന്നുവെന്നും അദ്ദേഹം കൂട്ടിച്ചേർത്തു.