കുട്ടികളിലും കൗമാരക്കാരിലും അമിതവണ്ണം വർധിച്ചുവരുന്നത് ലോകമെമ്പാടും വലിയ ആരോഗ്യപ്രശ്നമായി മാറുകയാണ്. ഒരുകാലത്ത് മുതിർന്നവരിൽ കൂടുതലായി കണ്ടിരുന്ന അമിതവണ്ണവും അതുമായി ബന്ധപ്പെട്ട ആരോഗ്യപ്രശ്നങ്ങളും ഇന്ന് കുട്ടികളിലും വ്യാപകമാകുന്നു. ഈ സാഹചര്യത്തിൽ കുട്ടികളിലെയും കൗമാരക്കാരിലെയും അമിതവണ്ണം നിയന്ത്രിക്കുന്നതിനായി ലോകാരോഗ്യ സംഘടന (WHO) 2026 ഒക്ടോബർ 7-ന് പുതിയ മാർഗനിർദേശങ്ങൾ പുറത്തിറക്കി.

കുട്ടികളുടെ അമിതവണ്ണം ഒരു സൗന്ദര്യപ്രശ്നമോ ശരീരഭാരവുമായി മാത്രം ബന്ധപ്പെട്ട വിഷയമോ അല്ലെന്നും ശാരീരികവും മാനസികവുമായ ആരോഗ്യത്തെ ബാധിക്കുന്ന ഗുരുതരമായ ആരോഗ്യപ്രശ്നമാണെന്നും ലോകാരോഗ്യ സംഘടന വ്യക്തമാക്കുന്നു.

കുട്ടികളിൽ അമിതവണ്ണം വർധിക്കുന്നതെന്തുകൊണ്ട്?

• മാറുന്ന ജീവിതശൈലി കുട്ടികളിലെ അമിതവണ്ണത്തിന് കാരണമാകുന്ന പ്രധാന ഘടകങ്ങളിലൊന്നാണ്. മുൻകാലങ്ങളിൽ കുട്ടികൾ കൂടുതൽ സമയം വീടിന് പുറത്തു കളിക്കുകയും ഓടുകയും വിവിധ ശാരീരിക പ്രവർത്തനങ്ങളിൽ ഏർപ്പെടുകയും ചെയ്തിരുന്നു. എന്നാൽ ഇന്ന് മൊബൈൽ ഫോണുകളും ടെലിവിഷനും വീഡിയോ ഗെയിമുകളും കുട്ടികളുടെ ഒഴിവുസമയത്തിന്റെ വലിയൊരു ഭാഗം കൈയടക്കിയിരിക്കുകയാണ്.
• ശാരീരിക പ്രവർത്തനങ്ങൾ കുറയുന്നതിനൊപ്പം ഉയർന്ന കലോറിയുള്ള ഭക്ഷണപദാർത്ഥങ്ങളുടെ അമിത ഉപയോഗവും പ്രശ്നം സങ്കീർണമാക്കുന്നു. മധുരപാനീയങ്ങൾ, ഫാസ്റ്റ് ഫുഡ്, അമിതമായി സംസ്കരിച്ച ഭക്ഷണങ്ങൾ എന്നിവ പതിവായി കഴിക്കുന്നത് ആരോഗ്യകരമല്ലാത്ത ശരീരഭാരവർധനയ്ക്ക് കാരണമാകാം.
• ഉറക്കക്കുറവ്, ക്രമരഹിതമായ ഭക്ഷണശീലങ്ങൾ, മാനസിക സമ്മർദം, പാരമ്പര്യഘടകങ്ങൾ, ഹോർമോൺ സംബന്ധമായ ചില പ്രശ്നങ്ങൾ എന്നിവയും അമിതവണ്ണത്തെ സ്വാധീനിക്കാം.
• അതുകൊണ്ടുതന്നെ അമിതവണ്ണത്തെ കുട്ടികളുടെ ഭക്ഷണശീലങ്ങളുടെയോ വ്യക്തിപരമായ നിയന്ത്രണക്കുറവിന്റെയോ മാത്രം ഫലമായി കാണുന്നത് ശരിയായ സമീപനമല്ല.
• അമിതവണ്ണം ഉണ്ടാക്കുന്ന ആരോഗ്യപ്രശ്നങ്ങൾ
• കുട്ടിക്കാലത്തെ അമിതവണ്ണം ഭാവിയിൽ നിരവധി ആരോഗ്യപ്രശ്നങ്ങൾക്കുള്ള സാധ്യത വർധിപ്പിക്കുന്നു. ടൈപ്പ് 2 പ്രമേഹം, ഉയർന്ന രക്തസമ്മർദം, ഹൃദയസംബന്ധമായ രോഗങ്ങൾ, കരളിൽ കൊഴുപ്പ് അടിഞ്ഞുകൂടുന്ന അവസ്ഥ തുടങ്ങിയവയ്ക്കുള്ള സാധ്യത അമിതവണ്ണമുള്ള കുട്ടികളിൽ കൂടുതലായിരിക്കും.
• ഇതോടൊപ്പം കുട്ടികളുടെ മാനസികാരോഗ്യത്തെയും അമിതവണ്ണം ബാധിക്കാം. ശരീരപ്രകൃതിയെ പരിഹസിക്കൽ, കൂട്ടുകാരിൽനിന്നുള്ള ഒറ്റപ്പെടുത്തൽ, ആത്മവിശ്വാസക്കുറവ് തുടങ്ങിയ അനുഭവങ്ങൾ കുട്ടികളിൽ ഉത്കണ്ഠയ്ക്കും വിഷാദത്തിനും കാരണമാകാം.അതിനാൽ അമിതവണ്ണം നിയന്ത്രിക്കുന്നതോടൊപ്പം കുട്ടികളുടെ ആത്മാഭിമാനവും മാനസികാരോഗ്യവും സംരക്ഷിക്കേണ്ടതും പ്രധാനമാണ്.

ലോകാരോഗ്യ സംഘടനയുടെ പുതിയ നിർദേശങ്ങൾ

• അമിതവണ്ണമുള്ള കുട്ടികളുടെ ചികിത്സയിൽ മരുന്നുകളേക്കാളും ശസ്ത്രക്രിയകളേക്കാളും പ്രഥമ പരിഗണന നൽകേണ്ടത് ആരോഗ്യകരമായ ജീവിതശൈലി രൂപപ്പെടുത്തുന്നതിനാണെന്ന് പുതിയ മാർഗനിർദേശങ്ങൾ വ്യക്തമാക്കുന്നു.
• കൃത്യമായ ഭക്ഷണക്രമം, പ്രായത്തിനും ആരോഗ്യസ്ഥിതിക്കും അനുയോജ്യമായ ശാരീരിക പ്രവർത്തനങ്ങൾ, പെരുമാറ്റശീലങ്ങളിലെ മാറ്റങ്ങൾ, കുടുംബത്തിന്റെ പിന്തുണ എന്നിവ സംയോജിപ്പിച്ചുള്ള ചികിത്സാരീതികളാണ് സംഘടന ശുപാർശ ചെയ്യുന്നത്.
• ഒൻപത് വയസ്സുവരെ പ്രായമുള്ള കുട്ടികളിൽ അമിതവണ്ണം കുറയ്ക്കുന്നതിനുള്ള മരുന്നുകളോ ശസ്ത്രക്രിയയോ പ്രത്യേക ഭാരനിയന്ത്രണ ഉപകരണങ്ങളോ സംഘടന ശുപാർശ ചെയ്യുന്നില്ല.
• പത്ത് മുതൽ പത്തൊൻപത് വയസ്സുവരെയുള്ള കൗമാരക്കാരിൽ ഡോക്ടർമാരുടെ മേൽനോട്ടത്തിലുള്ള ജീവിതശൈലി മാറ്റങ്ങൾ ആവശ്യമായ ഫലം നൽകാത്ത പ്രത്യേക സാഹചര്യങ്ങളിൽ മാത്രമാണ് അംഗീകൃത മരുന്നുകൾ പരിഗണിക്കാവുന്നത്. ഗുരുതരമായ അമിതവണ്ണമുള്ള ചില കൗമാരക്കാരിൽ കർശനമായ മെഡിക്കൽ മാനദണ്ഡങ്ങൾ പാലിച്ചുകൊണ്ട് ശസ്ത്രക്രിയയും പരിഗണിക്കാം.

മാതാപിതാക്കൾ ശ്രദ്ധിക്കേണ്ട കാര്യങ്ങൾ

• കുട്ടികളിൽ ആരോഗ്യകരമായ ജീവിതശൈലി വളർത്തിയെടുക്കുന്നതിൽ മാതാപിതാക്കളുടെ പങ്ക് വളരെ വലുതാണ്.
• വീട്ടിൽ പോഷകസമൃദ്ധമായ ഭക്ഷണം ലഭ്യമാക്കുക, പച്ചക്കറികളും പഴങ്ങളും ധാന്യങ്ങളും ആവശ്യമായ അളവിൽ ഭക്ഷണത്തിൽ ഉൾപ്പെടുത്തുക,
• മധുരപാനീയങ്ങളുടെയും അമിതമായി സംസ്കരിച്ച ഭക്ഷണങ്ങളുടെയും ഉപയോഗം കുറയ്ക്കുക തുടങ്ങിയ ശീലങ്ങൾ കുട്ടികളുടെ ആരോഗ്യത്തിന് ഗുണകരമാണ്.
• കുട്ടികൾക്ക് ദിവസവും കളിക്കാനും ഓടാനും മറ്റു ശാരീരിക പ്രവർത്തനങ്ങളിൽ ഏർപ്പെടാനുംഅവസരം നൽകണം.
• അഞ്ച് മുതൽ പതിനേഴ് വയസ്സുവരെയുള്ളവർക്ക് ആഴ്ചയിലുടനീളം ശരാശരി ദിവസേന അറുപത് മിനിറ്റെങ്കിലും മിതമായതോ തീവ്രമായതോ ആയ ശാരീരിക പ്രവർത്തനം ലോകാരോഗ്യ സംഘടന ശുപാർശ ചെയ്യുന്നുണ്ട്.
• മൊബൈൽ ഫോണിന്റെയും ടെലിവിഷന്റെയും ഉപയോഗം നിയന്ത്രിക്കുന്നതോടൊപ്പം മതിയായ ഉറക്കത്തിനും പ്രാധാന്യം നൽകണം.
• കുട്ടികളുടെ ശരീരഭാരത്തെക്കുറിച്ച് നിരന്തരം കുറ്റപ്പെടുത്തുകയോ ഭക്ഷണം കർശനമായി നിയന്ത്രിക്കുകയോ ചെയ്യുന്നത് ദോഷകരമായേക്കാം. ആരോഗ്യകരമായ ശീലങ്ങൾ കുടുംബം മുഴുവൻ പിന്തുടരുന്നതാണ് കൂടുതൽ നല്ലത്.

അമിതവണ്ണം നിയന്ത്രിക്കുന്നതിന്റെ ലക്ഷ്യം ശരീരഭാരം കുറയ്ക്കുക എന്നതു മാത്രമല്ല; കുട്ടികളുടെ ആരോഗ്യകരമായ വളർച്ചയും ശാരീരികക്ഷമതയും മാനസികക്ഷേമവും ഉറപ്പാക്കുക എന്നതുകൂടിയാണ്.

കുട്ടികളുടെ ആരോഗ്യം സംരക്ഷിക്കാനുള്ള ഏറ്റവും നല്ല തുടക്കം വീട്ടിൽനിന്നാണ്. മാതാപിതാക്കൾ ആരോഗ്യകരമായ ജീവിതശൈലിക്ക് മാതൃകയാകുമ്പോൾ കുട്ടികളും ആ ശീലങ്ങളിലേക്ക് സ്വാഭാവികമായി വളരും.

ഡെങ്കിപ്പനിയാണോ സാധാരണ പനിയാണോ? ലക്ഷണങ്ങൾ മാത്രം നോക്കി തീരുമാനിക്കരുത്... Read More

ഹെൽത്ത് ടിപ്സുകൾ ദിവസവും ലഭിക്കുവാൻ ഈ പോർട്ടൽ ഫോളോ ചെയ്യുക.