കോഴിക്കോട്: കോഴിക്കോട് ഗവ. സൈബർ പാർക്കിൽ വികസിപ്പിക്കുന്ന സാൻഡ്ബോക്സ് മിനി ടെക് പാർക്ക് പദ്ധതിയുടെ ഭൂമികൈമാറ്റവും പദ്ധതി ആരംഭചടങ്ങും മാർച്ച് 9 ന് വൈകിട്ട് 5 ന് സൈബർ പാർക്കിലെ സഹ്യ ഹാളിൽ നടക്കും. ഗവ. സൈബർ പാർക്കിലെ ആദ്യത്തെ പ്രൈവറ്റ് കോ-ഡെവലപ്പർ ആണ് സാൻഡ്ബോക്സ് വർക്ക്സ്പേസസ്.

ചടങ്ങിൽ കേരള സ്റ്റേറ്റ് ഐടി ഇൻഫ്രാസ്ട്രക്ചർ ലിമിറ്റഡ് മാനേജിംഗ് ഡയറക്ടർ സന്തോഷ് ബാബു ഐഎഎസ് (റിട്ട.) മുഖ്യാതിഥിയായിരിക്കും.

ഏകദേശം 30,000 ചതുരശ്ര അടി വിസ്തൃതിയിലുള്ള ഗ്രേഡ് എ ടെക്നോളജി വർക്ക് സ്പേസ് ആയിട്ടാണ് സാൻഡ് ബോക്സ് മിനി ടെക് പാർക്ക് ആസൂത്രണം ചെയ്തിരിക്കുന്നത്. ടെക്നോളജി കമ്പനികൾ, ഗ്ലോബൽ എന്റർപ്രൈസുകൾ, സ്റ്റാർട്ടപ്പുകൾ, ഗ്ലോബൽ കേപ്പബിലിറ്റി സെന്ററുകൾ എന്നിവയ്ക്ക് അനുയോജ്യമായ ആധുനിക ഓഫീസ് സൗകര്യങ്ങൾ ഒരുക്കുന്നതാണ് ലക്ഷ്യം.

പരിസ്ഥിതി സൗഹൃദവും ഊർജക്ഷമവുമായ ലീഡ് സർട്ടിഫൈഡ് ഗ്രീൻ ബിൽഡിംഗ് ആയി രൂപകൽപ്പന ചെയ്യുന്ന ഈ ഫ്യൂച്ചറിസ്റ്റിക് സംരംഭം ആധുനിക സൗകര്യങ്ങളോടു കൂടിയ പ്രവർത്തന അന്തരീക്ഷവും പുതിയ തൊഴിൽ അവസരങ്ങളും സൃഷ്ടിക്കുമെന്ന് പ്രതീക്ഷിക്കുന്നു.

മിനി ടെക് പാർക്കിന്റെ ഗ്രൗണ്ട് ഫ്ളോറിൽ കോ-വർക്കിംഗ് സ്പേസ് ഉണ്ടായിരിക്കും. ഇതിൽ പ്രവർത്തിക്കുന്ന കഫേ-കം-ലോഞ്ചിൽ ബ്രേക്ക് ഔട്ട് കോർണറുകളും ഫോൺ-ബൂത്ത് പോഡുകളും ഫൗണ്ടർ-മെന്റർ ക്യാബിനുകളുമുണ്ടാകും. പ്രാരംഭ ഘട്ട സംരംഭകർക്കായി നീക്കിവച്ചിരിക്കുന്ന കോംപാക്റ്റ് ഇൻകുബേഷൻ ബേയും ഇതിൽ ഉൾപ്പെടും.

വിദേശ രാജ്യങ്ങളിൽ പ്രവർത്തിക്കുന്ന എൻ.ആർ.ഐ മലയാളികളുടെ പങ്കാളിത്തത്തോടെയും നിക്ഷേപ സഹകരണത്തോടെയും കോഴിക്കോട് നഗരത്തെയും മലബാർ മേഖലയെയും ശക്തമായ ടെക്നോളജി-ബിസിനസ് കേന്ദ്രമായി വികസിപ്പിക്കുക എന്ന ലക്ഷ്യത്തോടെയാണ് ഈ പദ്ധതി നടപ്പാക്കുന്നത്.

പദ്ധതിയുടെ ദീർഘകാല ദർശനം ഉൾക്കൊള്ളുന്ന മാർഗരേഖ സാൻഡ്ബോക്സ് ഉദ്യോഗസ്ഥ സംഘം മുഖ്യമന്ത്രി പിണറായി വിജയന് കൈമാറി.

സാൻഡ്ബോക്സ് വർക്ക്സ്പേസസ് ഭാവിയിൽ സൈബർ പാർക്ക് ഉൾപ്പെടെ മറ്റ് പ്രധാന കേന്ദ്രങ്ങളിലായി കൂടുതൽ ടെക്നോളജി അടിസ്ഥാന സൗകര്യങ്ങളും വർക്ക്സ്പേസ് വികസനങ്ങളും നടപ്പാക്കാനുള്ള പദ്ധതികളുമായി പ്രവർത്തിച്ചുവരുന്നതായും അധികൃതർ അറിയിച്ചു.