• റിഫ്ളക്ഷൻസ് ഇൻഫോ സിസ്റ്റംസ് 24-ാം സ്ഥാനത്ത്

തിരുവനന്തപുരം: ടെക്നോപാർക്കിലെ പ്രമുഖ ഇന്നവേഷൻ ടെക്നോളജി സേവന ദാതാക്കളായ റിഫ്ളക്ഷൻസ് ഇൻഫോ സിസ്റ്റംസിന് ഗ്രേറ്റ് പ്ലേസ് ടു വർക്ക് (ജിപിടിഡബ്ല്യു) അംഗീകാരം. ഇന്ത്യയിലെ മികച്ച 50 തൊഴിലിടങ്ങളിൽ (മിഡ്-സൈസ്) 24 -ാം സ്ഥാനത്തേക്കാണ് റിഫ്ളക്ഷൻസ് ഇൻഫോ സിസ്റ്റംസ് തിരഞ്ഞെടുക്കപ്പെട്ടത്. മികച്ച തൊഴിലിട സംസ്കാരമുള്ള സ്ഥാപനങ്ങൾക്ക് അംഗീകാരം നൽകുന്ന ആഗോള അതോറിറ്റിയാണ് ജിപിടിഡബ്ല്യു.

മുംബൈയിൽ നടന്ന ഗ്രേറ്റ് പ്ലേസ് ടു വർക്ക് അംഗീകാര ചടങ്ങിൽ റിഫ്ലക്ഷൻസ് ഇൻഫോ സിസ്റ്റംസിൻറെ ടാലൻറ് അക്വിസിഷൻ അസോസിയേറ്റ് മാനേജർ റോഷ്നി സുരേഷ്, ചീഫ് ആർക്കിടെക്റ്റും ടെക്നോളജി പ്രാക്ടീസസ് മേധാവിയുമായ മുഹമ്മദ് ഹസീൽ, പീപ്പിൾ ആൻഡ് കൾച്ചർ മേധാവി ജിതിൻ ചക്കാലക്കൽ എന്നിവർ അവാർഡ് ഏറ്റുവാങ്ങി.

തുടർച്ചയായ മൂന്നാംവർഷമാണ് റിഫ്ളക്ഷൻസ് ഇൻഫോ സിസ്റ്റംസിന് ഇന്ത്യയിലെ മികച്ച 50 ഇടത്തരം കമ്പനികളിൽ ഒന്നെന്ന ജിപിടിഡബ്ല്യു വിൻറെ അംഗീകാരം ലഭിക്കുന്നത്.

ജീവനക്കാർക്ക് ലഭിക്കുന്ന മികച്ച അനുഭവങ്ങളിലൂടെ സുസ്ഥിരമായ ബിസിനസ്സ് വളർച്ച ആരംഭിക്കുമെന്ന് വിശ്വസിക്കുന്നതായി റിഫ്ളക്ഷൻസ് ഇൻഫോ സിസ്റ്റംസിൻറെ പീപ്പിൾ ആൻഡ് കൾച്ചർ മേധാവി ജിതിൻ ചക്കാലക്കൽ പറഞ്ഞു. റിഫ്ളക്ഷൻസിലെ ജീവനക്കാർക്ക് ലഭിക്കുന്ന മികച്ച അനുഭവങ്ങളുടേയും സ്ഥിരതയുടേയും പ്രതിഫലനമാണ് തുടർച്ചയായ മൂന്നാം വർഷം ലഭിക്കുന്ന ജിപിടിഡബ്ല്യു സർട്ടിഫിക്കേഷൻ.

റിഫ്ളക്ഷൻസിലെ ജീവനക്കാർക്ക് നല്ല അനുഭവങ്ങൾ നല്കുന്നതിനായി വിവിധ കാര്യങ്ങൾ രൂപകൽപ്പന ചെയ്യുന്നതിനൊപ്പം ചില പരിഷ്കാരങ്ങളും കൊണ്ടുവരാറുണ്ട്. ഞങ്ങളുടെ ടീമിലെ ജീവനക്കാരുടെ പിന്തുണയോടെയാണ് അത് നടപ്പിലാക്കുന്നത്.

ആഗോളതലത്തിൽ വികസിക്കുന്നതിനാവശ്യമായ നവീകരണവും ചടുലതയും നിറഞ്ഞ പ്രവർത്തനങ്ങളാണ് റിഫ്ളക്ഷൻസിനെ മുന്നോട്ട് നയിക്കുന്നത്. ഇതിനായി പ്രവർത്തിക്കുന്ന ഓരോ ജീവനക്കാരോടും നന്ദിയുണ്ടെന്നും അദ്ദേഹം കൂട്ടിച്ചേർത്തു.

ലോകത്തിലെ ഏറ്റവും മികച്ച ബ്രാൻഡുകളുടെ സാങ്കേതിക നവീകരണത്തിൽ പങ്കാളിയാകുന്ന എഐ അധിഷ്ഠിത നൂതന ഡിജിറ്റൽ എഞ്ചിനീയറിംഗ് കമ്പനിയാണ് 2008-ൽ സ്ഥാപിതമായ റിഫ്ളക്ഷൻസ് ഇൻഫോ സിസ്റ്റംസ്. ഡിജിറ്റൽ ട്രാൻസ്ഫർമേഷൻ, എഐ, ഇൻഫർമേഷൻ സെക്യൂരിറ്റി എന്നിവയിൽ വൈദഗ്ദ്ധ്യമുള്ള ആഗോള സാങ്കേതിക നവീകരണ സേവന ദാതാവാണിത്. ഉയർന്ന ഗുണനിലവാരത്തിനും സുരക്ഷയ്ക്കുമുള്ള ഐഎസ്ഒ 9001:2015, ഐഎസ്ഒ 27001:2022, പിസിഐ ഡിഎസ്എസ്, എസ്ഒസി 2 ടൈപ്പ് 2 സർട്ടിഫിക്കേഷനുകൾ കമ്പനി നേടിയിട്ടുണ്ട്.

ഗ്രേറ്റ് പ്ലേസ് ടു വർക്ക് സർട്ടിഫിക്കേഷൻ തൊഴിലിടങ്ങളുടെ നിലവാരത്തിലെ ആഗോള മാനദണ്ഡമാണ്. ലോകത്തെമ്പാടുമുള്ള തൊഴിലിടങ്ങളുടെ നിലവാരം അളക്കാൻ ജിപിടിഡബ്ല്യു വിൻറെ സർട്ടിഫിക്കേഷൻ പ്രക്രിയയിലൂടെ സാധിക്കും.