കൊച്ചി: വളർന്നു വരുന്ന സംരംഭകർക്ക് ദിശാബോധവും വിദഗ്ധോപാദേശവും നൽകുന്നതിനായി ഇൻഫോപാർക്കിലെ സാമൂഹ്യ-സാംസ്ക്കാരിക കൂട്ടായ്മയായ പ്രോഗ്രസീവ് ടെക്കീസ് ദി ഡയലോഗ് എന്ന മാസിക പ്രഭാഷണ പരമ്പര ആരംഭിച്ചു. ഇൻഫോപാർക്ക് സിഇഒ സുശാന്ത് കുറുന്തിൽ പ്രഭാഷണ പരമ്പര ഉദ്ഘാടനം ചെയ്തു. കഴിഞ്ഞ ഒന്നര പതിറ്റാണ്ടായി നവസംരംഭകർക്ക് സുരക്ഷിതമായ പാതയൊരുക്കിയ സംസ്ഥാനമാണ് കേരളമെന്ന് അദ്ദേഹം അഭിപ്രായപ്പെട്ടു.

ഫ്രം ഐഡിയ ടു മിനിമം വയബിൾ പ്രൊഡക്ട്- ഹൗ ഫൗണ്ടേഴ്സ് ക്യാൻ ബിൽഡ്, പിച്ച് ആൻഡ് സ്കെയിൽ എന്നതായിരുന്നു പരമ്പരയിലെ ഉദ്ഘാടന പ്രഭാഷണ വിഷയം. വ്യവസായ നേതൃനിര, നിക്ഷേപകർ, കേരള സ്റ്റാർട്ടപ്പ് മിഷൻ ഉദ്യോഗസ്ഥർ തുടങ്ങിയവരെ ഒന്നിച്ചു കൊണ്ടുവരാനും ഇതിലൂടെ ഉദ്ദേശിക്കുന്നുണ്ട്.

കഴിഞ്ഞ 10-15 വർഷത്തിനിടയിൽ ആശയരൂപീകരണം, മാതൃക, ഉത്പന്ന വികസനം, വിപണി പ്രവേശനം, നിക്ഷേപ അവസരങ്ങൾ തുടങ്ങി സംരംഭകർക്ക് സമഗ്ര പിന്തുണ കേരളം നൽകി വരുന്നുണ്ടെന്ന് അദ്ദേഹം പറഞ്ഞു. സർക്കാർ ഏജൻസികൾ, സാങ്കേതിക പങ്കാളികൾ, ജിടെക്, പ്രോഗ്രസീവ് ടെക്കീസ് പോലുള്ള സാമൂഹ്യ കൂട്ടായ്മകൾ എന്നിവയുടെ കൂട്ടായ പരിശ്രമം ഈ മുന്നേറ്റത്തെ സഹായിച്ചിട്ടുണ്ട്.

സംരംഭകർ സുരക്ഷിതമായ ജോലികൾ ഉപേക്ഷിക്കുന്നതിനെക്കുറിച്ചോർത്ത് ഇന്ന് ഭയപ്പെടുന്നില്ലെന്ന് മാധ്യമപ്രവർത്തനത്തിൽ നിന്നും ടെക് സംരംഭത്തിലേക്കെത്തിയ ഡെൻസിൽ ആന്റണിയുടെ ഉദാഹരണം അദ്ദേഹം ചൂണ്ടിക്കാട്ടി. നിരന്തരമായ നവീകരണത്തിലൂടെയും ഉറച്ച കാൽവയ്പുകളിലൂടെയും സംസ്ഥാനത്തെ സ്റ്റാർട്ടപ്പ് ആവാസവ്യവസ്ഥയെ അടുത്ത തലത്തിലേക്ക് എത്തിക്കണം. ഈ ദിശയിൽ കെഎസ് യുഎം നടത്തുന്ന പ്രവർത്തനങ്ങളെ അദ്ദേഹം പ്രകീർത്തിച്ചു.

കെഎസ്യുഎം പ്രോജക്ട് ഡയറക്ടർ ലെഫ്. കമാൻഡർ(റിട്ട.) സജിത് കുമാർ ഇ വി, പ്രോഗ്രാംസ് ആൻഡ് കമ്മ്യൂണിക്കേഷൻ ലീഡ് നാസിഫ് എൻഎം എന്നിവരും സംസാരിച്ചു.

ആദ്യ ദിവസം രണ്ട് പാനൽ ചർച്ചകളാണ് നടന്നത്. അൺലോക്കിംഗ് ഒൺട്രപ്രണേറിയൽ പൊട്ടൻഷ്യൽ എന്ന വിഷയത്തിൽ പ്രമുഖ ഐടി കമ്പനി സ്ഥാപകരായ സുജാസ് അലി (ആബാ സോഫ്റ്റ്), ജിലു ജോസഫ്(സിഇഒ വെബ് ആൻഡ് ക്രാഫ്റ്റ്സ്), റമീസ് അലി(ഇന്റർവെൽ ലേണിംഗ്) ഡെൻസിൽ ആന്റണി(എക്സ് ആർ ഹൊറൈസൺ) തുടങ്ങിയവർ പങ്കെടുത്തു.

കേരളത്തിലെ സ്റ്റാർട്ടപ്പ് നിക്ഷേപ സാഹചര്യത്തെക്കുറിച്ചുള്ള രണ്ടാമത്തെ സെഷനിൽ ജെയിൻ ഡീംഡ് ടു ബി സർവകലാശാല ഡയറക്ടർ ടോം എം ജോസഫ്, മൈ കെയർ സ്ഥാപകൻ സെനു സാം, ലെഫ്. കമാൻഡർ (റിട്ട.) സജിത് കുമാർ തുടങ്ങിയവർ പങ്കെടുത്തു. പ്രോഗ്രസീവ് ടെക്കീസ് യൂണിറ്റ് സെക്രട്ടറി ഷിയാസ് വി പി സ്വാഗതവും സംസ്ഥാന പ്രസിഡൻറ് അനീഷ് പന്തലാനി നന്ദിയും അറിയിച്ചു.