• ഹഡിൽ ഗ്ലോബൽ 2025-ൽ മികച്ച അഞ്ച് ഏജൻറിക് എഐ സൊല്യൂഷനുകൾക്ക് കേരള സ്റ്റാർട്ടപ്പ് മിഷൻ 25 ലക്ഷം രൂപ വീതം പ്രഖ്യാപിച്ചു

തിരുവനന്തപുരം: കേരളത്തിലെ ഐടി ജീവനക്കാരുടെ ക്ഷേമ സംഘടനയായ പ്രതിധ്വനി കരിയർ അധിഷ്ഠിത പരിശീലന സ്ഥാപനമായ ടെക്ബൈഹാർട്ടുമായി സഹകരിച്ച് ടെക്നോപാർക്കിൽ ഏജൻറിക് എഐയെക്കുറിച്ച് ഏകദിന ശിൽപ്പശാല സംഘടിപ്പിച്ചു.

ടെക്നോപാർക്കിലെ ട്രാവൻകൂർ ഹാളിൽ നടന്ന വർക്ക് ഷോപ്പ് കേരള സ്റ്റാർട്ടപ്പ് മിഷൻ സിഇഒ അനൂപ് അംബിക ഉദ്ഘാടനം ചെയ്തു. ടെക്ബൈഹാർട്ട് എഐ ഡയറക്ടർ ഡോ. അനീസ് മുഹമ്മദും പരിപാടിയിൽ പങ്കെടുത്തു.

സീനിയർ എഐ ഡെവലപ്പർമാരായ ടിറ്റു എ, അലക്സ് വി അജിത് എന്നിവരുടെ നേതൃത്വത്തിൽ അത്യാധുനിക എഐ ആപ്ലിക്കേഷനുകൾ, പ്രായോഗിക സാങ്കേതിക വിദ്യകൾ, വ്യവസായവുമായി ബന്ധപ്പെട്ട കേസ് സ്റ്റഡികൾ എന്നിവയെക്കുറിച്ച് ശിൽപ്പശാല ചർച്ചചെയ്തു.

ഡിസംബർ 12 മുതൽ 14 വരെ കോവളത്ത് നടക്കുന്ന ഹഡിൽ ഗ്ലോബലിൽ 'ഹാക്ക് 2025 ഇമാജിൻ' എന്ന് പേരിട്ടിരിക്കുന്ന പാൻ-ഇന്ത്യൻ ഹാക്കത്തോണിൽ അഞ്ച് ഏജൻറിക് എഐ സൊല്യൂഷനുകൾക്ക് അവരുടെ ആശയം വികസിപ്പിക്കുന്നതിനായി 25 ലക്ഷം രൂപ വീതം ഗ്രാൻറ് നൽകുമെന്ന് അനൂപ് അംബിക ഉദ്ഘാടന പ്രസംഗത്തിൽ പ്രഖ്യാപിച്ചു.

പ്രശ്നം മനസ്സിലാക്കുക, വ്യക്തമായ ആശയം സൃഷ്ടിക്കുക, അത് നടപ്പിലാക്കുക എന്നിവയാണ് ഏജൻറിക് എഐയുടെ മൂന്ന് പ്രധാന പ്രവർത്തനങ്ങളെന്ന് ഡോ. അനീസ് മുഹമ്മദ് പറഞ്ഞു. അതിനായി മോഡൽ കോൺടെക്സ്റ്റ് പ്രോട്ടോക്കോൾ (എംസിപി), ഏജൻറ്-ടു-ഏജൻറ് (എ2എ) എന്നിവ ഉപയോഗിക്കുന്നുവെന്നും അദ്ദേഹം വ്യക്തമാക്കി.

പ്രതിധ്വനി ടെക്നിക്കൽ ഫോറം കൺവീനർ രാഹുൽ ചന്ദ്രൻ, പ്രതിധ്വനി പ്രസിഡൻറ് വിഷ്ണു രാജേന്ദ്രൻ, ടെക്നോപാർക്കിലെ 40-ഓളം കമ്പനികളിൽനിന്നുള്ള 200-ഓളം ജീവനക്കാർ തുടങ്ങിയവരും പങ്കെടുത്തു.

ലക്ഷ്യങ്ങൾ പിന്തുടരാനും തീരുമാനങ്ങൾ എടുക്കാനും ലോകവുമായി സംവദിക്കാനുമാകുന്ന പരിവർത്തനാത്മക എഐ സിസ്റ്റമായ ഏജൻറിക് എഐയെക്കുറിച്ച് പ്രായോഗിക അനുഭവം വർക്ക് ഷോപ്പ് നൽകി. തത്സമയ ഹാൻഡ്സ്-ഓൺ പ്രവർത്തനങ്ങളും ഡെമോകളും ഉൾക്കൊള്ളുന്ന ഏകദിന പ്രായോഗിക സെഷനായിരുന്നു വർക്ക് ഷോപ്പിൻറെ പ്രധാന സവിശേഷത. ഐടി സമൂഹത്തിലെ സഹ പ്രൊഫഷണലുകളുമായി ബന്ധപ്പെടാനും എഐയുടെ വിവിധ പ്രൊഫഷണൽ ആപ്ലിക്കേഷനുകൾ മനസ്സിലാക്കാനും പങ്കെടുത്തവർക്ക് പരിപാടി സഹായകമായി.

സഹ-സംഘാടകരായ ടെക്ബൈഹാർട്ട് ട്രിവാൻഡ്രം എഡബ്ല്യുഎസ്, എഐ, എംഎൽ, സൈബർ സുരക്ഷ, എത്തിക്കൽ ഹാക്കിംഗ് തുടങ്ങിയ മേഖലകളിൽ കരിയർ അധിഷ്ഠിത പരിശീലനം വാഗ്ദാനം ചെയ്യുന്ന പ്രമുഖ സ്ഥാപനമാണ്.