• വിറ്റുവരവിൽ 6.44 ശതമാനം വർധന
• പാൽ സംഭരണത്തിൽ 12.89 ശതമാനവും പാൽ വിപണനത്തിൽ 4.30 ശതമാനവും വർധനവ്

തിരുവനന്തപുരം: പാൽ സംഭരണത്തിലും വിപണനത്തിലും മൂല്യവർധിത ഉൽപന്നങ്ങളുടെ വിപണനത്തിലും നേട്ടമുണ്ടാക്കി മിൽമ കഴിഞ്ഞ സാമ്പത്തിക വർഷം ആകെ 4624.21 കോടി രൂപ വിറ്റുവരവ് നേടി. 2024-25 ൽ ഇത് 4344.60 കോടി രൂപയായിരുന്നു. 6.44 ശതമാനത്തിൻറെ വർധനവാണ് രേഖപ്പെടുത്തിയത്.

പാൽ സംഭരണത്തിൽ 12.89 ശതമാനത്തിൻറെയും പാൽ വിപണനത്തിൽ 4.30 ശതമാനത്തിൻറെയും വർധനവുണ്ടാക്കാൻ മിൽമയ്ക്കായി. 2025-26 സാമ്പത്തിക വർഷത്തിൽ പ്രതിദിനം 12,56,892 ലിറ്റർ പാലാണ് മിൽമ സംഭരിച്ചത്. 2024-25 ൽ ഇത് 11,13,413 ലിറ്റർ ആയിരുന്നു. 1,43,479 ലിറ്ററിൻറെ വർധനവാണുള്ളത്. കഴിഞ്ഞ സാമ്പത്തിക വർഷം പ്രതിദിനം 17,06,350 ലിറ്റർ പാലാണ് മിൽമ വിറ്റത്. 2024-25 ൽ 16,36,047 ലിറ്റർ ആയിരുന്നു വിപണനം. 70,303 ലിറ്റർ പാലാണ് അധികമായി വിൽക്കാനായത്.

മൂല്യവർധിത ഉൽപ്പന്നങ്ങളുടെ വിൽപ്പനയിലും മികച്ച വിറ്റുവരവ് നേടാൻ മിൽമയ്ക്കായി. 1097.36 കോടി രൂപയാണ് കഴിഞ്ഞ സാമ്പത്തിക വർഷത്തെ ആകെ വിറ്റുവരവ്. 2024-25 ൽ ഇത് 946.47 കോടിയായിരുന്നു. 15.94 ശതമാനത്തിൻറെ വർധനവാണുള്ളത്.

2030 ഓടെ 10000 കോടി രൂപയുടെ വിറ്റുവരവാണ് മിൽമ ലക്ഷ്യമിടുന്നതെന്ന് മിൽമ ചെയർമാൻ കെ.എസ് മണി പറഞ്ഞു. 2025-26 സാമ്പത്തിക വർഷത്തെ പ്രകടനം കണക്കിലെടുക്കുമ്പോൾ മികച്ച നേട്ടമാണ് മിൽമ കൈവരിച്ചത്. കർഷക കേന്ദ്രീകൃത ക്ഷേമ പദ്ധതികളിലൂടെയും ഉൽപാദനവും ഗുണനിലവാരവും മെച്ചപ്പെടുത്താനുള്ള പരിപാടികളിലൂടെയുമാണ് മിൽമയ്ക്ക് ഈ നേട്ടത്തിൽ എത്താനായത്. ക്ഷീരമേഖലയിലെ ഉയർന്ന ഉത്പാദന ചെലവും രാജ്യത്തിനകത്തു നിന്നും പുറത്തുനിന്നുമുള്ള കടുത്ത മത്സരവും ഉൾപ്പെടെയുള്ള വെല്ലുവിളികൾ നേരിട്ടിട്ടും ഈ നേട്ടം കൈവരിക്കാനായത് ശ്രദ്ധേയമാണ്. ഇതിനു പിന്നിലെ പ്രധാന കരുത്ത് ക്ഷീരകർഷരാണ്. മിൽമയുടെ ക്ഷേമ പദ്ധതികൾ പാൽ സംഭരണത്തിലെയും വിൽപ്പനയിലെയും മികവ് നിലനിർത്തുന്നതിൽ ഗണ്യമായ സംഭാവന നൽകിയിട്ടുണ്ട്. സുസ്ഥിരവും എല്ലാവരെയും ഉൾക്കൊള്ളുന്നതുമായ വളർച്ച കൈവരിക്കാനാണ് ക്ഷീരമേഖല ലക്ഷ്യമിടുന്നതെന്നും അദ്ദേഹം കൂട്ടിച്ചേർത്തു.

2025-26 സാമ്പത്തിക വർഷത്തിൽ തിരുവനന്തപുരം മേഖല യൂണിയൻറെ (ടിആർസിഎംപിയു) ആകെ വിറ്റുവരവിൽ 6.87 ശതമാനം വർധനവാണ് രേഖപ്പെടുത്തിയത്. എറണാകുളം മേഖല (ഇആർസിഎംപിയു) 5.91 ശതമാനവും മലബാർ മേഖല (എംആർസിഎംപിയു) 8.88 ശതമാനവും വർധനവ് നേടി.

2025-26 ൽ ടിആർസിഎംപിയു പ്രതിദിനം 2,80,039 ലിറ്റർ പാൽ സംഭരിച്ചു. ഇആർസിഎംപിയു 2,93,351 ലിറ്ററും എംആർസിഎംപിയു 6,83,503 ലിറ്ററുമാണ് സംഭരിച്ചത്. 2024-25 ലെ പ്രതിദിന പാൽ സംഭരണം യഥാക്രമം 2,46,620 ലിറ്റർ, 2,51,257 ലിറ്റർ, 6,15,535 ലിറ്റർ എന്നിങ്ങനെയായിരുന്നു.

കഴിഞ്ഞ സാമ്പത്തിക വർഷം ടിആർസിഎംപിയുവിൻറെ പ്രതിദിന പാൽവിപണനം 5,73,645 ലിറ്റർ ആയിരുന്നു. ഇആർസിഎംപിയു 4,49,589 ലിറ്ററും എംആർസിഎംപിയു 6,83,117 ലിറ്ററും പാൽ വിറ്റു. 2024-25 ൽ ടിആർസിഎംപിയു-5,53,912, ഇആർസിഎംപിയു-4,33,902, എംആർസിഎംപിയു-6,48,233 എന്നിങ്ങനെയായിരുന്നു പ്രതിദിന വിപണനം.

ഉൽപ്പന്നങ്ങളുടെ വിൽപ്പനയിൽ ടിആർസിഎംപിയു 2025-26 ൽ 18 ശതമാനവും, ഇആർസിഎംപിയു 13.75 ശതമാനവും, എംആർസിഎംപിയു 16.50 ശതമാനവും വർധനവ് നേടി.