കൊച്ചി: കൊച്ചി-മുസിരിസ് ബിനാലെയുടെ ആറാം പതിപ്പിനോടനുബന്ധിച്ച് കലാകാരന്മാർ, കലാ അധ്യാപകർ, കലാസ്വാദകർ തുടങ്ങിയവരുടെ സർഗാത്മകത വളർത്തുന്ന 'കല നില' പരിപാടിയ്ക്ക് സംസ്ഥാനമൊട്ടാകെ മികച്ച പ്രതികരണം. കൊച്ചി ബിനാലെ ഫൗണ്ടേഷന്റെ (കെബിഎഫ്) കീഴിലുള്ള ആർട്ട് ബൈ ചിൽഡ്രൻ (എബിസി) ആണ് 'കല നില' യ്ക്ക് പിന്നിൽ. കെബിഎഫിന്റെ പ്രധാന സംരംഭങ്ങളിലൊന്നാണ് എബിസി പ്രോഗ്രാം.

ഇത്തവണത്തെ ബിനാലെയുടെ ഭാഗമായി ആരംഭിച്ച ആർട്ട് റൂം-പെഡഗോഗിയും 'കല നില' പരിപാടിയും സർഗാത്മകത വളർത്താൻ ലക്ഷ്യമിട്ടുള്ളതാണ്. ശില്പശാലകളിലൂടെയും സംഭാഷണങ്ങളിലൂടെയുമാണ് 'കല നില' മുന്നോട്ട് പോകുന്നത്. ഡിസംബർ 12 ന് ആരംഭിക്കുന്ന ബിനാലെയ്ക്ക് മുന്നോടിയായി സംസ്ഥാനത്തുടനീളം കെബിഎഫ് നാല് ശില്പശാലകളും ഔട്ട്റീച്ച് പരിപാടികളും സംഘടിപ്പിച്ചിരുന്നു.

എബിസിയുടെ ഭാഗമായി തെരഞ്ഞെടുത്ത സ്കൂളുകളിൽ കുട്ടികൾക്കും കലാപ്രേമികൾക്കും വിവിധ കലാ രീതികളിൽ ഇടപഴകുന്നതിനുള്ള പദ്ധതിയാണ് ആർട്ട് റൂം. സ്ഥാപനങ്ങൾക്കും അക്കാദമിക് മേഖലകൾക്കും അപ്പുറം കലയ്ക്ക് പ്രാധാന്യം കൊടുത്തുകൊണ്ട് 2020 ൽ വിഭാവനം ചെയ്ത കലാ അധ്യാപകർക്കുള്ള ശില്പശാലയുടെ തുടർച്ചയാണ് കലാനില. സർഗ്ഗാത്മകത പ്രോത്സാഹിപ്പിക്കുന്നതിനൊപ്പം കലാകാരന്മാരെയും, അധ്യാപകരെയും, കലാതത്പരരെയും ഒരുമിച്ച് കൊണ്ടുവരാൻ ഇതിലൂടെ സാധിക്കും.

എല്ലാവരെയും ഉൾക്കൊള്ളുന്ന പഠന ഇടങ്ങളെ 'കല നില' പ്രോത്സാഹിപ്പിക്കുന്നതായി എബിസി പ്രോഗ്രാം ഹെഡ് ബ്ലെയ്സ് ജോസഫ് പറഞ്ഞു. വളർന്നു കൊണ്ടിരിക്കുന്ന ഒരു വലിയ വിജ്ഞാന വേദിയുടെ തുടക്കമാണ് 'കല നില'. 'നീതി, സ്വാതന്ത്ര്യം, സമത്വം, സാഹോദര്യം തുടങ്ങിയ ഭരണഘടനാ മൂല്യങ്ങൾ ഉയർത്തിപ്പിടിക്കുന്നതിന് ഇത് വഴിയൊരുക്കും. മത്സരബുദ്ധിയില്ലാതെയും പരസ്പരം വിധിയ്ക്കാതെയുമുള്ള ഇടങ്ങൾ സൃഷ്ടിക്കാനും ഇതിലൂടെ സാധിക്കും.

'കല നില' യുടെ ഭാഗമായി തിരുവനന്തപുരം, ആലുവ, പാലക്കാട്, കാലടി എന്നിവിടങ്ങളിലാണ് മുൻപ് ശില്പശാലകൾ നടന്നത്. ദൃശ്യ, നാടക കലാകാരന്മാർ, നർത്തകർ, മനഃശാസ്ത്രജ്ഞർ, വിദ്യാർത്ഥികൾ, ഗവേഷകർ, സാമൂഹ്യശാസ്ത്രജ്ഞർ തുടങ്ങിയവർ മുൻപരിപാടികളിൽ പങ്കെടുത്തു. ഇതിൽ മറ്റ് സംസ്ഥാനങ്ങളിൽ നിന്നുള്ള കലാധ്യാപകരും ആസ്വാദകരുമുണ്ടായിരുന്നു. എബിസി പ്രോഗ്രാം ഇന്റേണുകൾ ഉൾപ്പെടെ 70 കലാകാരന്മാരുടെ ഒരു ശൃംഖല സൃഷ്ടിക്കാൻ ഇത് സഹായിച്ചിട്ടുണ്ടെന്നും അദ്ദേഹം കൂട്ടിച്ചേർത്തു.

'കല നില' യുടെ ഭാഗമായി ഗെയിംസ്, ഗ്രൂപ്പ് പ്രവർത്തനങ്ങൾ, ചർച്ചകൾ, ഡോക്യുമെന്ററി പ്രദർശനങ്ങൾ, കലാ പ്രദർശനം, 'സാങ്കൽപ്പിക നടത്തം', 'ബോഡി മാപ്പിംഗ്' എന്നിവയിലൂടെ സൃഷ്ടിപരമായ സർഗാത്മകത വളർത്തുന്നു. ഓർമ്മകളെയും അനുഭവങ്ങളെയും ഉണർത്തുന്നതിനൊപ്പം വാക്കുകൾ, വികാരങ്ങൾ, ഇമേജറി എന്നിവയിലൂടെ അവ പ്രകടിപ്പിക്കാനും ഇതിലൂടെ സാധിക്കും.

'കല നില' ശില്പശാലകളിൽ പങ്കെടുക്കുന്നവർക്ക് സ്വന്തം ദുർബലതകളും ശക്തികളും തിരിച്ചറിയാൻ അവസരം ലഭിക്കുമെന്ന് എബിസിയിലെ അസോസിയേറ്റായ നീതു കെ.എസ്. പറഞ്ഞു. സൃഷ്ടിപരമായ ആവിഷ്കാര സ്വാതന്ത്ര്യത്തിനുള്ള അവസരത്തിനൊപ്പം പഠിക്കുന്നതിനും പഠിക്കാതിരിക്കുന്നതിനും നിലവിലുള്ള അവസ്ഥയെ ചോദ്യം ചെയ്യുന്നതിനും പരമ്പരാഗത ചട്ടക്കൂടുകൾക്കപ്പുറം ചിന്തിക്കുന്നതിനുമുള്ള ഇടമാണിതെന്നും അവർ കൂട്ടിച്ചേർത്തു.

കൊച്ചി-മുസിരിസ് ബിനാലെയുടെ ആറാമത് പതിപ്പ് ഡിസംബർ 12 ന് ആരംഭിക്കും. 20 രാജ്യങ്ങളിൽ നിന്നുള്ള 66 കലാകാരന്മാരും കൂട്ടായ്മകളുമടങ്ങുന്ന സംഘമാണ് പ്രദർശനങ്ങളും പ്രതിഷ്ഠാപനങ്ങളും ഒരുക്കുന്നത്. ഫോർ ദി ടൈം ബീയിംഗ് എന്നതാണ് ആറാം ലക്കത്തിന്റെ പ്രമേയം. ഗോവ ആസ്ഥാനമായുള്ള കലാകാരൻമാരുടെ നേതൃത്വത്തിലുള്ള സംഘടനയായ എച്ച്.എച്ച് ആർട്ട് സ്പെയ്സസുമായി ചേർന്ന് ആർട്ടിസ്റ്റ് നിഖിൽ ചോപ്രയാണ് ബിനാലെ ക്യൂറേറ്റ് ചെയ്യുന്നത്. 110 ദിവസം നീണ്ടുനിൽക്കുന്ന ബിനാലെയ്ക്ക് 2026 മാർച്ച് 31 ന് തിരശ്ശീല വീഴും.