എന്താണ് അധ്യാപനത്തിന്റെ ഉദ്ദേശ്യം?ഈചോദ്യത്തിന്റെ യഥാർഥ ഉത്തരം മനസ്സിലാക്കുന്നയാളാണ് മികവുള്ള അധ്യാപകൻ എന്നുപറയാം. നല്ല വ്യക്തിത്വം, സംസ്കാരം, പെരുമാറ്റം, വൈകാരികസ്ഥിരത, സാമൂഹിക പ്രതിബദ്ധത, മൂല്യബോധം, ഉണർവ് എന്നിവയെല്ലാം അധ്യാപകനെ മികവുള്ളവനാക്കുന്നു.

കാര്യങ്ങളെക്കുറിച്ച് വ്യക്തമായ ധാരണയും ലക്ഷ്യബോധവുമുള്ളയാളാവണം അധ്യാപകൻ. എഡ്യൂക്കേഷൻ, ഇൻസ്പിറേഷൻ and ഗൈഡൻസ് എന്നിവയാണ് ഒരധ്യാപകന്റെ പ്രധാന മുഖമുദ്രകൾ. പുതിയ ആശയങ്ങൾ ഉൾക്കൊള്ളാനും അവ തന്റെ കുട്ടികൾക്ക് അനുയോജ്യമായ രീതിയിൽ കുട്ടികളുടെ മുമ്പിൽ അവതരിപ്പിക്കാൻ അധ്യാപകന് കഴിയണം. അധ്യാപനത്തിന്റെ നൂതന ആശയങ്ങൾ സ്വാംശീകരിച്ച് പുതിയ സാങ്കേതികതയുടെ സഹായത്തോടെ പഠിപ്പിക്കാൻ അധ്യാപകന് കഴിയണം.

വ്യക്തമായ ഉദ്ദേശ്യത്തോടുകൂടിയ സെൻസ് അധ്യാപകന് ഉണ്ടാകണം. ശരിയെ ശരിയെന്നും തെറ്റിനെ തെറ്റെന്നും വ്യവച്ഛേദിക്കാൻ അധ്യാപകന് കഴിയണം. ആരെയാണ് താൻ പഠിപ്പിക്കേണ്ടത്, തന്റെ കുട്ടികൾ ഏതു തരത്തിലുള്ളവരാണ് തുടങ്ങിയ കാര്യങ്ങൾ അധ്യാപകർ തിരിച്ചറിയേണ്ടതുണ്ട്.

അധ്യാപകൻ തന്നോടു തന്നെ ചോദിക്കേണ്ട ഒരു പ്രധാന ചോദ്യമാണ് താൻ കുട്ടികളെ എന്താണ് പഠിപ്പിക്കേണ്ടത് എന്നത്. ഈ ചോദ്യത്തിന് ഉത്തരം കണ്ടെത്താനാണ് അധ്യാപകൻ കൂടുതൽ സമയം ചെലവഴിക്കേണ്ടത്. ക്ലാസിലെത്തുന്നതിനു മുമ്പ്താൻ ഇന്ന് എന്തു പഠിപ്പിക്കും എന്ന് തീരുമാനിക്കുകയും അതിനു വേണ്ട സാമഗ്രികൾ തയാറാക്കി ക്ലാസിലെത്തുകയുമാണ് ആദ്യം വേണ്ടത്. താൻ പഠിപ്പിക്കാൻ ഉദ്ദേശിക്കുന്ന പാഠഭാഗത്തെക്കുറിച്ച് വ്യക്തമായ ധാരണയുള്ള അധ്യാപകനു മാത്രമേ ആ പാഠഭാഗം വ്യക്തമായി ക്ലാസിൽ അവതരിപ്പിക്കാനാകൂ. താൻ എന്തു പഠിപ്പിക്കണം, എങ്ങനെ ക്ലാസ് നയിക്കണം, എന്തൊക്കെ ചോദ്യങ്ങളാണ് കുട്ടികളോട് ചോദിക്കേണ്ടത്, ഇതിനൊക്കെയായി എന്തൊക്കെ സാമഗ്രികൾ ഒരുക്കണം, ആരുടെയെല്ലാം സഹായം ആവശ്യമാണ് തുടങ്ങിയവ ഓരോ ദിവസവും നടത്തേണ്ട തയാറെടുപ്പുകളാണ്. അത് കൃത്യമായി നിർവഹിക്കുന്ന അധ്യാപകർക്ക് ക്ലാസിൽ കുട്ടികളുടെ മുന്നിൽ പാഠഭാഗങ്ങൾ നല്ല രീതിയിൽ അവതരിപ്പിക്കാൻ കഴിയുമെന്നതിൽ സംശയം വേണ്ട.

• അധ്യാപകന് ശുഭാപ്തി വിശ്വാസവും പോസിറ്റിവ്മനോഭാവവും ഉണ്ടാകണം. പ്രത്യേകിച്ച് തന്റെ കുട്ടികളോടും സഹപ്രവർത്തകരോടും മാന്യമായി പെരുമാറാൻ അധ്യാപകന് കഴിയണം.
• രക്ഷിതാക്കളുമായി നല്ല ബന്ധം പുലർത്താൻ കഴിയുന്ന വ്യക്തിയാവണം അധ്യാപകൻ. മാറിവരുന്ന പഠന-പാഠ്യരീതികൾ ഉൾക്കൊള്ളാൻ അധ്യാപകൻ സന്നദ്ധനാകണം. എല്ലാ കുട്ടികളെയും ജയിപ്പിക്കുക എന്നതല്ല അധ്യാപകന്റെ കഴിവ് എല്ലാ കുട്ടികളെയും നല്ല ഗ്രേഡിലും ഗുണനിലവാരത്തിലും എത്തിക്കുക എന്നതാകണം.
• കുട്ടികളുടെ ആവശ്യങ്ങളറിഞ്ഞ് അവരെ നയിക്കുക എന്നതാണ് അധ്യാപകന്റെ മറ്റൊരു കർത്തവ്യം. പ്രത്യേക പരിഗണന അർഹിക്കുന്ന കുട്ടികൾ ക്ലാസിലുണ്ടെങ്കിൽ അവരോട് ഇടപെടാൻ അധ്യാപകൻ സന്നദ്ധനായിരിക്കണം. നർമത്തിന്റെ ഭാഷയാണ് അധ്യാപകന് അനുയോജ്യം.
• ക്ലാസിനെക്കുറിച്ചും തന്റെ വിഷയത്തെക്കുറിച്ചും വ്യക്തമായ ആസൂത്രണമുള്ള വ്യക്തിയായിരിക്കണം അധ്യാപകൻ. പ്രതിബന്ധങ്ങളെ തട്ടിമാറ്റി മുന്നേറാൻ കഴിയുന്ന വ്യക്തിയായിരിക്കണം അധ്യാപകൻ. തന്റെ വിഷയത്തിലുള്ള പാണ്ഡിത്യമാണ് അധ്യാപകന്റെ അനിവാര്യത. അത്തരക്കാർക്ക് അത് കുട്ടികൾക്ക് വേണ്ടരീതിയിൽ പകർന്നുനൽകാൻ ബുദ്ധിമുട്ടുണ്ടാകില്ല.
• അധ്യാപകൻ എന്നും ഒരു വിദ്യാർഥിയാകണം. അധ്യാപകനു അവശ്യം വേണ്ട കഴിവാണ് റിഫ്ളക്ഷൻ (പുനരാലോചന/പുനർചിന്തനം). അധ്യാപനം ഫലപ്രദവും പൂർണവുമാകണമെങ്കിൽ ഉണ്ടാകേണ്ട പ്രധാന കഴിവാണ് പുനർചിന്തനം. ഇത് ഒരു പ്രതിഫലനം കൂടിയാണ്. തന്റെ ക്ലാസ്റൂം പ്രവർത്തനത്തിൽ എന്തെല്ലാം ശരിയായി, എവിടെയെങ്കിലും പാളിച്ചകളുണ്ടായോ, എന്തെല്ലാം മാറ്റങ്ങളാണ് അടുത്ത തവണ വരുത്തേണ്ടത് തുടങ്ങിയ കാര്യങ്ങൾ അധ്യാപകനിൽ ഉണർത്താൻ റിഫ്ലക്ഷന്കഴിയും. ഒരു ക്ലാസ് റൂം പ്രവർത്തനം പരാജയമായിരുന്നുവെങ്കിൽ, എന്തുകൊണ്ട് മറ്റൊരു രീതിയിൽ ആ പ്രവർത്തനം നൽകിക്കൂടാ, ചില കുട്ടികളിൽ ആ പ്രവർത്തനത്തിന്റെ ഫലം എത്തിയില്ലെങ്കിൽ അത് എത്തിക്കുന്നതിന് മറ്റെന്ത് സഹായമാണ് നൽകേണ്ടത് തുടങ്ങിയ കാര്യങ്ങളെക്കുറിച്ച് അധ്യാപകനെ ബോധവാനാക്കാനാണ് റിഫ്ളക്ഷൻ.
• ക്ലാസ്മുറിയിലെ പ്രവർത്തനങ്ങൾ ആനന്ദകരവും ആയാസരഹിതവുമാക്കാൻ ഹൈടെക് ക്ലാസുകൾക്ക് കഴിയും. അതിന് അധ്യാപകൻ തയാറെടുപ്പുകൾ നടത്തണം. ഉപകരണങ്ങൾ, അവയുടെ ഉപയോഗം, പ്രവർത്തനം എന്നിവ അറിയുകയാണ് ആദ്യം വേണ്ടത്. താൻ ക്ലാസിൽ കൈകാര്യംചെയ്യാൻ ഉദ്ദേശിക്കുന്ന പഠനപ്രവർത്തനത്തെ ലഘൂകരിക്കാനും കുട്ടികൾക്ക് അത് വേഗത്തിൽ ഹൃദ്യസ്ഥമാക്കാനും കഴിയുന്ന വിഡിയോകൾ, ഓഡിയോകൾ, സിനിമാശകലങ്ങൾ, ടെക്സ്റ്റുകൾ ഇവ കണ്ടെത്തി/തയാറാക്കി വെക്കണം. അവ അനുയോജ്യമായ സമയത്ത് ഉപയോഗിക്കുന്നതിനും പരിചയം ആവശ്യമാണ്.

ലോക്കൽ എക്കോണമി എന്ന ഈ ന്യൂസ് പോർട്ടൽ ജനങ്ങളെ ലോക്കൽ ടു ഗ്ലോബൽ എന്ന നിലയിൽ ഉയർത്തുക എന്നതാണ് ലക്ഷ്യമാക്കുന്നത്. ഈ പോർട്ടലിൽ രാവിലെ പോസിറ്റീവ് വാർത്തകൾ മാത്രമാണ് പോസ്റ്റ് ചെയ്യുന്നത്. രാവിലെ നെഗറ്റീവ് വാർത്ത കേൾക്കാതെ പോസിറ്റീവ് വാർത്തകൾ മാത്രം വായിക്കാൻ ആഗ്രഹിക്കുന്ന ആൾക്കാർ ഈ പോർട്ടൽ സബ്സ്ക്രൈബ് ചെയ്യുക, ഫോളോ ചെയ്യുക.

പഠനത്തിലും ജീവിതത്തിലും മുന്നേറാൻ ശ്രദ്ധിക്കേണ്ട കാര്യങ്ങൾ... Read More