രാജ്യത്താകമാനം ഏകദേശം 23 മില്യൺ രക്തം ഓരോ വർഷവും ഉപയോഗിക്കുന്നുണ്ട്. ലോകത്താകമാനം 80-130 മില്യൺ രക്തം വിവിധ രക്ത ബാങ്കുകളിലായി ശേഖരിക്കപ്പെടുന്നുണ്ട്. എങ്കിൽ പോലും രക്തബാങ്കുകളിൽ രക്തക്ഷാമം അനുഭവിക്കുന്നുണ്ട്.ഓരോ മൂന്ന് സെക്കന്റിലും രക്തത്തിന്റെ ആവശ്യം വരുന്നുണ്ട്. വിമാനാപകടം, പ്രകൃതിദുരന്തം പോലെയുള്ള സന്ദർഭങ്ങളിൽ ഒരേ സമയം കൂടിയ അളവിൽ രക്തം ആവശ്യമായി വരും. ഇത്തരം സന്ദർഭങ്ങളിൽ കൃത്യസമയത്ത് ആവശ്യാനുസരണം രക്തം ഉറപ്പുവരുത്താൻ രക്തബാങ്കിൽ രക്തം സൂക്ഷിച്ചിട്ടുണ്ടാവണം. ഒരു രക്തബാങ്കിൽ സൂക്ഷിക്കപ്പെടുന്ന രക്തം നിശ്ചിത കാലയളവിലേക്ക് മാത്രമേ സൂക്ഷിക്കാൻ സാധിക്കുകയുള്ളൂ. ഇത് തരണം ചെയ്യാൻ കൃത്യമായ ഇടവേളകളിൽ തുടർച്ചയായ രക്തദാനം നടക്കണം. ഇത് രണ്ടും സാധ്യമാവണമെങ്കിൽ സന്നദ്ധ രക്തദാനം പ്രോത്സാഹിപ്പിക്കണം.രക്തബാങ്കിൽ എല്ലാ മാസവും സന്നദ്ധരക്തദാനം സാധ്യമാക്കാനുള്ള പ്രവർത്തനങ്ങൾ നടന്നുവരുന്നു. എല്ലാ മാസവും ബോധവത്കരണ ക്ലാസുകളും നടത്തുന്നുണ്ട്.നിത്യേനയുണ്ടാകുന്ന അപകടങ്ങൾ, പ്രകൃതിദുരന്തങ്ങൾ, ശസ്ത്രക്രിയകൾ, രക്തസംബന്ധമായ അസുഖങ്ങൾ, പ്രസവത്തോടനുബന്ധിച്ചുണ്ടാകുന്ന ആവശ്യങ്ങൾ, കാൻസർ ചികിത്സ, പൊള്ളൽ, അനീമിയ, ഡയാലിസിസ് എന്നീ വിവിധ സന്ദർഭങ്ങളിൽ രക്തം ആവശ്യമായി വരും. അത്യാഹിത വിഭാഗത്തിന്റെ ജീവൻ രക്ഷാ പ്രവർത്തനങ്ങളിൽ ഒരവിഭാജ്യഘടകമാണ് രക്തം. മനുഷ്യരക്തത്തിന് പകരം വെക്കാൻ മറ്റൊന്നില്ല. അത് നിർമിക്കാനോ അധികനാൾ സൂക്ഷിച്ചുവെക്കാനോ കഴിയില്ല.

രക്തദാനത്തിന് വരുമ്പോൾ ശ്രദ്ധിക്കേണ്ട കാര്യങ്ങൾ

• രക്തദാനത്തിനു വരുമ്പോൾ ചുമ, പനി, മുറിവ് തുടങ്ങി യാതൊരു അണുബാധയും പാടില്ല.
• ആസ്ത്മ, അപസ്മാരം, ഹൃദ്രോഗം, വൃക്കരോഗം തുടങ്ങിയ രോഗമുള്ളവർക്ക് രക്തദാനം പാടില്ല.
• ശസ്ത്രക്രിയകൾ കഴിഞ്ഞാൽ ഒരു വർഷം കഴിഞ്ഞും രക്തദാനം നടത്താം.
• പച്ചകുത്തുകയോ രക്തം സ്വീകരിക്കുകയോ, പേ വിഷബാധയ്ക്ക് കുത്തിവെപ്പെടുക്കുകയോ ചെയ്താൽ ഒരു വർഷം കഴിഞ്ഞ് രക്തദാനം ചെയ്യാം.
• 18 വയസ്സായ ഏതൊരു വ്യക്തിക്കും തൊട്ടടുത്ത സർക്കാർ അംഗീകൃത രക്തബാങ്കിൽ എത്തി രക്തദാനം നൽകാം. പതിനെട്ടു വയസ്സു പ്രായമുള്ള ഒരാൾക്ക് 65 വയസ്സുവരെ രക്തദാനം നടത്താം. ആദ്യത്തെ രക്തദാനം നടത്താനുള്ള ഉയർന്ന പ്രായപരിധി 60 വയസ്സാണ്.
• ജന്മദിനം, വിവാഹവാർഷികം തുടങ്ങിയ ദിനങ്ങളിൽ രക്തദാനം നടത്താം. അങ്ങനെ നമ്മുടെ സ്പെഷ്യൽ ദിനങ്ങളിൽ സത്കർമ്മത്തിൽ പങ്കാളിയാവാം. നമ്മൾ ഇന്ന് ചെയ്യുന്ന സത്പ്രവർത്തി നാളെ മറ്റൊരാൾക്ക് മാതൃകയാവുകയും ചെയ്യും.
• രക്തദാനത്തിനു വരുന്ന ആൾ പൂർണ ആരോഗ്യവാൻ അല്ലെങ്കിൽ ആരോഗ്യവതി ആയിരിക്കണം.
• തലേദിവസം നന്നായി ഉറങ്ങിയിരിക്കണം.
• 24 മണിക്കൂറിനുള്ളിൽ മദ്യപാനം പാടില്ല.
• രക്തദാനത്തിനു വരുമ്പോൾ ഭക്ഷണം കഴിച്ചിരിക്കണം.
• തലേദിവസം മദ്യപാനം പാടില്ല.
• ചുരുങ്ങിയത് 45 കിലോ ഭാരം ഉണ്ടായിരിക്കണം.
• ആരോഗ്യമുള്ള പുരുഷന് മൂന്നു മാസത്തിലൊരിക്കലും സ്ത്രീക്ക് നാലുമാസത്തിലൊരിക്കലും രക്തദാനം ചെയ്യാവുന്നതാണ്.
• സ്ത്രീകൾക്ക് ആർത്തവ സമയത്തും, ഗർഭിണിയായിരിക്കുമ്പോഴും, മുലയൂട്ടുമ്പോഴും രക്തദാനം പാടില്ല.
• അബോർഷൻ കഴിഞ്ഞ് 6 മാസത്തിനുശേഷം രക്തദാനം നടത്താം.

രക്തദാനത്തിന്റെ ഗുണങ്ങൾ

രക്തപരിശോധനയിലൂടെ മാരകരോഗങ്ങൾ ഇല്ലെന്ന് ഉറപ്പാക്കുന്നു. രക്തദാനത്തിലൂടെ ചുവന്ന രക്താണുക്കളുടെ അളവ് ക്രമീകരിക്കപ്പെടുന്നതിനാൽ കരൾ രോഗങ്ങളുടെ സാധ്യത കുറയുന്നു. പുതിയ രക്തകോശങ്ങൾ ഉത്പാദിപ്പിക്കപ്പെടുന്നതുകൊണ്ട് ശരീരവും മനസ്സും ഊർജ്ജസ്വലമാവുന്നു. രക്തദാനം വഴി ഒരേ സമയം നാലുപേരുടെ ജീവൻ രക്ഷിക്കാൻ കഴിയുന്നു. രക്തദാനത്തിന്റെ പ്രാഥമിക പരിശോധനയിലൂടെയും കൗൺസിലിങ്ങിലൂടെയും ഒരു മിനി ഹെൽത്ത് ചെക്കപ്പ് ആണ് ലഭിക്കുന്നത്. ദാനം നൽകിയ രക്തം എച്ച്.ഐ.വി., ഹെപ്പറ്റൈറ്റിസ് ബി, സി, സിഫിലിസ്, മലേറിയ എന്നീ ടെസ്റ്റുകൾക്ക് വിധേയമാക്കുന്നുമുണ്ട്.

ദന്തപാല: സോറിയാസിസ്, മുടി വളർച്ച, വേദന ശമിപ്പിക്കൽ എന്നിവയ്ക്കുള്ള ശക്തമായ ആയുർവേദ ഔഷധം... Read More

ഹെൽത്ത് ടിപ്സുകൾ ദിവസവും ലഭിക്കുവാൻ ഈ പോർട്ടൽ ഫോളോ ചെയ്യുക.