നമ്മുടെ ശരീരം ആരോഗ്യത്തോടെ പ്രവർത്തിക്കാൻ കാർബോഹൈഡ്രേറ്റ്, കൊഴുപ്പ്, വിറ്റാമിനുകൾ, ധാതുക്കൾ എന്നിവയ്ക്കൊപ്പം ആവശ്യമായ പ്രധാന പോഷകമാണ് പ്രോട്ടീൻ. ശരീരത്തിന്റെ വളർച്ചയ്ക്കും കേടുപാടുകൾ പരിഹരിക്കുന്നതിനും സഹായിക്കുന്നതിനാൽ പ്രോട്ടീനെ പലപ്പോഴും ശരീരത്തിന്റെ ''നിർമാണ സാമഗ്രി'' എന്ന് വിശേഷിപ്പിക്കാറുണ്ട്.

എന്താണ് പ്രോട്ടീൻ?

അമിനോ ആസിഡുകൾ എന്ന ചെറിയ ഘടകങ്ങൾ ചേർന്നാണ് പ്രോട്ടീൻ രൂപപ്പെടുന്നത്. ശരീരത്തിലെ ഓരോ കോശത്തിലും പ്രോട്ടീൻ അടങ്ങിയിട്ടുണ്ട്. ചില അമിനോ ആസിഡുകൾ ശരീരത്തിന് സ്വയം നിർമ്മിക്കാൻ കഴിയില്ല. അതിനാൽ അവ ഭക്ഷണത്തിലൂടെ ലഭിക്കണം.

• കുട്ടികളുടെ വളർച്ചയ്ക്കും മുതിർന്നവരുടെ ശരീരപരിപാലനത്തിനും പ്രോട്ടീൻ ആവശ്യമാണ്. പേശികൾ, ചർമ്മം തുടങ്ങിയ ശരീരകലകളിലെ പഴയതോ കേടുപറ്റിയതോ ആയ കോശങ്ങളെ പരിഹരിക്കാനും പുതിയ കോശങ്ങൾ നിർമ്മിക്കാനും ഇത് സഹായിക്കുന്നു. മുറിവ്, ശസ്ത്രക്രിയ, രോഗം എന്നിവയ്ക്ക് ശേഷമുള്ള വീണ്ടെടുക്കലിലും ആവശ്യത്തിന് പ്രോട്ടീൻ ലഭിക്കുന്നത് പ്രധാനമാണ്.
• പേശികളുടെ നിർമ്മാണത്തിലും പരിപാലനത്തിലും പ്രോട്ടീന് പ്രധാന പങ്കുണ്ട്. ആവശ്യമായ പ്രോട്ടീൻ ലഭിക്കാതിരുന്നാൽ ശരീരം പേശികളിലെ പ്രോട്ടീൻ ഉപയോഗിക്കാൻ തുടങ്ങാം. ഇത് ദീർഘകാലത്ത് പേശികളുടെ ശക്തി കുറയുന്നതിനും ശരീരം ദുർബലമാകുന്നതിനും കാരണമാകാം. വ്യായാമത്തോടൊപ്പം ആവശ്യത്തിന് പ്രോട്ടീൻ ഉൾപ്പെടുത്തുന്നത് പേശികളുടെ ആരോഗ്യത്തിന് സഹായകരമാണ്.
• രോഗാണുക്കളിൽനിന്ന് ശരീരത്തെ സംരക്ഷിക്കുന്ന ആന്റിബോഡികൾ ഒരുതരം പ്രോട്ടീനാണ്. ശരിയായ അളവിൽ പ്രോട്ടീൻ ലഭിക്കുന്നത് ശരീരത്തിന്റെ സ്വാഭാവിക പ്രതിരോധ സംവിധാനത്തിന്റെ പ്രവർത്തനത്തിന് സഹായിക്കുന്നു.
• ദഹനം ഉൾപ്പെടെ ശരീരത്തിനുള്ളിൽ നടക്കുന്ന നിരവധി രാസപ്രവർത്തനങ്ങൾക്ക് സഹായിക്കുന്ന എൻസൈമുകളിൽ പലതും പ്രോട്ടീനുകളാണ്. വളർച്ചയും ശരീരപ്രവർത്തനങ്ങളും നിയന്ത്രിക്കുന്ന ചില ഹോർമോണുകളും പ്രോട്ടീൻ ഘടനയുള്ളവയാണ്. അതിനാൽ ശരീരത്തിന്റെ വിവിധ അവയവങ്ങൾ തമ്മിലുള്ള ആശയവിനിമയത്തിലും പ്രവർത്തനനിയന്ത്രണത്തിലും പ്രോട്ടീൻ പ്രധാന പങ്കുവഹിക്കുന്നു.
• ICMR-National Institute of Nutrition നിർദേശപ്രകാരം, ആരോഗ്യമുള്ള ഇന്ത്യൻ മുതിർന്നവർക്ക് സാധാരണയായി ഒരു കിലോഗ്രാം ശരീരഭാരത്തിന് പ്രതിദിനം ഏകദേശം 0.83 ഗ്രാം പ്രോട്ടീൻ ആവശ്യമാണ്. അതായത് 60 കിലോഗ്രാം ഭാരമുള്ള ഒരാൾക്ക് ഏകദേശം 50 ഗ്രാം പ്രോട്ടീൻ ആവശ്യമായി വരാം. എന്നാൽ കുട്ടികൾ, ഗർഭിണികൾ, മുലയൂട്ടുന്ന അമ്മമാർ, വയോധികർ, കായികതാരങ്ങൾ, രോഗത്തിൽനിന്ന് സുഖം പ്രാപിക്കുന്നവർ എന്നിവരുടെ ആവശ്യം വ്യത്യസ്തമായിരിക്കും.

പ്രോട്ടീൻ ലഭിക്കുന്ന ഭക്ഷണങ്ങൾ 

മുട്ട, മത്സ്യം, കോഴിയിറച്ചി, പാൽ, തൈര്, പനീർ എന്നിവ നല്ല പ്രോട്ടീൻ സ്രോതസ്സുകളാണ്. പയർവർഗങ്ങൾ, കടല, ചെറുപയർ, പരിപ്പ്, സോയാബീൻ, ടോഫു, നിലക്കടല, അണ്ടിപ്പരിപ്പ്, വിവിധ വിത്തുകൾ എന്നിവയിലും പ്രോട്ടീൻ ലഭിക്കുന്നു. സസ്യാഹാരം കഴിക്കുന്നവർ ധാന്യങ്ങളും പയർവർഗങ്ങളും വൈവിധ്യത്തോടെ ഉൾപ്പെടുത്തുന്നത് പ്രോട്ടീന്റെ ഗുണനിലവാരം മെച്ചപ്പെടുത്താൻ സഹായിക്കും. 

ഓരോ പ്രധാന ഭക്ഷണത്തിലും ചെറിയൊരു പ്രോട്ടീൻ സ്രോതസ് ഉൾപ്പെടുത്താം. ഉദാഹരണത്തിന്:

• പുട്ടിനൊപ്പം കടലക്കറി
• ചോറിനൊപ്പം പരിപ്പും തൈരും
• ദോശയോടൊപ്പം സാമ്പാർ
• പ്രഭാതഭക്ഷണത്തിൽ മുട്ടയോ ചെറുപയറോ
• ഇടവേളയിൽ ഒരു പിടി നിലക്കടലയോ അണ്ടിപ്പരിപ്പോ.

ദീർഘകാലം ആവശ്യത്തിന് പ്രോട്ടീൻ ലഭിക്കാതിരുന്നാൽ പേശികളുടെ ബലക്കുറവ്, ശരീരദൗർബല്യം, രോഗമോ പരിക്കോ കഴിഞ്ഞുള്ള മന്ദഗതിയിലുള്ള വീണ്ടെടുക്കൽ തുടങ്ങിയ പ്രശ്‌നങ്ങൾ ഉണ്ടാകാം. എന്നാൽ ഈ ലക്ഷണങ്ങൾക്ക് മറ്റു കാരണങ്ങളും ഉണ്ടാകാം. അതിനാൽ തുടർച്ചയായ ദൗർബല്യമോ ഭാരം കുറയലോ അനുഭവപ്പെടുകയാണെങ്കിൽ ആരോഗ്യവിദഗ്ധന്റെ നിർദേശം തേടണം.

ആരോഗ്യത്തിന് കാടമുട്ട: ഗുണങ്ങളും ശ്രദ്ധിക്കേണ്ട കാര്യങ്ങളും... Read More

പ്രോട്ടീൻ ആവശ്യമാണ് എന്നതുകൊണ്ട് അമിതമായി കഴിക്കണം എന്നില്ല. സാധാരണ ആരോഗ്യമുള്ളവർക്ക് സമീകൃത ഭക്ഷണത്തിലൂടെ ആവശ്യമായ പ്രോട്ടീൻ ലഭിക്കാൻ സാധിക്കും. ICMR-NIN പ്രകാരം സാധാരണ ആരോഗ്യജീവിതത്തിന് പ്രോട്ടീൻ പൗഡറുകൾ അനിവാര്യമല്ല; ദീർഘകാലം നിയന്ത്രണമില്ലാതെ അമിതമായ പ്രോട്ടീൻ സപ്ലിമെന്റുകൾ ഉപയോഗിക്കുന്നത് ആരോഗ്യത്തെ ബാധിക്കാം. പ്രത്യേകിച്ച് വൃക്കയോ കരളോ സംബന്ധമായ രോഗമുള്ളവർ ഡോക്ടറുടെയോ ഡയറ്റീഷ്യന്റെയോ നിർദേശമില്ലാതെ ഉയർന്ന പ്രോട്ടീൻ ഡയറ്റ് പിന്തുടരരുത്.

ഹെൽത്ത് ടിപ്സുകൾ ദിവസവും ലഭിക്കുവാൻ ഈ പോർട്ടൽ ഫോളോ ചെയ്യുക.