കൊച്ചി: ടാറ്റ ഗ്രൂപ്പ് സംരംഭമായ വോൾട്ടാസ് ലിമിറ്റഡ് പുതിയ വെർട്ടിസ് എഐ സ്പ്ലിറ്റ് എയർ കണ്ടീഷണറുകൾ വിപണിയിലിറക്കി. ആധുനിക ഇന്ത്യൻ ഭവനങ്ങൾക്ക് അനുയോജ്യമായ രീതിയിൽ രൂപകൽപ്പന ചെയ്തിരിക്കുന്ന ഈ പുതിയ എസികൾ, കടുത്ത വേനൽക്കാലത്തും മികച്ച തണുപ്പും ഉയർന്ന ഊർജ്ജക്ഷമതയും ഉറപ്പുവരുത്തുന്നു. ഇതിലെ എഐ അഡാപ്റ്റീവ് കൂളിംഗ് സംവിധാനം, മുറിയിലെ അന്തരീക്ഷത്തിന് അനുസരിച്ച് തണുപ്പിൻറെ അളവ് സ്വയമേവ ക്രമീകരിക്കുകയും അമിതമായി തണുക്കുന്നത് തടയുകയും ചെയ്യും.

വോൾട്ടാസ് ഇൻറലിജൻസ് ആപ്പുമായി ബന്ധിപ്പിച്ചിട്ടുള്ള എഐ എനർജി മാനേജർ ആണ് വെർട്ടിസ് എഐ എസിയുടെ പ്രധാന സവിശേഷത. ഇത് ഉപഭോക്താക്കൾക്ക് തങ്ങളുടെ പ്രതിമാസ വൈദ്യുതി ഉപയോഗത്തിന് പരിധി നിശ്ചയിക്കാൻ അവസരം നൽകുന്നു. ഈ സംവിധാനം എസിയുടെ പ്രവർത്തനം തത്സമയം നിയന്ത്രിക്കുകയും ഊർജ്ജ ഉപയോഗം കാര്യക്ഷമമായി കുറച്ചുകൊണ്ട് മികച്ച തണുപ്പ് ലഭ്യമാക്കുകയും ചെയ്യും. കൂടാതെ, ഇതിലെ എഐ ജിയോഫെൻസിംഗ് സംവിധാനം ലൊക്കേഷൻ വിവരങ്ങൾ ഉപയോഗിച്ച് ഉപഭോക്താക്കൾ വീട്ടിലേക്ക് വരുന്നത് തിരിച്ചറിയുകയും അവർ എത്തുന്നതിന് മുൻപായി തന്നെ മുറി തണുപ്പിക്കാൻ ആരംഭിക്കുകയും ചെയ്യുന്നു. അതുപോലെ, മുറിയിൽ ആളില്ലാത്തപ്പോൾ ഊർജ്ജ ഉപഭോഗം കുറയ്ക്കാനും ഇതിലൂടെ സാധിക്കും.

പുതിയ വെർട്ടിസ് എഐ സീരീസിലെ വിവിധ മോഡലുകൾ ആകർഷകമായ വിലയിലാണ് കമ്പനി അവതരിപ്പിച്ചിരിക്കുന്നത്. 1 ടൺ 5 സ്റ്റാർ മോഡലിന് 64,990 രൂപയും, 1.5 ടൺ 5 സ്റ്റാർ മോഡലിന് 77,990 രൂപയുമാണ് പരമാവധി ചില്ലറ വില. ഇതിന് പുറമെ 3 സ്റ്റാർ മോഡലുകളും ലഭ്യമാണ്. 1 ടൺ 3 സ്റ്റാർ മോഡലിന് 57,990 രൂപയും 1.5 ടൺ 3 സ്റ്റാർ മോഡലിന് 66,990 രൂപയുമാണ് വില നിശ്ചയിച്ചിരിക്കുന്നത്.

ഇന്ത്യയിലുടനീളമുള്ള വോൾട്ടാസിൻറെ എല്ലാ അംഗീകൃത ഡീലർമാർ, റീട്ടെയിൽ സ്റ്റോറുകൾ, പ്രമുഖ കൺസ്യൂമർ ഇലക്ട്രോണിക്സ് ഔട്ട്ലെറ്റുകൾ എന്നിവ വഴി പുതിയ എസികൾ വാങ്ങാവുന്നതാണ്.