• നാലാം പാദത്തിലെ അറ്റാദായം 89 ശതമാനം വർദ്ധനവോടെ 9352 കോടി രൂപ, സാമ്പത്തിക വർഷത്തെ അറ്റാദായം 22 ശതമാനം വർദ്ധനവോടെ 25,096 കോടി രൂപയായും ഉയർന്നു

കൊച്ചി: വേദാന്ത ലിമിറ്റഡ് 2026 സാമ്പത്തിക വർഷത്തിൽ തങ്ങളുടെ എക്കാലത്തെയും മികച്ച സാമ്പത്തിക ഫലങ്ങൾ പുറത്തുവിട്ടു. 2026 മാർച്ച് 31-ന് അവസാനിച്ച നാലാം പാദത്തിൽ കമ്പനിയുടെ അറ്റാദായം വാർഷികാടിസ്ഥാനത്തിൽ 89 ശതമാനം വർദ്ധിച്ച് 9352 കോടി രൂപയായി ഉയർന്നു.

സാമ്പത്തിക വർഷത്തെ അറ്റാദായം വാർഷികാടിസ്ഥാനത്തിൽ 22 ശതമാനം വർദ്ധനവോടെ 25,096 കോടി രൂപയെന്ന സർവ്വകാല റെക്കോർഡിലെത്തി. വാർഷിക വരുമാനം വാർഷികാടിസ്ഥാനത്തിൽ 15 ശതമാനം വർദ്ധിച്ച് 1,74,075 കോടി രൂപയായും, നാലാം പാദ വരുമാനം വാർഷികാടിസ്ഥാനത്തിൽ 29 ശതമാനം വർദ്ധിച്ച് 51,524 കോടി രൂപയായും ഉയർന്നു.

എബിറ്റ വാർഷികാടിസ്ഥാനത്തിൽ 29 ശതമാനം വർദ്ധനവോടെ 55,976 കോടി രൂപയായി. നാലാം പാദത്തിൽ ഇത് 59 ശതമാനം വർദ്ധിച്ച് 18,447 കോടി രൂപയിലെത്തി. കമ്പനിയുടെ നെറ്റ് ഡെബ്റ്റ്-ടു-എബിറ്റ അനുപാതം കഴിഞ്ഞ സാമ്പത്തിക വർഷത്തെ 1.22 മടങ്ങിൽ നിന്ന് 0.95 മടങ്ങായി മെച്ചപ്പെട്ടു. ഇത് കഴിഞ്ഞ 14 പാദങ്ങളിലെ ഏറ്റവും മികച്ച നിലയാണ്.

ഓഹരി ഉടമകൾക്ക് പ്രതി ഓഹരിയ്ക്ക് 34 രൂപ വീതം ഡിവിഡൻറ് നൽകി. മൊത്തം ഷെയർഹോൾഡർ റിട്ടേൺ 48.6 ശതമാനമാണ്.

വിവിധ ബിസിനസ് മേഖലകളിൽ കമ്പനി മികച്ച ഉൽപ്പാദന റെക്കോർഡുകൾ സ്ഥാപിച്ചു. അലുമിനിയത്തിൻറെ വാർഷിക ഉൽപ്പാദനം 1 ശതമാനം വർദ്ധനവോടെ 2,456 കിലോടൺ ആയി ഉയർന്നു. സിങ്ക് ഇന്ത്യ എക്കാലത്തെയും മികച്ച ഉൽപ്പാദനമായ 1,114 കിലോടൺ മൈൻഡ് മെറ്റൽ ഉൽപ്പാദനം കൈവരിച്ചു. കോപ്പർ കാഥോഡ് ഉൽപ്പാദനം 15 ശതമാനം വർദ്ധിച്ച് 170 കിലോടൺ എന്ന റെക്കോർഡിലെത്തി.

2026 സാമ്പത്തിക വർഷത്തിൽ സിഎസ്ആർ പ്രവർത്തനങ്ങൾക്കായി 422 കോടി രൂപ കമ്പനി ചെലവഴിച്ചു. ഇത് ലോകമെമ്പാടുമുള്ള 6.95 ദശലക്ഷം ആളുകളുടെ ജീവിതത്തിൽ ഗുണപരമായി മാറ്റങ്ങൾ കൊണ്ടുവന്നു. പരിസ്ഥിതി സൗഹൃദ ഊർജ്ജത്തിൻറെ ഉപയോഗത്തിൽ 52 ശതമാനം വർദ്ധനവുണ്ടായി.

കമ്പനിയുടെ ചരിത്രത്തിലെ ഏറ്റവും മികച്ച പ്രകടനമാണ് ഈ വർഷം കാഴ്ചവെച്ചതെന്നും മെയ് 1 മുതൽ പ്രാബല്യത്തിൽ വരുന്ന കമ്പനി വിഭജനം ദീർഘകാല മൂല്യം വർദ്ധിപ്പിക്കുന്നതിൽ നിർണ്ണായകമാകുമെന്നും വേദാന്ത സിഎഫ്ഒ അജയ് ഗോയൽ പറഞ്ഞു.

ശക്തമായ പ്രവർത്തന മികവും ചെലവ് കുറച്ചതും ലാഭക്ഷമത വർദ്ധിപ്പിക്കാൻ സഹായിച്ചതായി വേദാന്ത എക്സിക്യൂട്ടീവ് ഡയറക്ടർ അരുൺ മിശ്ര വ്യക്തമാക്കി.

ക്രിസിൽ, ഐസിആർഎ എന്നീ ഏജൻസികൾ കമ്പനിയുടെ 'എഎ' ക്രെഡിറ്റ് റേറ്റിംഗ് നിലനിർത്തിയിട്ടുണ്ട്.