കൊച്ചി: ടാറ്റ ഗ്രൂപ്പിൻറെ മുൻനിര ധനകാര്യ സേവന കമ്പനിയായ ടാറ്റ ക്യാപിറ്റൽ ലിമിറ്റഡ്, സ്വർണ വായ്പാ രംഗത്തെ പ്രമുഖ ബാങ്കിതര ധനകാര്യ സ്ഥാപനമായ യോഗക്ഷേമം ലോൺസ് ലിമിറ്റഡിനെ (യോഗ്ലോൺസ്) ഏറ്റെടുക്കുന്നു. ഇതുസംബന്ധിച്ച നിർദ്ദേശത്തിന് ടാറ്റ ക്യാപിറ്റൽ ഡയറക്ടർ ബോർഡ് അംഗീകാരം നൽകി. വളരെയധികം വളർച്ചാ സാധ്യതയുള്ള സ്വർണ വായ്പാ വിഭാഗത്തിലേക്ക് പ്രവേശിക്കുന്നതിലൂടെ ടാറ്റ ക്യാപിറ്റലിൻറെ റീട്ടെയിൽ വായ്പാ ശൃംഖല വിപുലീകരിക്കുന്നതിനാണ് കമ്പനി ലക്ഷ്യമിടുന്നത്.

2026 മാർച്ച് 31-ലെ കണക്കനുസരിച്ച് 708 കോടി രൂപയുടെ സാമ്പത്തിക ആസ്തി കൈകാര്യം ചെയ്യുന്ന യോഗ്ലോൺസിന് ദക്ഷിണേന്ത്യയിൽ വലിയ ശാഖാ ശൃംഖലയുണ്ട്. കേരളം, കർണാടക, തമിഴ്നാട്, ആന്ധ്രാപ്രദേശ് എന്നീ നാല് സംസ്ഥാനങ്ങളിലായി 162 ശാഖകളും ഏകദേശം 32,000 സ്വർണ വായ്പാ ഉപഭോക്താക്കളും കമ്പനിക്കുണ്ട്.

പൂർണമായും പണമിടപാട് വഴിയുള്ള ഈ നിർദ്ദിഷ്ട ഇടപാടിലൂടെ യോഗ്ലോൺസിൻറെ ഭൂരിഭാഗം ഓഹരികളും ടാറ്റ ക്യാപിറ്റൽ സ്വന്തമാക്കും. വ്യവസ്ഥാപിതമായ മാറ്റങ്ങൾക്ക് വിധേയമായി, 318 കോടി രൂപയിൽ കവിയാത്ത പ്രീ-മണി ഇക്വിറ്റി വാല്യുവേഷൻറെ അടിസ്ഥാനത്തിലാണ് ഇടപാട് നടക്കുന്നത്. കമ്പനിയുടെ ഭാവി വളർച്ചാ പദ്ധതികളെ പിന്തുണയ്ക്കുന്നതിനായി ഏകദേശം 93 കോടി രൂപയുടെ പ്രാഥമിക മൂലധന നിക്ഷേപവും ഇതിൽ ഉൾപ്പെടുന്നു. ഈ ഇടപാട് പൂർത്തിയാകുന്നതോടെ, യോഗ്ലോൺസിൻറെ ഓഹരി മൂലധനത്തിൻറെ ഏകദേശം 88.6 ശതമാനവും ടാറ്റ ക്യാപിറ്റലിൻറെ കൈവശമാകും. ആവശ്യമായ റെഗുലേറ്ററി അനുമതികൾ ലഭിക്കുന്നതിനും വ്യവസ്ഥകൾ പാലിക്കുന്നതിനും വിധേയമായിരിക്കും ഈ ഇടപാട്.

ഈ രംഗത്തെ പ്രമുഖനായ ഉണ്ണികൃഷ്ണൻറെയും അനുഭവസമ്പന്നരായ മാനേജ്മെൻറ് ടീമിൻറെയും നേതൃത്വത്തിലാണ് നിലവിൽ യോഗ്ലോൺസ് പ്രവർത്തിക്കുന്നത്. ടാറ്റ ക്യാപിറ്റൽ കമ്പനിയെ ഏറ്റെടുത്ത ശേഷവും യോഗ്ലോൺസിൻറെ അമരത്ത് ഉണ്ണികൃഷ്ണൻ തന്നെ തുടരുമെന്ന് കമ്പനി വ്യക്തമാക്കിയിട്ടുണ്ട്.

യോഗ്ലോൺസുമായുള്ള ഇടപാട് ടാറ്റ ക്യാപിറ്റലിൻറെ സ്വർണ വായ്പാ ബിസിനസിലേക്കുള്ള പ്രവേശനത്തെയാണ് അടയാളപ്പെടുത്തുന്നതെന്നും ഇത് ഞങ്ങളുടെ റീട്ടെയിൽ വായ്പാ പോർട്ട്ഫോളിയോയിലേക്ക് വളർച്ചാ സാധ്യതയുള്ള ഒരു സുരക്ഷിത വായ്പാ ഉൽപ്പന്നം കൂടി ചേർക്കുമെന്നും ടാറ്റ ക്യാപിറ്റൽ ലിമിറ്റഡ് മാനേജിംഗ് ഡയറക്ടറും സിഇഒയുമായ രാജീവ് സബർവാൾ പറഞ്ഞു. യോഗ്ലോൺസിൻറെ വിപണിയിലെ വൈദഗ്ധ്യവും ടാറ്റ ക്യാപിറ്റലിൻറെ വിശ്വസനീയമായ ബ്രാൻഡ് മൂല്യവും മൂലധന ശക്തിയും സാങ്കേതികവിദ്യയും കൂടിച്ചേരുമ്പോൾ ഉപഭോക്താക്കൾക്ക് മികച്ച അനുഭവം നൽകാൻ സാധിക്കുമെന്നും അദ്ദേഹം പറഞ്ഞു.

ഇന്ത്യയിലെ ഏറ്റവും ആദരണീയവും വിശ്വസനീയവുമായ ടാറ്റ കുടുംബത്തിനൊപ്പം ചേരുന്നതിൽ അതിയായ സന്തോഷമുണ്ടെന്നും, ടാറ്റ ക്യാപിറ്റലിൻറെ സാമ്പത്തിക ഭദ്രതയും സാങ്കേതിക തികവും തങ്ങളുടെ വളർച്ചയെ കൂടുതൽ വേഗത്തിലാക്കുമെന്നും, ബിസിനസിനെ അടുത്ത ഘട്ടത്തിലേക്ക് കൊണ്ടുപോകാൻ ടാറ്റ ക്യാപിറ്റൽ ടീമുമായി ചേർന്ന് പ്രവർത്തിക്കാൻ ആഗ്രഹിക്കുന്നുവെന്നും യോഗ്ലോൺസ് പ്രൊമോട്ടറും മാനേജിംഗ് ഡയറക്ടറുമായ ഉണ്ണികൃഷ്ണൻ പറഞ്ഞു.