ന്യൂഡൽഹി: ഡിജിറ്റൽ ഇന്ത്യ ദിനത്തോടനുബന്ധിച്ച് സാധാരണക്കാരിലേക്ക് ഔദ്യോഗിക ബാങ്കിംഗ് സേവനങ്ങൾ എത്തിക്കാനുള്ള ശ്രമങ്ങൾ ഊർജിതമാക്കി പൊതുമേഖലാ ബാങ്കായ പഞ്ചാബ് നാഷണൽ ബാങ്ക് (പിഎൻബി). ഡിജിറ്റൽ സാങ്കേതികവിദ്യയുടെ സഹായത്തോടെ സാമ്പത്തിക ഉൾച്ചേരൽ ശക്തമാക്കുക എന്ന ലക്ഷ്യത്തോടെ 'പിഎൻബി ശ്രം സാഥി', 'പ്രധാനമന്ത്രി ഇ-സ്വനിധി' എന്നീ രണ്ട് ഡിജിറ്റൽ വായ്പാ പദ്ധതികളാണ് ബാങ്ക് നടപ്പിലാക്കി വരുന്നത്. സമൂഹത്തിലെ മുൻനിര തൊഴിലാളികൾക്കും തെരുവ് കച്ചവടക്കാർക്കും വലിയ ഈടുകളോ നിബന്ധനകളോ ഇല്ലാതെ ബാങ്കിംഗ് സഹായം ലഭ്യമാക്കാൻ ഈ പദ്ധതികളിലൂടെ സാധിക്കുന്നു.

സർക്കാർ വകുപ്പുകളിലും വിവിധ ഏജൻസികളിലും സേവനമനുഷ്ഠിക്കുന്ന അങ്കണവാടി ജീവനക്കാർ, ആശാ പ്രവർത്തകർ, ശുചീകരണ തൊഴിലാളികൾ, ഉച്ചഭക്ഷണ പദ്ധതി പാചകത്തൊഴിലാളികൾ, വനപ്രവർത്തകർ എന്നിവർക്കായി രൂപകൽപ്പന ചെയ്തതാണ് 'പിഎൻബി ശ്രം സാഥി' വ്യക്തിഗത വായ്പ. ഈ പദ്ധതി പ്രകാരം ഗുണഭോക്താക്കൾക്ക് പതിനായിരം രൂപ മുതൽ ഒരു ലക്ഷം രൂപ വരെ യാതൊരുവിധ ഈടുമില്ലാതെ വായ്പയായി ലഭിക്കും. പ്രോസസിംഗ് ഫീസുകൾ ഒന്നുംതന്നെ ഈടാക്കാത്ത ഈ വായ്പയുടെ തിരിച്ചടവ് കാലാവധി പരമാവധി 36 മാസമാണ്.

തെരുവ് കച്ചവടക്കാർക്ക് തങ്ങളുടെ ബിസിനസ്സ് ആവശ്യങ്ങൾക്കായി പ്രവർത്തന മൂലധനം ലഭ്യമാക്കുന്ന പദ്ധതിയാണ് 'പ്രധാനമന്ത്രി ഇ-സ്വനിധി'. യുപിഐ അധിഷ്ഠിത ഡിജിറ്റൽ ഇടപാടുകൾ പ്രോത്സാഹിപ്പിക്കുന്നതിനാണ് ഈ പദ്ധതി മുൻഗണന നൽകുന്നത്. അയ്യായിരം രൂപ മുതൽ അൻപതിനായിരം രൂപ വരെ വിവിധ ഘട്ടങ്ങളിലായി ഇതിലൂടെ വായ്പ ലഭിക്കും. കൃത്യമായി തിരിച്ചടവ് നടത്തുന്ന വ്യാപാരികൾക്ക് ഉയർന്ന വായ്പാ പരിധി അനുവദിക്കുമെന്നതാണ് ഇതിന്റെ പ്രത്യേകത. കൂടാതെ അർഹരായ ഗുണഭോക്താക്കളിൽ നിന്ന് മാർജിൻ തുകയോ പ്രോസസിംഗ് ഫീസോ ഈടാക്കുകയുമില്ല. ചെറുകിട വ്യാപാരികൾക്ക് ഡിജിറ്റൽ പേയ്മെന്റുകൾ സ്വീകരിച്ച് സാമ്പത്തിക സ്ഥിരത കൈവരിക്കാൻ ഇത് ഏറെ സഹായകരമാണ്.

ഡിജിറ്റൽ ഇന്ത്യ എന്നാൽ വെറും സാങ്കേതികവിദ്യ മാത്രമല്ല, മറിച്ച് എല്ലാ പൗരന്മാർക്കും സാമ്പത്തിക സേവനങ്ങൾ കൂടുതൽ എളുപ്പത്തിൽ ലഭ്യമാക്കുക കൂടിയാണെന്ന് പിഎൻബിയുടെ ഡിജിറ്റൽ ബാങ്കിംഗ് ട്രാൻസ്ഫോർമേഷൻ വിഭാഗം ജനറൽ മാനേജർ ദേബാശിഷ് ഗാംഗോപാധ്യായ് വ്യക്തമാക്കി. രാജ്യത്തിന്റെ വളർച്ചയിൽ പ്രധാന പങ്കുവഹിക്കുന്ന സാധാരണ ജനവിഭാഗങ്ങളിലേക്ക് ഔദ്യോഗിക വായ്പാ സേവനങ്ങൾ ഡിജിറ്റലായി എത്തിക്കാൻ ബാങ്ക് പ്രതിജ്ഞാബദ്ധമാണെന്നും അദ്ദേഹം കൂട്ടിച്ചേർത്തു.