വേനൽക്കാലം തുടങ്ങുന്നതോടെ വീടിനുള്ളിലെ ചൂട് പലപ്പോഴും അസഹനീയമായി മാറാറുണ്ട്. എല്ലാവർക്കും എയർ കണ്ടീഷണർ ഉപയോഗിക്കാൻ സാധിക്കണമെന്നില്ല. എന്നാൽ എസി ഇല്ലാതെയും ചില ലളിതമായ മാർഗങ്ങൾ സ്വീകരിച്ചാൽ വീട് തണുപ്പോടെ നിലനിർത്താൻ കഴിയും. ചെലവ് കുറഞ്ഞതും എളുപ്പത്തിൽ ചെയ്യാനാകുന്നതുമായ ചില പൊടിക്കൈകൾ വീടിന്റെ അന്തരീക്ഷം കൂടുതൽ സുഖകരമാക്കും.

• രാവിലെയും ഉച്ചയോടെയും സൂര്യപ്രകാശം നേരിട്ട് വീടിനുള്ളിലേക്ക് കടക്കാതിരിക്കാൻ ജനലുകളിൽ കട്ടിയുള്ള കർട്ടൻ ഉപയോഗിക്കാം. ഇളം നിറത്തിലുള്ള കർട്ടൻ ചൂട് കുറയ്ക്കാൻ സഹായിക്കും. വാതിലുകളും ജനലുകളും പകൽ സമയം അനാവശ്യമായി തുറന്നുവെക്കുന്നതും വീടിനുള്ളിലെ ചൂട് വർധിപ്പിക്കും.
• രാത്രിയിലും പുലർച്ചെയിലും വായുസഞ്ചാരം ലഭ്യമാക്കുന്നത് വളരെ പ്രധാനമാണ്. പുറത്തെ അന്തരീക്ഷം കുറച്ച് തണുത്തിരിക്കുന്ന സമയങ്ങളിൽ ജനലുകൾ തുറന്ന് വയ്ക്കുന്നത് വീട്ടിനുള്ളിലെ ചൂട് പുറത്തേക്കുപോകാൻ സഹായിക്കും. വായു കയറാനും പുറത്തേക്കുപോകാനും അനുയോജ്യമായ രീതിയിൽ എതിർദിശകളിലുള്ള ജനലുകൾ തുറക്കുകയാണെങ്കിൽ കൂടുതൽ നല്ല വായുസഞ്ചാരം ലഭിക്കും.
• വീട്ടിനുള്ളിൽ ഉപയോഗിക്കുന്ന വൈദ്യുതോപകരണങ്ങളും ചൂട് വർധിപ്പിക്കുന്നുണ്ട്. പ്രത്യേകിച്ച് അനാവശ്യമായി ലൈറ്റുകൾ കത്തിച്ചു വയ്ക്കുന്നത്, അധികസമയം ടിവി, കമ്പ്യൂട്ടർ, അടുക്കളയിലെ ചില ഉപകരണങ്ങൾ പ്രവർത്തിപ്പിക്കുന്നത് എന്നിവ ചൂട് കൂട്ടും. അതിനാൽ ആവശ്യത്തിന് മാത്രം ഇവ ഉപയോഗിക്കുന്ന ശീലം വേണം. സാധാരണ ബൾബുകൾക്ക് പകരം എൽഇഡി ലൈറ്റുകൾ ഉപയോഗിക്കുന്നത് നല്ലതാണ്.
• വീടിന്റെ വരാന്തയിലോ തുറസ്സായ ഭാഗങ്ങളിലോ അല്പം വെള്ളം തളിക്കുന്നത് ചൂട് കുറയ്ക്കാൻ സഹായിക്കും. ചിലപ്പോൾ നിലം തുടയ്ക്കുമ്പോൾ തണുത്ത വെള്ളം ഉപയോഗിക്കുന്നതും മുറിക്ക് നേരിയ ശീതളത നൽകും. എന്നാൽ അതിരുകടന്ന നനവ് ഉണ്ടാകാതിരിക്കാൻ ശ്രദ്ധിക്കണം.
• വീട്ടിൽ ചെടികൾ വളർത്തുന്നതും നല്ലൊരു പ്രകൃതിദത്ത മാർഗമാണ്. വീടിന്റെ ചുറ്റുമുള്ള പച്ചപ്പ് ചൂട് കുറയ്ക്കാനും ശുദ്ധവായു നൽകാനും സഹായിക്കുന്നു. ജനലിനരികിലും മുറ്റത്തും ചെറിയ ചെടിച്ചട്ടികൾ വെക്കാം.
• മേൽക്കൂരയിൽ വെള്ളനിറം പൂശുകയോ തണൽ നൽകുന്ന ഷീറ്റുകൾ ഉപയോഗിക്കുകയോ ചെയ്യാം. ഇത് വീടിനുള്ളിലേക്ക് കടക്കുന്ന ചൂടിന്റെ അളവ് കുറയ്ക്കും. മുകളിൽ മുറിയുള്ള വീടുകളിലാണ് ഈ മാർഗം കൂടുതൽ പ്രയോജനകരം.
• ടേബിൾ ഫാനിന് മുന്നിൽ ഒരു പാത്രത്തിൽ ഐസ് കട്ടകളോ തണുത്ത വെള്ളമോ വെക്കുന്നത് എസിക്ക് സമാനമായ തണുത്ത കാറ്റ് ലഭിക്കാൻ സഹായിക്കും.
• കോട്ടൺ തുണിത്തരങ്ങൾ: ബെഡ്ഷീറ്റുകളും തലയണ ഉറകളും കോട്ടൺ തുണിത്തരങ്ങൾ മാത്രമാക്കുക. ഇത് ശരീരത്തിലെ വിയർപ്പ് ആഗിരണം ചെയ്യാനും തണുപ്പ് നൽകാനും സഹായിക്കും.