ഒരു വീട്ടിൽ ഒരാൾക്ക് പനി വന്നാൽ, രണ്ടോ മൂന്നോ ദിവസത്തിനുള്ളിൽ മറ്റൊരാൾക്കും, പിന്നീട് മറ്റുള്ളവർക്കും പനി വരുന്നത് നമ്മൾ പലപ്പോഴും കാണാറുണ്ട്. പലരും ഇതിനെ ''പനി വീട്ടിൽ മുഴുവൻ പടർന്നു'' എന്നാണ് പറയുന്നത്.
പക്ഷേ യഥാർത്ഥത്തിൽ പനി തന്നെ ഒരാളിൽ നിന്ന് മറ്റൊരാളിലേക്ക് പകരുന്നില്ല. പനിക്ക് കാരണമാകുന്ന വൈറസ് അല്ലെങ്കിൽ മറ്റു രോഗാണുക്കളാണ് പകരുന്നത്.

പനി എന്താണ്?

പനി ഒരു രോഗത്തിന്റെ പേരല്ല. ശരീരത്തിൽ വൈറസ്, ബാക്ടീരിയ തുടങ്ങിയ രോഗാണുക്കൾ പ്രവേശിക്കുമ്പോൾ അവയെ നേരിടാൻ നമ്മുടെ പ്രതിരോധ സംവിധാനം നടത്തുന്ന പ്രതികരണത്തിന്റെ ഭാഗമാണ് ശരീരതാപനില ഉയരുന്നത്.ജലദോഷം, ഫ്ലൂ, കോവിഡ് പോലുള്ള പല വൈറൽ അണുബാധകളിലും പനി ഉണ്ടാകാം.

വീട്ടിൽ ഒരാളിൽ നിന്ന് മറ്റൊരാളിലേക്ക് എങ്ങനെ പകരുന്നു?

• പനിയുള്ള ഒരാൾ ചുമയ്ക്കുമ്പോഴും തുമ്മുമ്പോഴും സംസാരിക്കുമ്പോഴും വളരെ ചെറിയ ശ്വാസകണങ്ങൾ പുറത്തേക്ക് വരാം. വൈറസ് ബാധയുണ്ടെങ്കിൽ ഈ കണങ്ങളിലൂടെ അടുത്തുള്ളവരിലേക്ക് രോഗാണു എത്താം.
• അതുപോലെ കുടുംബാംഗങ്ങൾ ഒരേ മുറിയിൽ കൂടുതൽ സമയം ചെലവഴിക്കുന്നത്, വളരെ അടുത്ത് സംസാരിക്കുന്നത്, ജനലുകളും വാതിലുകളും അടച്ച മുറികളിൽ കഴിയുന്നത് തുടങ്ങിയ കാര്യങ്ങളും രോഗവ്യാപന സാധ്യത കൂട്ടാം.
• ചില അണുബാധകൾ കൈകളിലൂടെയും മലിനമായ വസ്തുക്കളിലൂടെയും പകരാം. അതിനാൽ രോഗിയായ ഒരാൾ ഉപയോഗിച്ച വസ്തുക്കൾ കൈകാര്യം ചെയ്ത ശേഷം കൈ കഴുകാതിരിക്കുന്നത് രോഗവ്യാപനത്തിന് കാരണമാകാം.
• വൈറസ് ശരീരത്തിൽ പ്രവേശിച്ച ഉടനെ ലക്ഷണങ്ങൾ കാണണമെന്നില്ല. രോഗാണു ശരീരത്തിൽ പ്രവേശിച്ചതിനുശേഷം ലക്ഷണങ്ങൾ തുടങ്ങുന്നതുവരെ ഒരു incubation period - രോഗലക്ഷണങ്ങൾ പുറത്തുവരാനുള്ള ഇടവേള ഉണ്ടാകും.

ഒരേ വീട്ടിൽ കഴിയുന്ന എല്ലാവർക്കും പനി വരുമോ?

ഓരോരുത്തരുടെയും പ്രതിരോധശേഷി, പ്രായം, ആരോഗ്യസ്ഥിതി, രോഗിയുമായുള്ള സമ്പർക്കത്തിന്റെ അളവ്, രോഗാണുവിന്റെ സ്വഭാവം തുടങ്ങിയ കാര്യങ്ങൾ അനുസരിച്ച് രോഗം പിടിപെടാനുള്ള സാധ്യത വ്യത്യാസപ്പെടും. ചിലർക്ക് വൈറസ് ബാധിച്ചാലും വളരെ ചെറിയ ലക്ഷണങ്ങൾ മാത്രമേ ഉണ്ടാകൂ. ചിലർക്ക് പനി പോലും ഉണ്ടായിരിക്കില്ല.

നിങ്ങളുടെ അടുക്കള സുരക്ഷിതമാണോ? ഭക്ഷ്യസുരക്ഷയ്ക്ക് ശ്രദ്ധിക്കേണ്ട കാര്യങ്ങൾ... Read More

വീട്ടിൽ ഒരാൾക്ക് പനി വന്നാൽ എന്ത് ചെയ്യണം?

• കഴിയുന്നത്ര വിശ്രമിക്കുക, ആവശ്യത്തിന് വെള്ളവും ദ്രാവകങ്ങളും കുടിക്കുക. ചുമയോ തുമ്മലോ ഉള്ളപ്പോൾ വായും മൂക്കും മൂടുക. കൈകൾ സോപ്പും വെള്ളവും ഉപയോഗിച്ച് ഇടയ്ക്കിടെ കഴുകുക.
• വീട്ടിൽ നല്ല വായുസഞ്ചാരം ഉറപ്പാക്കുന്നതും സഹായകരമാണ്. പ്രായമായവർ, കുഞ്ഞുങ്ങൾ, ഗർഭിണികൾ, പ്രതിരോധശേഷി കുറഞ്ഞവർ എന്നിവരുമായി അടുത്ത സമ്പർക്കം കുറയ്ക്കുന്നതും നല്ലതാണ്.
• ഡോക്ടർ നിർദേശിക്കാതെ ആന്റിബയോട്ടിക് സ്വമേധയാ കഴിക്കുന്നത് ഒഴിവാക്കണം. കാരണം പല പനികളും വൈറസ് മൂലമാണ്; വൈറൽ പനിക്ക് ആന്റിബയോട്ടിക് സഹായിക്കില്ല.

പനി വളരെ ഉയർന്നതാകുകയോ പല ദിവസങ്ങൾ തുടരുമോ, ശ്വാസംമുട്ടൽ, കടുത്ത ക്ഷീണം, ആശയക്കുഴപ്പം, തുടർച്ചയായ ഛർദ്ദി, വെള്ളം കുടിക്കാൻ കഴിയാത്ത അവസ്ഥ, കുട്ടികളിൽ അസാധാരണമായ മയക്കം തുടങ്ങിയ ലക്ഷണങ്ങൾ ഉണ്ടാകുകയോ ചെയ്താൽ വൈദ്യസഹായം തേടണം.ഒരാൾക്ക് രോഗം വന്നാൽ മറ്റുള്ളവരെ സംരക്ഷിക്കാൻ ചെറിയ മുൻകരുതലുകൾ എടുത്താൽ വീട്ടിലെ രോഗവ്യാപനം വലിയ തോതിൽ കുറയ്ക്കാൻ കഴിയും.

ഹെൽത്ത് ടിപ്സുകൾ ദിവസവും ലഭിക്കുവാൻ ഈ പോർട്ടൽ ഫോളോ ചെയ്യുക.