ഒരു വിജയകരമായ ബിസിനസ്സുകാരന് ആദ്യം ഉണ്ടായിരിക്കേണ്ട പ്രധാന സ്കിൽ കമ്മ്യൂണിക്കേഷൻ ആണ്. സംസാരിക്കുന്ന കഴിവ് മാത്രമല്ല, വ്യക്തമായി ആശയം പങ്കുവെക്കാനും മറ്റുള്ളവരെ മനസ്സിലാക്കാനും കഴിയുന്ന ശേഷിയാണ് യഥാർത്ഥ കമ്മ്യൂണിക്കേഷൻ. സ്റ്റാഫുമായി, കസ്റ്റമേഴ്സുമായി, പാർട്ണർമാരുമായി, സർക്കാരുമായിപ്പോലും കുടുംബവുമായിപ്പോലും ശരിയായ രീതിയിൽ സംസാരിക്കാൻ കഴിയണം. തെറ്റായ കമ്മ്യൂണിക്കേഷൻ പലപ്പോഴും തെറ്റായ തീരുമാനം, സ്റ്റാഫ് പ്രശ്നങ്ങൾ, കസ്റ്റമർ നഷ്ടം എന്നിവയ്ക്ക് കാരണമാകും.

രണ്ടാമത്തെ പ്രധാന കഴിവ് കൊളാബറേഷൻ അഥവാ ലീഡർഷിപ്പ് ആണ്. മറ്റുള്ളവരുമായി ചേർന്ന് പ്രവർത്തിക്കാനും, ഒരു ടീം നിയന്ത്രിക്കാനും, പ്രചോദിപ്പിക്കാനുമുള്ള കഴിവ് ബിസിനസിൽ നിർണായകമാണ്. സ്റ്റാഫ് നമ്മുടെ കൂടെ ദീർഘകാലം തുടരാത്തതിന്റെ ഒരു പ്രധാന കാരണം ലീഡർഷിപ്പിലെ പോരായ്മയാണ്. ആളുകളെ മനസ്സിലാക്കി, അവരുടെ കഴിവുകളെ കൃത്യമായി ഉപയോഗിച്ച് മുന്നോട്ട് കൊണ്ടുപോകാൻ കഴിയണം.

മൂന്നാമത്തേതാണ് ക്രിയേറ്റീവ് തിങ്കിംഗ്. ഇത് ഒരു സ്കിൽ മാത്രമല്ല, പലപ്പോഴും ഒരു സ്വാഭാവിക ടാലന്റാണ്. പുതിയ ആശയങ്ങൾ കണ്ടെത്താനും, വ്യത്യസ്തമായ രീതിയിൽ ചിന്തിക്കാനും കഴിയുന്നവരാണ് ബിസിനസിൽ മുന്നിൽ നിൽക്കുന്നത്. എല്ലാവർക്കും ഇത് സ്വാഭാവികമായി ലഭിക്കണമെന്നില്ല. എന്നാൽ കമ്മ്യൂണിക്കേഷനും കൊളാബറേഷനും ഉള്ള ബിസിനസ്സുകാരന് ക്രിയേറ്റീവായിട്ടുള്ള ആളുകളെ അവരുടെ ടീമിലേക്ക് കൊണ്ടുവരാൻ കഴിയും.

നാലാമത്തെ പ്രധാന കഴിവ് മണി മാനേജ്മെന്റ് ആണ്. പണം സമ്പാദിക്കുന്നതുകൊണ്ട് മാത്രം കാര്യമില്ല അതിനെ ശരിയായ രീതിയിൽ കൈകാര്യം ചെയ്യാനും, നിക്ഷേപിക്കാനും, ചെലവ് നിയന്ത്രിക്കാനും കഴിയണം. ധനകാര്യ നിയന്ത്രണം ഇല്ലാത്ത ബിസിനസ്സ് എത്ര വലിയതായാലും ഒരു ഘട്ടത്തിൽ തകർന്നുപോകും.

അഞ്ചാമത്തെയും അത്യാവശ്യവുമായ കഴിവാണ് ടൈം മാനേജ്മെന്റ്. സമയം പണത്തേക്കാൾ വിലപ്പെട്ടതാണ്. ശരിയായ സമയത്ത് ശരിയായ കാര്യങ്ങൾ ചെയ്യാനുള്ള കഴിവാണ് വിജയത്തിന്റെ അടിസ്ഥാനം.

ഈ അഞ്ച് കഴിവുകൾ - കമ്മ്യൂണിക്കേഷൻ, കൊളാബറേഷൻ, ക്രിയേറ്റിവിറ്റി, മണി മാനേജ്മെന്റ്, ടൈം മാനേജ്മെന്റ് - ഒരുമിച്ച് വന്നാൽ മാത്രമേ ഒരു ബിസിനസ്സ് സ്ഥിരതയോടെ വളരുകയും വൻ വിജയത്തിലേക്ക് എത്തുകയും ചെയ്യൂ.