തിരുവനന്തപുരം: ഓണത്തിൻറെ വർണപ്പകിട്ടും ആഘോഷവുമായി തലസ്ഥാന നഗരം ഉത്സവലഹരിയിലേയ്ക്ക്. ടൂറിസം വകുപ്പിൻറെ ആഭിമുഖ്യത്തിൽ സംഘടിപ്പിക്കുന്ന ഓണം ടൂറിസം വാരാഘോഷത്തിന് മുന്നോടിയായി നഗരവീഥികൾ ദീപപ്രഭയിൽ മുങ്ങി. ആരോഗ്യ, ദേവസ്വം വകുപ്പ് മന്ത്രി കെ. മുരളീധരൻ വൈദ്യുത ദീപാലങ്കാരങ്ങളുടെ സ്വിച്ച് ഓൺ കർമ്മം നിർവ്വഹിച്ചു.

എംഎൽഎമാരായ എംആർ ബൈജു, എം വിൻസെൻറ്, ജി സ്റ്റീഫൻ, കൗൺസിലർ കെ.ആർ ക്ലീറ്റസ്, ടൂറിസം ഡയറക്ടർ അഞ്ജന എം, അഡീഷണൽ ഡയറക്ടർ (ജനറൽ) ശ്രീധന്യ സുരേഷ് എന്നിവർ സ്വിച്ച് ഓൺ ചടങ്ങിൽ പങ്കെടുത്തു. സി.കെ ഹരീന്ദ്രൻ എംഎൽഎ അധ്യക്ഷനായിരുന്നു. ഓണാഘോഷ കമ്മിറ്റി വൈസ് ചെയർപേഴ്സൺ മര്യാപുരം ശ്രീകുമാർ സ്വാഗതം പറഞ്ഞു. ഓണാഘോഷ കമ്മിറ്റി വൈസ് ചെയർപേഴ്സൺമാരായ നെയ്യാറ്റിൻകര സനൽ, മണക്കാട് സുരേഷ്, എം.എ വാഹിദ് എന്നിവരും ചടങ്ങിൽ സന്നിഹിതരായിരുന്നു.

1986 ൽ അന്നത്തെ പ്രധാനമന്ത്രി രാജീവ് ഗാന്ധിയും സോണിയ ഗാന്ധിയും ഓണാഘോഷത്തിൽ മുഖ്യാതിഥികളായി പങ്കെടുക്കാൻ തിരുവനന്തപുരത്തെത്തിയ കാലം അനുസ്മരിച്ച മന്ത്രി കെ. മുരളീധരൻ, തലസ്ഥാനത്തെ ഓണാഘോഷം കേരളത്തിൻറെ സാംസ്കാരിക പൈതൃകത്തിൻറെയും ടൂറിസം സാധ്യതകളുടെയും മുഖമുദ്രയായി മാറിയിട്ടുണ്ടെന്ന് പറഞ്ഞു.

ഓണം വാരാഘോഷം സംസ്ഥാനത്തിൻറെ അഭിമാനമാണ്. വർഷങ്ങളായി വളരെ വിപുലമായ രീതിയിൽ സംഘടിപ്പിക്കുന്ന ഈ ആഘോഷം ഒട്ടേറെ വിനോദസഞ്ചാരികളെ തലസ്ഥാന നഗരിയിലേക്ക് ആകർഷിക്കുന്നതായി മന്ത്രി ചൂണ്ടിക്കാട്ടി.

ഓണാഘോഷ വാരത്തിൽ കവടിയാർ മുതൽ അട്ടക്കുളങ്ങര വരെയും ശാസ്തമംഗലം മുതൽ വെള്ളയമ്പലം വരെയും ടൂറിസം വകുപ്പിൻറെ നേതൃത്വത്തിൽ ദീപാലങ്കാരമൊരുക്കും. ഉത്സവനാളുകളിൽ നഗരവീഥികൾ വർണ്ണവെളിച്ചത്തിൽ പ്രഭാപൂരിതമാകും.

കേരളത്തിൻറെ ഓണക്കാലം ആഭ്യന്തര,വിദേശ വിനോദ സഞ്ചാരികളെ ഒരുപോലെ ആകർഷിക്കുന്നതായി ടൂറിസം സാംസ്കാരിക വകുപ്പ് മന്ത്രി പി.സി വിഷ്ണുനാഥ് പറഞ്ഞു. ടൂറിസ്റ്റുകൾക്ക് കേരളത്തിൻറെ ഉത്സവപ്പെരുമയും സംസ്കാരത്തിൻറെ വൈവിധ്യവും അടുത്തറിയാൻ കഴിയുന്ന നിരവധി പരിപാടികളാണ് ഇത്തവണ ഒരുക്കിയിട്ടുള്ളതെന്നും അദ്ദേഹം വ്യക്തമാക്കി.

ജില്ലയിലെ നിയോജക മണ്ഡലങ്ങളിൽ പര്യടനം നടത്തി എത്തിച്ചേർന്ന ഓണപ്പതാക കനകക്കുന്നിൽ നടന്ന ചടങ്ങിൽ മന്ത്രി പി.സി വിഷ്ണുനാഥ് ഉയർത്തി. തുടർന്ന് അവിടെ ഒരുക്കിയിട്ടുള്ള മീഡിയ സെൻററിൻറെ ഉദ്ഘാടനവും നിർവഹിച്ചു.

രക്തസാക്ഷി മണ്ഡപത്തിൽ നിന്നും മയൂരനൃത്തം, മാവേലി വേഷം, കൈ കൊട്ടിക്കളി എന്നിവയുടെ അകമ്പടിയോടെ കാൽനടയായി കനകക്കുന്നിൽ എത്തിച്ചേർന്നാണ് ഓണപ്പതാക ഉയർത്തിയത്. വെള്ളിയാഴ്ച കോവളത്ത് നിന്നാണ് ഘോഷയാത്രയ്ക്ക് തുടക്കമിട്ടത്.

സൂര്യകാന്തി എക്സിബിഷൻ ഗ്രൗണ്ടിൽ നടക്കുന്ന ഭക്ഷ്യമേളയുടെ ഉദ്ഘാടനം ശശി തൂർ എം പി നിർവഹിച്ചു. കേരളത്തിൻറെ വിവിധ പരമ്പരാഗത വിഭവങ്ങളും രുചിക്കൂട്ടുകളും മേളയിൽ ഒരുക്കിയിട്ടുണ്ട്. ഓണാഘോഷ വാരത്തിലുടനീളം പ്രവർത്തിക്കുന്ന മേളയിൽ സംസ്ഥാനത്തിൻറെ വിവിധ ഭാഗങ്ങളിൽ നിന്നുള്ള വൈവിധ്യമാർന്ന ഭക്ഷണങ്ങൾ ലഭ്യമാകും. പതിനഞ്ചോളം സ്റ്റാളുകളാണ് മേളയിൽ ഒരുക്കിയിട്ടുള്ളത്.

ആഘോഷങ്ങളുടെ ഭാഗമായി സംഘടിപ്പിച്ച പായസ മത്സരത്തിൽ ജലജ ഷാജു ഒന്നാം സമ്മാനവും ഷിഫ ഫാത്തിമ, വിനീത് എ എം എന്നിവർ രണ്ടും മൂന്നും സ്ഥാനവും കരസ്ഥമാക്കി. മന്ത്രി പി. സി വിഷ്ണുനാഥാണ് വിജയികളെ പ്രഖ്യാപിച്ചത്. തുടർന്ന് അദ്ദേഹം സമ്മാന വിതരണവും നടത്തി. മസ്കറ്റ് ഹോട്ടലിലെ എക്സിക്യുട്ടീവ് ഷെഫ് അരുൺ, ചൈത്രം ഹോട്ടലിലെ ഷെഫ് ബാബുരാജ്. കൺവീനർ സജികുമാർ എന്നിവരാണ് വിജയികളെ തെരഞ്ഞെടുത്തത്.

ഓണം ടൂറിസം വാരാഘോഷത്തിന് ഓഗസ്റ്റ് 30 ന് നടക്കുന്ന വിപുലമായ ഘോഷയാത്രയോടെ സമാപനമാകും. ഉപരാഷ്ട്രപതി സി.പി രാധാകൃഷ്ണൻ ഘോഷയാത്ര ഫ്ളാഗ് ഓഫ് ചെയ്യും.