ജീവിതത്തിൽ എന്തെങ്കിലും നല്ലത് സംഭവിക്കട്ടെ എന്ന് കാത്തിരിക്കുന്നവരാണ് പലരും. ''ശരിയായ സമയം വരട്ടെ'', ''സാഹചര്യങ്ങൾ മാറട്ടെ'', ''ആരെങ്കിലും സഹായിക്കട്ടെ'' എന്നിങ്ങനെ കാത്തിരിക്കുമ്പോൾ വിലപ്പെട്ട സമയം നിശബ്ദമായി കടന്നുപോകുന്നു. പലപ്പോഴും ഈ കാത്തിരിപ്പ് തന്നെ നമ്മുടെ വളർച്ചയെ തടയുന്ന ഏറ്റവും വലിയ കാരണമായി മാറുന്നു.

സത്യത്തിൽ, അവസരങ്ങൾ എല്ലായ്പ്പോഴും തയ്യാറായി നമ്മെ തേടി വരില്ല. വിജയിച്ചവരുടെ ജീവിതം നോക്കിയാൽ അവർ പൂർണ്ണമായ സാഹചര്യങ്ങൾ കാത്തിരുന്നില്ലെന്ന് കാണാം. അവർ ഉണ്ടായിരുന്ന പരിമിതികളിൽ നിന്നുതന്നെ ഒരു ചെറിയ തുടക്കം കുറിച്ചു. ചെറിയൊരു ശ്രമം, ചെറിയൊരു തീരുമാനം-അതാണ് പിന്നീട് വലിയ മാറ്റങ്ങളിലേക്ക് വഴിതുറന്നത്.

തുടങ്ങാൻ എല്ലാം അറിയേണ്ടതില്ല. പലരും ''എനിക്ക് മുഴുവൻ അറിയില്ല'' എന്ന ഭയത്തിൽ തുടങ്ങാതെ നിൽക്കുന്നു. പക്ഷേ യാഥാർത്ഥ്യം എന്തെന്നാൽ, തുടങ്ങുമ്പോഴാണ് നാം യഥാർത്ഥത്തിൽ പഠിക്കാൻ തുടങ്ങുന്നത്. ഓരോ ചുവടും പുതിയ അനുഭവങ്ങൾ നൽകും. ഓരോ അനുഭവവും നമ്മെ കൂടുതൽ ശക്തരാക്കും.

മുന്നോട്ടുപോകുമ്പോൾ പഠിക്കാം. തെറ്റുകൾ സംഭവിച്ചാൽ അവയെ തിരിച്ചറിഞ്ഞ് തിരുത്താം.
വീണാൽ അതിനെ പരാജയമായി കാണാതെ ഒരു പാഠമായി സ്വീകരിച്ച് വീണ്ടും എഴുന്നേൽക്കാം.പരാജയം അവസാനമല്ല; അത് വളർച്ചയുടെ ഭാഗമാണ്. പല വിജയകഥകളും നിരവധി വീഴ്ചകളുടെ മുകളിലാണ് പണിതുയർത്തപ്പെട്ടിരിക്കുന്നത്.

ആളുകൾ എന്തു പറയും എന്ന ഭയം പലരുടെയും സ്വപ്നങ്ങളെ നിശബ്ദമായി കൊന്നുകളയുന്നു. ''ഇത് നടക്കില്ല'', ''നീക്ക് കഴിയില്ല'' എന്നിങ്ങനെയുള്ള അഭിപ്രായങ്ങൾ കേട്ട് നാം ശ്രമം നിർത്തുമ്പോൾ നഷ്ടം നമ്മുടെ ജീവിതത്തിനാണ്. മറ്റുള്ളവരുടെ അഭിപ്രായങ്ങൾ നിങ്ങളുടെ യാത്രയുടെ ദിശ നിർണ്ണയിക്കരുത്. കാരണം നിങ്ങളുടെ ജീവിതത്തിന്റെ ഉത്തരവാദിത്വം നിങ്ങളുടേതാണ്, നിങ്ങളുടെ സ്വപ്നങ്ങളുടെ ഉടമയും നിങ്ങളാണ്.

നല്ല ഓർമ്മകൾ സമ്മാനിക്കുക; ഒരാളുടെ ഹൃദയത്തിൽ മായാത്ത ഇടം നേടാം... Read More

ഇന്ന് നിങ്ങൾ ചെയ്യുന്ന ചെറിയൊരു ശ്രമം പോലും-ഒരു പുതിയ പഠനം, ഒരു ചെറിയ ബിസിനസ് ആശയം, ഒരു ശീലം മാറ്റം-നാളെയുടെ വലിയ വിജയത്തിന് അടിത്തറയാകാം. വലിയ വിജയങ്ങൾ ഒരൊറ്റ ദിവസത്തിൽ ഉണ്ടാകുന്നതല്ല; അവ ദിവസേന ചെയ്യുന്ന ചെറിയ ശ്രമങ്ങളുടെ കൂട്ടായ ഫലമാണ്.

അതിനാൽ സ്വന്തം കഴിവിൽ വിശ്വസിക്കുക. നിങ്ങൾക്ക് ഇപ്പോൾ ഉള്ളതിനെ കുറച്ച് കാണാതെ, അതിനെ ഉപയോഗിച്ച് മുന്നോട്ട് പോകാൻ പഠിക്കുക. ലഭിച്ച സമയത്തെ വിലമതിക്കുക, കാരണം സമയം നഷ്ടപ്പെട്ടാൽ അത് തിരികെ ലഭിക്കില്ല. നിങ്ങളുടെ ലക്ഷ്യത്തിലേക്ക് ആത്മവിശ്വാസത്തോടെ, സ്ഥിരതയോടെ മുന്നേറുക.

ശരിയായ സമയം വരാനായി കാത്തിരിക്കേണ്ട; നിങ്ങൾ തുടങ്ങുന്ന നിമിഷമാണ് ശരിയായ സമയം.

ലോക്കൽ എക്കോണമി എന്ന ഈ ന്യൂസ് പോർട്ടൽ ജനങ്ങളെ ലോക്കൽ ടു ഗ്ലോബൽ എന്ന നിലയിൽ ഉയർത്തുക എന്നതാണ് ലക്ഷ്യമാക്കുന്നത്. ഈ പോർട്ടലിൽ രാവിലെ പോസിറ്റീവ് വാർത്തകൾ മാത്രമാണ് പോസ്റ്റ് ചെയ്യുന്നത്. രാവിലെ നെഗറ്റീവ് വാർത്ത കേൾക്കാതെ പോസിറ്റീവ് വാർത്തകൾ മാത്രം വായിക്കാൻ ആഗ്രഹിക്കുന്ന ആൾക്കാർ ഈ പോർട്ടൽ സബ്സ്ക്രൈബ് ചെയ്യുക, ഫോളോ ചെയ്യുക.