- Trending Now:
കൊച്ചി: മണ്ഡല-മകരവിളക്ക് തീർത്ഥാടന കാലയളവിൽ ശബരിമലയിൽ എത്തുന്ന ഭക്തർക്ക് സാങ്കേതികവിദ്യയിൽ അധിഷ്ഠിതമായ തീർത്ഥാടന അനുഭവം ഒരുക്കുന്നതിനായി ഡിജിറ്റൽ സേവനങ്ങളുമായി സൗത്ത് ഇന്ത്യൻ ബാങ്ക്. ഇതിന്റെ ഭാഗമായി തിരുവിതാംകൂർ ദേവസ്വം ബോർഡുമായി സഹകരിച്ച് സന്നിധാനത്ത് സ്ഥാപിച്ച അരവണ വെൻഡിങ് മെഷീൻ തിരുവിതാംകൂർ ദേവസ്വം ബോർഡ് പ്രസിഡന്റ് കെ. ജയകുമാർ (റിട്ട. ഐ.എ.എസ്) ഉദ്ഘാടനം ചെയ്തു. ഇതിലൂടെ മണ്ഡലകാലത്ത് തീർത്ഥാടകർക്ക് അരവണ എളുപ്പത്തിൽ ലഭ്യമാകും. സൗത്ത് ഇന്ത്യൻ ബാങ്ക് ഗവൺമെന്റ് ബിസിനസ് വിഭാഗം ഡിജിഎമ്മും ഹെഡുമായ രഞ്ജിത്ത് ആർ. നായർ, എജിഎമ്മും തിരുവനന്തപുരം റീജണൽ ഹെഡുമായ ജോൺ സിറിയക്, തിരുവനന്തപുരം മെയിൻ ക്ലസ്റ്റർ ഹെഡ് രതീഷ് പി., ഗവൺമെന്റ് ബിസിനസ് വിഭാഗം ചീഫ് മാനേജർ പ്രേംലാൽ ആർ എസ് എന്നിവരും ഉദ്ഘാടന ചടങ്ങിൽ സന്നിഹിതരായിരുന്നു.
ഇതുകൂടാതെ തീർഥാടകർക്കായി സന്നിധാനത്ത് സ്ഥാപിച്ച പ്രത്യേക ഇ-കിയോസ്ക് മുഖാന്തരം അയ്യപ്പഭക്തർക്ക് എളുപ്പത്തിൽ പ്രസാദം ബുക്ക് ചെയ്യാവുന്നതാണ്. കൂടാതെ ഡിജിറ്റൽ പേയ്മെന്റ് കൗണ്ടറുകളും, ക്യൂ ആർ കോഡ് അധിഷ്ടിത ഇ-കാണിക്ക സംവിധാനവും സൗത്ത് ഇന്ത്യൻ ബാങ്ക് ഈ മണ്ഡലകാലത്ത് അയ്യപ്പഭക്തർക്കായി ഒരുക്കിയിരിക്കുന്നു. ബുക്ക് ചെയ്യുന്ന പ്രസാദം ഏറ്റുവാങ്ങാൻ പ്രത്യേക കൗണ്ടറുകളും ബാങ്ക് ഒരുക്കിയിട്ടുണ്ട്.
കൊച്ചി രാജ്യാന്തര വിമാനത്താവളം വഴി എത്തുന്ന തീർത്ഥാടകർക്കും അപ്പം, അരവണ എന്നിവ മുൻകൂട്ടി ബുക്ക് ചെയ്യുന്നതിനായി ഡിജിറ്റൽ കിയോസ്കും, ഇ-കാണിക്ക സംവിധാനവും സജ്ജമാക്കിയിട്ടുണ്ട്.
സിയാലിന്റെയും ദേവസ്വം ബോർഡിന്റെയും സഹകരണത്തോടെ നടപ്പാക്കുന്ന പദ്ധതിയിൽ ബുക്ക് ചെയ്യുന്ന പ്രസാദം സന്നിധാനത്തെ സൗത്ത് ഇന്ത്യൻ ബാങ്കിന്റെ കൗണ്ടറുകളിൽനിന്ന് ഏറ്റുവാങ്ങാം.
ശബരിമല തീർത്ഥാടനവുമായി ബന്ധപ്പെട്ട പ്രധാന സേവനങ്ങളിൽ ഡിജിറ്റൽ സാങ്കേതികവിദ്യ പ്രയോജനപ്പെടുത്തി പ്രസാദ ബുക്കിങ്ങും വിതരണവും കൂടുതൽ ലളിതവും കാര്യക്ഷമവുമാക്കുകയാണ് പദ്ധതിയുടെ ലക്ഷ്യം.
ഇവിടെ പോസ്റ്റു ചെയ്യുന്ന അഭിപ്രായങ്ങൾ THE LOCAL ECONOMY ടേതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും. കേന്ദ്ര സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.