• കേരള സ്റ്റാർട്ടപ്പ് മിഷനുമായും ഡിജിറ്റൽ യൂണിവേഴ്സിറ്റി കേരളയുമായും സഹകരിച്ചാണ് പദ്ധതി

തിരുവനന്തപുരം: കേന്ദ്ര ഇലക്ട്രോണിക്സ് ആൻഡ് ഇൻഫർമേഷൻ ടെക്നോളജി മന്ത്രാലയത്തിൻറെ കീഴിലുള്ള ഇന്ത്യ എഐ മിഷൻ (ഇന്ത്യ എഐ), ഐബിഡി എന്നിവയുമായി സഹകരിച്ച് സംസ്ഥാന സർക്കാർ രണ്ട് എഐ സെൻറർ ഓഫ് എക്സലൻസ് (എഐ-സിഒഇ) സ്ഥാപിക്കും. കൊച്ചിയിലെ ഡിജിറ്റൽ ഹബ്ബിൽ കേരള സ്റ്റാർട്ടപ്പ് മിഷൻറെ (കെഎസ്യുഎം) കീഴിൽ ബയോ എഐയിൽ ശ്രദ്ധ കേന്ദ്രീകരിച്ചുള്ളതാണ് ആദ്യ പദ്ധതി. തിരുവനന്തപുരത്ത് ഡിജിറ്റൽ യൂണിവേഴ്സിറ്റി കേരള (ഡിയുകെ) യ്ക്ക് കീഴിൽ പൊതു ഉദ്ദേശ്യത്തിലുള്ളതാണ് രണ്ടാമത്തെ പദ്ധതി. ഇന്ത്യ എഐ മിഷൻറെ സ്റ്റാർട്ടപ്പ് ഫിനാൻസിംഗിൽ ഉൾപ്പെടുത്തി പദ്ധതികൾക്കായി ആകെ 20 കോടി രൂപ വീതം ഭരണാനുമതി ലഭിച്ചു.

ഇന്ത്യ എഐ മിഷനുമായുള്ള കേരളത്തിൻറെ പങ്കാളിത്തം സംസ്ഥാനത്തിന് നാഴികക്കല്ലാണെന്ന് പദ്ധതിയുടെ പ്രഖ്യാപനം തിരുവനന്തപുരം ടെക്നോപാർക്കിൽ നിർവ്വഹിച്ച് ഐടി, വ്യവസായ മന്ത്രി പി.കെ കുഞ്ഞാലിക്കുട്ടി പറഞ്ഞു. കേരളത്തിൻറെ ജൈവ പൈതൃകത്തിലും ലോകോത്തര ഡിജിറ്റൽ ആവാസവ്യവസ്ഥയിലും വേരൂന്നിയ രണ്ട് വ്യത്യസ്ത എഐ സെൻററുകളിലൂടെ സമഗ്രമായ എഐ ആവാസവ്യവസ്ഥ നിർമ്മിക്കുകയാണ്. ഇതിലൂടെ ഇന്ത്യയുടെ എഐ ദൗത്യത്തിൽ കേരളം പങ്കെടുക്കുക മാത്രമല്ല, അത് രൂപപ്പെടുത്താൻ സഹായിക്കുകയാണെന്നും മന്ത്രി കൂട്ടിച്ചേർത്തു.

സിഒഇ 1: ബയോ-എഐ സെൻറർ ഓഫ് എക്സലൻസ് - കെഎസ്യുഎം, ഡിജിറ്റൽ ഹബ്ബ്, കൊച്ചി

'നേച്ചർ മീറ്റ്സ് കമ്പ്യൂട്ട്' എന്ന ആശയത്തിൽ ഇന്ത്യ എഐ മിഷൻറെ സ്റ്റാർട്ടപ്പ് ഫിനാൻസിംഗിന് കീഴിൽ കേരള സ്റ്റാർട്ടപ്പ് മിഷൻ (കെഎസ്യുഎം) നടപ്പിലാക്കുന്നതാണ് ഈ പദ്ധതി. കുസാറ്റിലെ 'തേജസ്വി' സൂപ്പർ കമ്പ്യൂട്ടറും (350 ടെറാഫ്ലോപ്സ്) കേരള ജീനോം ഡാറ്റ സെൻററും (കെജിഡിസി) നൽകുന്ന ഇന്നൊവേഷൻ പ്ലാറ്റ് ഫോമിന് കീഴിൽ കേരളത്തിൻറെ പശ്ചിമഘട്ട ജൈവവൈവിധ്യത്തെയും നൂറ്റാണ്ടുകൾ പഴക്കമുള്ള ആയുർവേദ പൈതൃകത്തെയും അത്യാധുനിക ജീനോമിക്സിനെയും ഇത് ഒരുമിച്ച് കൊണ്ടുവരുന്നു. സംസ്ഥാന സർക്കാറും സിന്തൈറ്റ് ഇൻഡസ്ട്രീസ്, പ്ലാൻറ് ലിപിഡ്സ്, മാനെ കാൻകോർ, വൈദ്യരത്നം ഔഷധശാല എന്നിവ ഉൾപ്പെടുന്ന വ്യവസായ കൺസോർഷ്യവും 40:40:20 ഫണ്ടിംഗ് മോഡലിലൂടെ നാല് വർഷത്തിനുള്ളിൽ 20 കോടി നിക്ഷേപത്തോടെയാണ് പദ്ധതി വികസിപ്പിക്കുക.

നാല് വർഷം കൊണ്ട് 48 ഡീപ്-ടെക് സ്റ്റാർട്ടപ്പുകളെ ഇൻകുബേറ്റ് ചെയ്യാനും 600 ഉയർന്ന മൂല്യമുള്ള തൊഴിലവസരങ്ങൾ സൃഷ്ടിക്കാനും ബയോ ഇൻഫോർമാറ്റിക്സിലും അനുബന്ധ മേഖലകളിലുമായി ഏകദേശം 1200 പ്രൊഫഷണലുകളെ പരിശീലിപ്പിക്കാനും കേന്ദ്രം പദ്ധതിയിടുന്നു.

ഡ്രഗ് ഡിസ്കവറി, ജീനോമിക്സ്, അഗ്രി-ടെക് എന്നിവയിലുടനീളമുള്ള 20 പ്രൊപ്രൈറ്ററി ബൗദ്ധിക സ്വത്തവകാശ ആസ്തികൾ വികസിപ്പിക്കാനും 40,000-ത്തിലധികം സുഗന്ധവ്യഞ്ജന കർഷകരുടെ വരുമാനം 20 ശതമാനം വർധിപ്പിക്കുക എന്ന ലക്ഷ്യത്തോടെ എഐ പ്രാപ്തമാക്കിയ ജിഐ ടാഗിംഗ് ഉപകരണങ്ങൾ വിന്യസിക്കാനും ഈ സംരംഭം ലക്ഷ്യമിടുന്നു.

ലൈഫ് സയൻസസ് ആൻഡ് ആയുർ-ജീനോമിക്സ്, അഗ്രി-ടെക് ആൻഡ് സ്പൈസ് വാല്യൂ ചെയിൻ എന്നീ ക്ലസ്റ്ററുകളിലായി പത്ത് സുപ്രധാന വിഷയങ്ങളിൽ ബയോ-എഐ സെൻറർ ഓഫ് എക്സലൻസ് ശ്രദ്ധ കേന്ദ്രീകരിക്കും. പ്രകൃതി-ജീൻ മാപ്പിംഗിലൂടെ പ്രിസിഷൻ ആയുർവേദം, പശ്ചിമഘട്ടത്തിലെ സസ്യജാലങ്ങളിൽ നിന്നുള്ള ഇൻ-സിലിക്കോ മരുന്ന് കണ്ടെത്തൽ, പ്രീമിയം സുഗന്ധവ്യഞ്ജനങ്ങൾക്കായുള്ള എഐ പരിശോധിച്ച ജിഐ പ്രാമാണീകരണം, ഡ്രോൺ അനലിറ്റിക്സ് നൽകുന്ന കീട നിയന്ത്രണം എന്നിവ ഇതിൽ ഉൾപ്പെടുന്നു.

സിഒഇ 2: എഐ സെൻറർ ഓഫ് എക്സലൻസ്- ഡിജിറ്റൽ യൂണിവേഴ്സിറ്റി കേരള, തിരുവനന്തപുരം

'ഗവേഷണത്തിൽ നിന്ന് വാണിജ്യവൽക്കരണത്തിലേക്ക്' എന്ന ആശയത്തിൽ ഇന്ത്യ എഐ മിഷന് കീഴിലുള്ള ഡിജിറ്റൽ യൂണിവേഴ്സിറ്റി കേരള (ഡിയുകെ), തിരുവനന്തപുരത്ത് 10,000 ചതുരശ്ര അടി വിസ്തീർണ്ണത്തിൽ രണ്ടാമത്തെ എഐ-സിഒഇ സ്ഥാപിക്കുന്നതിന് ഭരണപരമായ അനുമതി ലഭിച്ചു. ആകെ 20 കോടി ചെലവിലാണ് പദ്ധതി. അംഗീകൃത ഇൻഫർമേഷൻ സെക്യൂരിറ്റി ഓഡിറ്റിംഗ് ഏജൻസിയായ സി.ഇ.ആർ.ടി-ഇൻ എംപാനൽ ചെയ്ത ഇന്ത്യയിലെ ആദ്യത്തെ സർവകലാശാലയാണിത്. അതിൻറെ സെൻറർ ഫോർ ഡിജിറ്റൽ ഇന്നൊവേഷൻ ആൻഡ് പ്രൊഡക്റ്റ് ഡെവലപ്മെൻറ് (സിഡിഐപിഡി) ആഗോള ഗുണനിലവാരമുള്ള സിഎംഎംഐ ഡെവലപ്മെൻറ് മെച്യൂരിറ്റി ലെവൽ 3 സർട്ടിഫിക്കേഷൻ നേടിയ ഇന്ത്യയിലെ ആദ്യത്തെ വികസന കേന്ദ്രമാണ്.

നൂതന എ.ഐ ഗവേഷണത്തെയും പ്രായോഗികവും വിപണിക്ക് തയ്യാറായതുമായ ആപ്ലിക്കേഷനുകളെ ബന്ധിപ്പിക്കുന്ന ഒരു സാങ്കേതിക വിഭവ കേന്ദ്രമായി ഈ സി.ഒ.ഇ പ്രവർത്തിക്കും. ഉൽപ്പന്ന വികസനത്തിൽ നിന്ന് വാണിജ്യവൽക്കരണത്തിലേക്ക് മാറുന്നതിനും, ഘടനാപരമായ പരിശീലനത്തിലൂടെയും കപ്പാസിറ്റി ബിൽഡിംഗ് പരിപാടികളിലൂടെയും എ.ഐ-അനുബന്ധ കഴിവുകൾ വികസിപ്പിക്കുന്നതിനും, കേരളത്തിൻറെ സാമൂഹിക-സാമ്പത്തിക ആവശ്യങ്ങൾ പ്രത്യേകമായി അഭിസംബോധന ചെയ്യുന്ന എ.ഐ പരിഹാരങ്ങൾ വികസിപ്പിക്കുന്നതിനും ഇത് സ്റ്റാർട്ടപ്പുകളെ പിന്തുണയ്ക്കും.

എ.ഐ ലാബുകളും ഉയർന്ന പ്രകടനമുള്ള കമ്പ്യൂട്ടിംഗ് ഇൻഫ്രാസ്ട്രക്ചറും ഉള്ള ഭൗതിക സൗകര്യത്തിൽ നിന്നാണ് സെൻറർ തുടക്കത്തിൽ പ്രവർത്തിക്കുക. എക്സിക്യൂട്ടീവ് കമ്മിറ്റിയും പ്രോജക്ട് മാനേജ്മെൻറ് കമ്മിറ്റിയും നിയന്ത്രിക്കുന്ന ഒരു സ്വതന്ത്ര സെക്ഷൻ -8 കമ്പനിയായി മാറാനും സാധ്യതയുമുണ്ട്.

പ്രായോഗിക എ.ഐ ഗവേഷണം, ഹാക്കത്തോൺ, വർക്ക് ഷോപ്പ്, സ്റ്റാർട്ടപ്പ് ഇൻകുബേഷൻ മെൻറർഷിപ്പ്, ആക്സിലറേറ്റർ, ഫണ്ടിംഗ് ഫെസിലിറ്റേഷൻ, വാണിജ്യവൽക്കരണത്തിനായുള്ള വ്യവസായ സഹകരണം, മേഖലാ-നിർദ്ദിഷ്ട എ.ഐ സൊല്യൂഷനുകളുടെ വികസനം എന്നിവ ഇതിൻറെ പ്രവർത്തനങ്ങളിൽ ഉൾപ്പെടും.

ഇന്ത്യ എഐ മിഷൻറെ ഭാഗമായ ഈ രണ്ട് കേന്ദ്രങ്ങളും ഒരേ ദർശനത്തിൽ ഊന്നിനിന്നാണ് പ്രവർത്തിക്കുക. കെഎസ്യുഎം ബയോ-എഐ സിഒഇ ലൈഫ് സയൻസസിലും കാർഷിക സാങ്കേതികവിദ്യയിലും ആഴത്തിലുള്ള സാങ്കേതികവിദ്യ, ഐപി നേതൃത്വത്തിലുള്ള, വ്യവസായ-ബന്ധിത നവീകരണം പ്രാപ്തമാക്കും. അതേസമയം ഡിയുകെ-എഐ സിഒഇ പൊതു-ഉദ്ദേശ്യ എഐയിൽ ഗവേഷണ മികവ്, പ്രതിഭാ വികസനം, സ്റ്റാർട്ടപ്പ് വാണിജ്യവൽക്കരണം എന്നിവയിൽ ശ്രദ്ധ കേന്ദ്രീകരിക്കുന്നു. കേരളത്തിലെ രണ്ട് പ്രമുഖ സാങ്കേതിക കേന്ദ്രങ്ങളായ കൊച്ചിയിലും തിരുവനന്തപുരത്തും സ്ഥിതിചെയ്യുന്ന ഇവ ഇന്ത്യയുടെ ദേശീയ എഐ ദൗത്യത്തിലേക്കുള്ള സംസ്ഥാനത്തിൻറെ സംഭാവനയുടെ നട്ടെല്ലാണ്.

ഇന്ത്യ എഐ മിഷനെക്കുറിച്ച്

ഇന്ത്യയെ ആഗോള എഐ നേതാവായി സ്ഥാപിക്കുന്നതിലൂടെ, കമ്പ്യൂട്ട്, ഡാറ്റ, സ്റ്റാർട്ടപ്പ് ഫിനാൻസിംഗ് എന്നിവയിലേക്കുള്ള പ്രവേശനം ജനാധിപത്യവൽക്കരിക്കുന്ന സമഗ്രമായ എഐ ആവാസവ്യവസ്ഥ കെട്ടിപ്പടുക്കുകയെന്ന ലക്ഷ്യത്തോടെ കേന്ദ്ര ഇലക്ട്രോണിക്സ് ആൻഡ് ഇൻഫർമേഷൻ ടെക്നോളജി മന്ത്രാലയത്തിൻറെ കീഴിലുള്ള ദേശീയ സംരംഭമാണ് ഇന്ത്യ എഐ മിഷൻ.

കേരള സ്റ്റാർട്ടപ്പ് മിഷനെക്കുറിച്ച് (കെഎസ്യുഎം)

സംരംഭകത്വ വികസനത്തിനും ഇൻകുബേഷനുമുള്ള കേരള സർക്കാരിൻറെ നോഡൽ ഏജൻസിയും ബയോ-എഐ സെൻറർ ഓഫ് എക്സലൻസിൻറെ നിർവ്വഹണ ഏജൻസിയുമാണ് കേരള സ്റ്റാർട്ടപ്പ് മിഷൻ.

ഡിജിറ്റൽ യൂണിവേഴ്സിറ്റി കേരളയെക്കുറിച്ച് (ഡിയുകെ)

സാങ്കേതികവിദ്യ, നവീകരണം, സമൂഹം എന്നിവയിലൂടെ വിദ്യാഭ്യാസത്തിൻറെയും ഗവേഷണത്തിൻറെ വളർച്ച ലക്ഷ്യമിടുന്ന ഇന്ത്യയിലെ ആദ്യത്തെ ഡിജിറ്റൽ യൂണിവേഴ്സിറ്റിയാണ് ഡിജിറ്റൽ യൂണിവേഴ്സിറ്റി കേരള..