കേന്ദ്ര കൃഷി കർഷക ക്ഷേമ മന്ത്രാലയത്തിനു കീഴിൽ തിരുവനന്തപുരത്തെ ശ്രീകാര്യത്തുള്ള കേന്ദ്ര കിഴങ്ങു വർഗ വിള ഗവേഷണ കേന്ദ്രം (ഐസിഎആർ-സിടിസിആർഐ) തമിഴ്നാട് ഹോർട്ടികൾച്ചർ വകുപ്പുമായി സഹകരിച്ച് തിരുനെൽവേലിയിൽ ഏകദിന കർഷക പരിശീലന പരിപാടി സംഘടിപ്പിച്ചു. തിരുനെൽവേലിയിലെ പല്ലക്കൽ പോത്തുകുടി, പപ്പക്കുടി, അംബാസമുദ്രം എന്നിവിടങ്ങളിൽ നടന്ന പരിപാടിയിൽ ഉഷ്ണമേഖലാ കിഴങ്ങുവർഗ്ഗ വിളകളുടെ മെച്ചപ്പെട്ട സാങ്കേതികവിദ്യകളെക്കുറിച്ചും കാർഷിക സാമഗ്രികളുടെ വിതരണത്തെക്കുറിച്ചും അവതരണം നടന്നു. കിഴങ്ങുവർഗ്ഗ വിളകളുടെ ശാസ്ത്രീയ കൃഷിയിലൂടെ അറിവും വരുമാനവും വർദ്ധിപ്പിക്കുക എന്ന ലക്ഷ്യത്തോടെ പ്രദേശത്തെ പട്ടികജാതി വിഭാഗത്തിൽ നിന്നുള്ള നൂറ് കർഷകർ പരിപാടിയിൽ പങ്കെടുത്തു.

മെച്ചപ്പെട്ട ഉയർന്ന വിളവ് നൽകുന്ന കിഴങ്ങുവർഗ്ഗ വിളകൾ, ശാസ്ത്രീയ കൃഷിയും വിള പരിപാലന രീതികളും, സംയോജിത പോഷക-കീട പരിപാലനവും, മൂല്യവർദ്ധനവും സംരംഭക അവസരങ്ങളും എന്നീ മേഖലകളിൽ അവബോധമുണർത്തുന്ന ക്ലാസുകളാണ് സംഘടിപ്പിച്ചത്.

പിന്തുണ സംരംഭത്തിന്റെ ഭാഗമായി, ഓരോ പട്ടികജാതി ഗുണഭോക്താവിനും ചേന, മരച്ചീനി, ചൈനീസ് ഉരുളക്കിഴങ്ങ് എന്നിവയുടെ ഗുണനിലവാരമുള്ള നടീൽ വസ്തുക്കളും യൂറിയ, ഫോസ്ഫറസ്, പൊട്ടാഷ് വളങ്ങൾ, സ്പ്രേയറുകൾ, ഹോസുകൾ, സ്പേഡുകൾ, പിക്കാക്സ്, മൈക്രോ ന്യൂട്രിയന്റുകൾ തുടങ്ങിയ അവശ്യ സാമഗ്രികളും വിതരണം ചെയ്തു.

ഈ രംഗത്ത് പ്രതീക്ഷയുള്ള കർഷകരെ കിഴങ്ങുവർഗ്ഗ വിളകളുടെ വിത്ത് ഉല്പാദകരായി രജിസ്റ്റർ ചെയ്ത്, അവരിൽ നിന്ന് നടീൽ വസ്തുക്കൾ പണമടച്ചുള്ള അടിസ്ഥാനത്തിൽ സംഭരിക്കാനും, അധിക വരുമാന അവസരങ്ങൾ സൃഷ്ടിക്കാനും, പ്രാദേശികമായി ഗുണനിലവാരമുള്ള വിത്ത് വസ്തുക്കളുടെ ലഭ്യത ഉറപ്പാക്കാനും സി ടി സി ആർ ഐ പദ്ധതിയിട്ടിട്ടുണ്ട്.

ഐസിഎആർ-സിടിസിആർഐയിൽ നിന്നുള്ള ഡോ. സി. മോഹൻ, ഡോ. കെ. സുനിൽകുമാർ, ഡോ. പി. പ്രകാശ് എന്നിവർ പരിപാടി ഏകോപിപ്പിച്ചു. പരിശീലന പരിപാടി പഞ്ചായത്ത് പ്രസിഡന്റ് ശ്രീ. പി. രാമചന്ദ്രു ഉദ്ഘാടനം ചെയ്തു. ഹോർട്ടികൾച്ചറൽ ഓഫീസർ ശ്രീ. വി. വിഘ്നേഷ്, അസിസ്റ്റന്റ് കൃഷി ഓഫീസർ ശ്രീ. ബി. മാത്യു, പഞ്ചായത്ത് പ്രസിഡന്റ് ശ്രീ. പി. രാമചന്ദ്രു, പഞ്ചായത്ത് വൈസ് പ്രസിഡന്റ് ശ്രീ. ഡി. സെൽവം എന്നിവർ സന്നിഹിതരായിരുന്നു.