നിങ്ങൾ എത്രത്തോളം സാമ്പത്തികം ഉണ്ടാക്കിയാലും അത് നിലനിർത്താൻ കഴിയാതെ പോകുന്ന ഒരു അനുഭവം നിങ്ങളിൽ പലർക്കും ഉണ്ടായിട്ടുണ്ടാകാം. ഇതിന്റെ കാരണം പലപ്പോഴും വരുമാനക്കുറവല്ല, മറിച്ച് പണത്തെക്കുറിച്ചുള്ള തെറ്റായ ധാരണകളാണ്. ബാല്യകാലത്ത് മനസ്സിൽ പതിഞ്ഞ ചില വിശ്വാസങ്ങൾ, നമ്മൾ അറിയാതെ തന്നെ നമ്മുടെ സാമ്പത്തിക തീരുമാനങ്ങളെ നിയന്ത്രിച്ചേക്കാം.

കുട്ടിക്കാലത്ത് കേട്ടു വളർന്ന ചില വാക്കുകൾ-'പണം അപകടമാണ്'', ''പണക്കാരെല്ലാം ദുഷ്ടരാണ്'', ''സമ്പന്നരെ ദൈവം ശിക്ഷിക്കും'' എന്നിങ്ങനെയുള്ള ധാരണകൾ-ഉപബോധമനസ്സിൽ ആഴത്തിൽ പതിയും. പിന്നീട് ജീവിതത്തിൽ സാമ്പത്തികം ലഭിക്കുമ്പോൾ പോലും, ഈ വിശ്വാസങ്ങൾ പണം നിലനിർത്താൻ കഴിയാത്ത രീതിയിൽ നമ്മെ പെരുമാറാൻ പ്രേരിപ്പിക്കും. ഇതിന്റെ ഫലമായി, സമ്പത്ത് അനാവശ്യമായി ചെലവഴിക്കുന്ന പ്രവണത ഉണ്ടാകാം.

സിനിമകളും സമൂഹവും ഈ തെറ്റായ ധാരണകളെ ശക്തിപ്പെടുത്താറുണ്ട്. പല സിനിമകളിലും സമ്പന്നർ വില്ലന്മാരായി ചിത്രീകരിക്കപ്പെടുന്നത് സാധാരണമാണ്. ഇത്തരത്തിലുള്ള ദൃശ്യങ്ങൾ കണ്ടു വളരുന്നവർക്ക്, സമ്പത്ത് നെഗറ്റീവ് ആയി കാണുന്ന മനോഭാവം രൂപപ്പെടാൻ സാധ്യതയുണ്ട്. ഇത് അറിയാതെയെങ്കിലും പണം വേഗത്തിൽ കൈവിട്ടുപോകുന്ന പ്രവണതയ്ക്ക് വഴിയൊരുക്കുന്നു.

ഈ രീതിയിൽ പ്രവർത്തിക്കുന്നത് പലപ്പോഴും ബോധപൂർവമല്ല. ഉപബോധമനസ്സിൽ പതിഞ്ഞ വിശ്വാസങ്ങളാണ് തീരുമാനങ്ങളെ നിയന്ത്രിക്കുന്നത്. അതുകൊണ്ടാണ്, ചിലർ ഏറെ പണം സമ്പാദിച്ചിട്ടും അത് ദീർഘകാലം നിലനിർത്താൻ കഴിയാതെ പോകുന്നത്. പ്രശ്നം പണത്തിലല്ല, പണത്തെക്കുറിച്ചുള്ള മനോഭാവത്തിലാണ്.

അതുകൊണ്ട് മാറ്റം തുടങ്ങേണ്ടത് മനസ്സിൽ നിന്നാണ്, പ്രത്യേകിച്ച് ബിസിനസ്സ് ചെയ്യുന്നവരും സാമ്പത്തികം കൂടുതൽ കൈകാര്യം ചെയ്യുന്നവരും. സമ്പത്തിനെക്കുറിച്ചുള്ള നെഗറ്റീവ് ധാരണകൾ തിരിച്ചറിഞ്ഞ് അവ മാറ്റാൻ ശ്രമിക്കണം. പണം ഒരു പ്രശ്നമല്ല, മറിച്ച് ഒരു ഉപകരണമാണെന്ന ബോധം വളർത്തേണ്ടതാണ്.

മെഡിറ്റേഷൻ പോലുള്ള അഭ്യാസങ്ങൾ വഴി ഉപബോധമനസ്സിനെ പരിശീലിപ്പിച്ച് സമ്പത്തിനെ ഒരു പോസിറ്റീവ് എനർജിയായി കാണാൻ പഠിക്കാം. പണത്തോടുള്ള ആരോഗ്യകരമായ ബന്ധമാണ് ദീർഘകാല സാമ്പത്തിക സ്ഥിരതക്കും വളർച്ചക്കും അടിസ്ഥാനം.