കേരളത്തിൽ ദിവസേന അനേകം ചെറുകിട ബിസിനസുകൾ ആരംഭിക്കപ്പെടുന്നു. എന്നാൽ അതിൽ ഭൂരിഭാഗവും ഒരു വർഷം പിന്നിടും മുമ്പ് തന്നെ അടഞ്ഞുപോകുന്നു. പലർക്കും നല്ല ഉൽപ്പന്നവുമുണ്ട്, നല്ല ഉദ്ദേശവുമുണ്ട്, പക്ഷേ വിജയത്തിലേക്ക് എത്താൻ കഴിയുന്നില്ല. എന്താണ് അതിന് പിന്നിലെ പ്രധാന കാരണങ്ങൾ? നോക്കാം.

പ്ലാനിംഗ് ഇല്ലായ്മ

ഒരു ബിസിനസിന്റെ വിജയത്തിന് പിന്നിൽ നല്ലൊരു ബിസിനസ് പ്ലാനാണ് അടിസ്ഥാനം. പലരും ഉത്സാഹത്തോടെ സംരംഭം തുടങ്ങുന്നു, പക്ഷേ മാർക്കറ്റ് എങ്ങനെ പ്രവർത്തിക്കുന്നു, ഉപഭോക്താവ് ആരാണ്, എത്രയാണ് ആവശ്യമായ നിക്ഷേപം - ഇവ ഒന്നും വ്യക്തമായി ആലോചിക്കാതെ തുടക്കമെടുക്കുന്നു. ഫലമായി, ചില മാസങ്ങൾക്കുള്ളിൽ തന്നെ ദിശയില്ലാത്ത ഒരു യാത്രയായി മാറുന്നു.

ധനനിർവഹണത്തിലെ പിഴവ്

ലാഭം എവിടെ നിന്നാണ് വരുന്നത്, നഷ്ടം എവിടെ പോകുന്നു, ചെലവുകൾ എങ്ങനെ നിയന്ത്രിക്കാം - ഈ അടിസ്ഥാന കാര്യങ്ങൾ അറിയാതെ ബിസിനസ് നടത്തുന്നത് അപകടകരമാണ്. ചിലപ്പോൾ വിറ്റുവരവുണ്ടായാലും കാഷ് ഫ്ലോ മാനേജ്മെന്റ് ഇല്ലാത്തതിനാൽ ബിസിനസ്സ് കടബാധ്യതയിലാകുന്നു. ഫിനാൻഷ്യൽ ഡിസിപ്ലിൻ ഇല്ലെങ്കിൽ, വലിയ ബിസിനസും തകരാം.

മാർക്കറ്റിംഗിനോടുള്ള അവഗണന

നല്ല ഉൽപ്പന്നം ഉണ്ടെങ്കിൽ അത് വിറ്റുപോകും എന്ന ധാരണ ഇപ്പോൾ കാലഹരണപ്പെട്ടു. ഇന്നത്തെ ലോകത്ത് പരസ്യവും ബ്രാൻഡ് പ്രമോഷനും അത്യാവശ്യമാണ്. ഡിജിറ്റൽ മാർക്കറ്റിംഗിലൂടെ കസ്റ്റമറുമായി ബന്ധം നിലനിർത്താനും പുതിയ ഉപഭോക്താക്കളെ ആകർഷിക്കാനുമാണ് വിജയം. മാർക്കറ്റിംഗ് ഇല്ലാത്ത ബിസിനസ് ഇരുട്ടിലൊരു വിളക്ക് പോലെ ആകും പ്രകാശമുണ്ടെങ്കിലും ആരും കാണില്ല.

ടീം കോർഡിനേഷൻ കുറവ്

ഒറ്റയാൾക്ക് ഒരു സംരംഭം മുന്നോട്ട് കൊണ്ടുപോകാൻ സാധിക്കില്ല. നല്ല ഒരു ടീം ഉണ്ടാകണം, അവരുമായി വ്യക്തമായ ആശയവിനിമയം വേണം. അഭിപ്രായ വ്യത്യാസങ്ങൾ ഉണ്ടാവാം, പക്ഷേ ഉദ്ദേശ്യം ഒന്നായിരിക്കണം. ടീമിലെ അംഗങ്ങൾ ലക്ഷ്യവുമായി ചേർന്ന് പ്രവർത്തിക്കുമ്പോഴാണ് വളർച്ച ഉറപ്പാകുന്നത്.

മാറ്റങ്ങളെ സ്വീകരിക്കാത്തത്,

ബിസിനസ് ലോകം ദിവസേന മാറിക്കൊണ്ടിരിക്കുന്നു പുതിയ ടെക്നോളജികൾ, പുതിയ ട്രെൻഡുകൾ, പുതിയ ഉപഭോക്തൃ മനോഭാവങ്ങൾ. ഇവയെ മനസ്സിലാക്കി അതനുസരിച്ച് മാറാൻ തയ്യാറല്ലെങ്കിൽ ബിസിനസ്സ് പിന്നിലാകും. ഇന്നത്തെ വിജയികൾ അവർ തന്നെയാണ് ''മാറ്റം തന്നെയാണ് വളർച്ചയുടെ അടിസ്ഥാനം'' എന്ന് മനസ്സിലാക്കിയവർ.

പരാജയം ഭയപ്പെടേണ്ട ഒന്നല്ല. പക്ഷേ പരാജയത്തിൽ നിന്ന് പാഠമെടുക്കാത്തതാണ് അപകടം. നല്ല പ്ലാനിംഗ്, കൃത്യമായ ധനനിര്വ്വഹണം, ശക്തമായ മാർക്കറ്റിംഗ്, ടീം സ്പിരിറ്റ്, പുതുമ സ്വീകരിക്കാനുള്ള മനസ്സ് ഇവയാണ് വിജയകരമായ ചെറുകിട ബിസിനസിന്റെ അടിസ്ഥാനം.
ഒരു ബിസിനസുകാരൻ ഈ അഞ്ച് മേഖലകളിലും ശ്രദ്ധ പുലർത്തുന്നുവെങ്കിൽ, അദ്ദേഹത്തിന്റെ സംരംഭം തീർച്ചയായും വിജയത്തിലേക്ക് കുതിക്കും.