കൊച്ചി: വിപണിയിലെത്തി ഒരുവർഷം കൊണ്ട് തന്നെ ബ്ലോക്ബസ്റ്ററായി മഹീന്ദ്രയുടെ ഇലക്ട്രിക് ഒറിജിൻ എസ്യുവികളായ എക്സ്ഇവി 9ഇ, ബിഇ 6 മോഡലുകൾ. കഴിഞ്ഞ നവംബറിലാണ് മഹീന്ദ്ര രണ്ട് പ്യുവർ ഇലക്ട്രിക് ഒറിജിൻ എസ്യുവികൾ പുറത്തിറക്കിയത്. പിന്നാലെ ഇന്ത്യൻ ഇവി വിപണിയിൽ വൻ തരംഗമാണ് ഇരുമോഡലുകളും സൃഷ്ടിച്ചത്. ഓരോ 10 മിനിറ്റിലും ഒരെണ്ണം എന്ന രീതിയിൽ, ഏകദേശം ഏഴ് മാസത്തിനുള്ളിൽ 30,000-ൽ അധികം മഹീന്ദ്ര ഇലക്ട്രിക് ഒറിജിൻ എസ്യുവികളാണ് റോഡിൽ എത്തിയത്. ഇത് വിപണിയിലെ പുതിയ നേട്ടമാണ്.

1000-ൽ അധികം മഹീന്ദ്ര ഇലക്ട്രിക് ഒറിജിൻ എസ്യുവികൾ ഏതാനും മാസങ്ങൾക്കുള്ളിൽത്തന്നെ 20,000 കിലോമീറ്റർ പിന്നിട്ടിരുന്നു. ചിലത് ഏഴ് മാസത്തിനുള്ളിൽ 50,000 കിലോമീറ്റർ എന്ന നാഴികക്കല്ലും മറികടന്നു. 70 ശതമാനം വാഹനങ്ങൾ എല്ലാ മാസവും 1,000 കിലോമീറ്റർ അധികം ഓടിക്കുന്നുവെന്ന പ്രത്യേകതയുമുണ്ട്. 65 ശതമാനം വാഹനങ്ങളും എല്ലാ പ്രവൃത്തി ദിവസവും വാഹനം നിരത്തിലിറക്കുന്നുണ്ട്. ഉടമകൾ മൊത്തത്തിൽ 200 ദശലക്ഷം കിലോമീറ്ററിലധികം ഓടിച്ചുവെന്നതും ശ്രദ്ധേയമാണ്.

എക്സ്ഇവി 9ഇ, ബിഇ 6 മോഡലുകളുടെ വിപണി അവതരണം 4 ബില്യണിലധികം കാഴ്ചക്കാരെ നേടി. ഈ വർഷത്തെ ഏറ്റവും കൂടുതൽ ചർച്ച ചെയ്യപ്പെട്ട ഇന്ത്യൻ വാഹനങ്ങളെന്ന സവിശേഷതയും ഇരു മോഡലുകൾക്കുമുണ്ട്. നിലവിൽ ആഡംബര വാഹന പ്രേമികൾക്ക് പുറമേ ബിസിനസ് പ്രമുഖർ, ഉന്നത സർക്കാർ ഉദ്യോഗസ്ഥർ തുടങ്ങി എല്ലാവരുടെയും ഇഷ്ട ഇവി മോഡലും മഹീന്ദ്രയുടെ ഇലക്ട്രിക് ഒറിജിൻ എസ്യുവികൾ തന്നെയാണ്. ഏത് കാലാവസ്ഥയിലും സുഗമമായ റൈഡിങാണ് മഹീന്ദ്ര ഇലക്ട്രിക് ഒറിജിൻ എസ്യുവികൾ വാഗ്ദാനം ചെയ്യുന്നത്. ഏകദേശം 60 ശതമാനം മഹീന്ദ്ര ഇലക്ട്രിക് ഒറിജിൻ എസ്യുവികൾക്കും 500 കിലോമീറ്ററിലധികം സിറ്റി റേഞ്ച് ലഭിക്കുന്നുണ്ടെന്ന് ഉടമകൾ തന്നെ സാക്ഷ്യപ്പെടുത്തുന്നു.

എക്സ്ഇവി 9ഇ, ബിഇ 6 മോഡലുകൾ സ്വന്തമാക്കുന്ന പത്തിൽ എട്ടുപേരും മുമ്പ് ഒരു മഹീന്ദ്ര വാഹനം സ്വന്തമാക്കുകയോ പരിഗണിക്കുകയോ ചെയ്തിട്ടില്ലെന്നതും ശ്രദ്ധേയമാണ്. ഇന്ത്യൻ ഗെയിമിങ് രംഗത്തെ അതികായകരായ ബിജിഎംഐയിൽ ആദ്യമായി ഫീച്ചർ ചെയ്യപ്പെടുന്ന ഇന്ത്യൻ ഓട്ടോ ബ്രാൻഡെന്ന നേട്ടം ബിഇ 6ലൂടെ സ്വന്തമാക്കിയ മഹീന്ദ്ര ഇലക്ട്രിക് ഒറിജിൻ, തങ്ങളുടെ 999 യൂണിറ്റ് ബിഇ 6 ബാറ്റ്മാൻ ലിമിറ്റഡ് എഡിഷൻ രണ്ട് മിനിറ്റിനുള്ളിൽ വിറ്റഴിച്ചും പുതിയ ആഗോള റെക്കോഡ് സൃഷ്ടിച്ചിരുന്നു.