കൊച്ചി: സാങ്കേതികവിദ്യയിലെയും ഓട്ടോമേഷനിലെയും തുടർച്ചയായ നിക്ഷേപവും ചെലവ് നിയന്ത്രണ നടപടികളും ഐസിഐസിഐ പ്രുഡൻഷ്യൽ ലൈഫ് ഇൻഷുറൻസിന്റെ സേവിങ്സ് ബിസിനസിന്റെ കോസ്റ്റ്-ടു-പ്രിമിയം അനുപാതം 2027 സാമ്പത്തിക വർഷത്തിന്റെ ആദ്യ പാദത്തിൽ 13.6 ശതമാനമായി കുറയ്ക്കാൻ സഹായിച്ചു. ഇത് കഴിഞ്ഞ വർഷത്തേക്കാൾ 50 ബേസിസ് പോയിന്റ് കുറവാണ്.

എഐ, അനലിറ്റിക്സ്, ഐസിഐസിഐ പ്രു പാർട്ണർ സ്റ്റാക്ക്, ഐപ്രു എഡ്ജ് തുടങ്ങിയ ഡിജിറ്റൽ പ്ലാറ്റ്ഫോമുകൾ ഉപയോഗിച്ച് ഉപഭോക്തൃ സേവനവും വിതരണ ശൃംഖലയുടെ കാര്യക്ഷമതയും മെച്ചപ്പെടുത്തിയതായും, മാനുവൽ നടപടികൾ കുറച്ചതിലൂടെ ചെലവ് നിയന്ത്രിക്കാനും വേഗത്തിലുള്ള സേവനം നൽകാനും കഴിഞ്ഞതായും ഐസിഐസിഐ പ്രുഡൻഷ്യൽ ലൈഫ് ഇൻഷുറൻസിന്റെ ചീഫ് ടെക്നോളജി ഓഫീസർ ഗണേശൻ സൗന്ദിരം പറഞ്ഞു

2027 സാമ്പത്തിക വർഷത്തിന്റെ ആദ്യ പാദത്തിൽ ഡിജിറ്റൽ കെവൈസി ഉപയോഗിച്ചുള്ള പോളിസികളിൽ 58 ശതമാനവും സേവിങ്സ് പോളിസികളിൽ 54 ശതമാനവും അതേ ദിവസം തന്നെ ഇഷ്യൂ ചെയ്തു. 'ആസ്ക് ഖുശ്മാനി' ചാറ്റ്ബോട്ട്, വാട്ട്സ്ആപ്പ്, എഐ അധിഷ്ഠിത പ്രീ-ക്ലെയിം വിലയിരുത്തൽ എന്നിവയിലൂടെ ക്ലെയിം സേവനങ്ങളും വേഗത്തിലാക്കി.

എഐ അധിഷ്ഠിത അണ്ടർറൈറ്റിംഗ് മോഡലുകൾ പോളിസി തുടർച്ചയും ക്ലെയിമുകളും വിലയിരുത്താൻ ഉപയോഗിച്ചതോടെ, അന്വേഷണത്തിന് വിധേയമല്ലാത്ത വ്യക്തിഗത ക്ലെയിമുകൾ ശരാശരി ഒരു ദിവസത്തിനുള്ളിൽ തീർപ്പാക്കാനായി. ഇതോടെ കമ്പനി 99.3 ശതമാനം ക്ലെയിം സെറ്റിൽമെന്റ് അനുപാതം കൈവരിച്ചു.

ഐപ്രു എഡ്ജ് ആപ്പിലൂടെ പോളിസി വിൽപ്പനയും അതേ ദിവസത്തെ പോളിസി ഇഷ്യൂവും കൂടുതൽ കാര്യക്ഷമമാക്കിയതായി കമ്പനി അറിയിച്ചു. ഉപഭോക്തൃ സേവനത്തിൽ 25 വർഷം പൂർത്തിയാക്കുന്ന വേളയിൽ, സാങ്കേതികവിദ്യ അധിഷ്ഠിത വളർച്ചാ തന്ത്രം തുടരുമെന്നും കമ്പനി വ്യക്തമാക്കി.