യാത്ര പോകുമ്പോൾ താമസിക്കാൻ റൂം എടുക്കുന്നത് സാധാരണ കാര്യമാണ്. പക്ഷേ, സൗകര്യവും വിലയും മാത്രം നോക്കിയാൽ പോരാ. സുരക്ഷയും സ്വകാര്യതയും ഉറപ്പാക്കുന്നത് അതിലും പ്രധാനമാണ്.

റൂം ബുക്ക് ചെയ്യുന്നതിന് മുമ്പ് ആ ഹോട്ടലിന്റെയോ ലോഡ്ജിന്റെയോ റിവ്യൂസ് പരിശോധിക്കുക. Google review, customer photos, location എന്നിവ നോക്കിയാൽ സ്ഥലത്തെക്കുറിച്ച് ഏകദേശ ധാരണ ലഭിക്കും. വളരെ കുറഞ്ഞ നിരക്കിൽ സംശയാസ്പദമായ ഓഫറുകൾ കണ്ടാൽ സൂക്ഷിക്കണം.

റൂമിൽ പ്രവേശിച്ച ഉടനെ വാതിൽ ലോക്ക് ശരിയായി പ്രവർത്തിക്കുന്നുണ്ടോ എന്ന് പരിശോധിക്കുക. ഡോർ ചെയിൻ, ലാച്ച്, പീപ് ഹോൾ എന്നിവ ശരിയായ നിലയിലാണോ എന്നും ഉറപ്പാക്കണം. വാതിലോ ജനലോ കേടായതായി തോന്നിയാൽ ഉടൻ തന്നെ റൂം മാറ്റാൻ ആവശ്യപ്പെടണം.

റൂമിന്റെ അകത്ത് കയറുന്ന ഉടനെ ബാത്ത്റൂം, അലമാര, കർട്ടൻ പിന്നിൽ, ബെഡ് സമീപം തുടങ്ങിയ സ്ഥലങ്ങൾ ഒന്ന് പരിശോധിക്കുന്നത് നല്ലതാണ്. സംശയകരമായ വയർ, ചെറിയ ക്യാമറ പോലുള്ള വസ്തുക്കൾ, അന്യമായ ഇലക്ട്രോണിക് ഉപകരണങ്ങൾ എന്നിവ കണ്ടാൽ റിസപ്ഷനിൽ അറിയിക്കുക.

നിങ്ങളുടെ ഐഡി കാർഡിന്റെ കോപ്പി കൊടുക്കുമ്പോൾ അതിൽ 'Hotel stay purpose only' എന്ന് എഴുതിവെക്കുന്നത് നല്ലതാണ്. ഇത് ദുരുപയോഗം കുറയ്ക്കാൻ സഹായിക്കും.

രാത്രിയിൽ അന്യരോട് വാതിൽ തുറക്കരുത്. ആരെങ്കിലും ഹോട്ടൽ സ്റ്റാഫ് ആണെന്ന് പറഞ്ഞാലും ആദ്യം റിസപ്ഷനിൽ വിളിച്ച് സ്ഥിരീകരിക്കുക. അതുപോലെ നിങ്ങളുടെ റൂം നമ്പർ അനാവശ്യമായി മറ്റുള്ളവരോട് പറയാതിരിക്കുക.

വിലപ്പെട്ട സാധനങ്ങൾ തുറന്നിടരുത്. പണം, ആഭരണം, പാസ്പോർട്ട്, പ്രധാന രേഖകൾ എന്നിവ സുരക്ഷിതമായി സൂക്ഷിക്കുക. കഴിയുമെങ്കിൽ ലോക്കർ ഉപയോഗിക്കുക.

യാത്രയുടെ സന്തോഷം പൂർണ്ണമാകണമെങ്കിൽ സുരക്ഷയും കൂടെ വേണം. ചെറിയ മുൻകരുതലുകൾ വലിയ അപകടങ്ങൾ ഒഴിവാക്കും. അതുകൊണ്ട് റൂം എടുക്കുന്നതിന് മുൻപും എടുത്ത ശേഷവും ഈ കാര്യങ്ങൾ ശ്രദ്ധിക്കുക. സുരക്ഷിതമായ യാത്രയാണ് സന്തോഷകരമായ യാത്ര.