Sections

ആവശ്യ മരുന്നുകള്‍ക്ക് വില കൂട്ടുമ്പോഴും ജന്‍ ഔഷധിയില്‍ മരുന്നുകള്‍ക്ക് വിലക്കുറവ് തന്നെ

Sunday, Apr 24, 2022
Reported By Ambu Senan
Jan Aushadi

രാജ്യത്തെ പിഎംജെകെ മരുന്ന് സംഭരണ കേന്ദ്രങ്ങള്‍ നിലവിലുള്ള സാഹചര്യത്തില്‍ അഹോരാത്രം പ്രവര്‍ത്തിച്ചു വരികയാണ്
 

പുതിയ സാമ്പത്തിക വര്‍ഷം ഏപ്രിലില്‍ ആരംഭിച്ചത് ജനങ്ങളുടെ തലയില്‍ അമിത ഭാരം അടിച്ചേല്‍പ്പിച്ചു കൊണ്ടാണ്. മരുന്നുകള്‍ക്ക് ഉള്‍പ്പെടെ ഭീമമായ വിലവര്‍ദ്ധന വരുത്തി ജീവിതഭാരം ഉയര്‍ത്താന്‍ സര്‍ക്കാരുകള്‍ മത്സരിക്കുന്ന കാഴ്ചയാണ് കാണുന്നത്.

ജീവന്‍രക്ഷാ മരുന്നുകള്‍ക്കടക്കം നാഷണല്‍ ഫാര്‍മസ്യൂട്ടിക്കല്‍ പ്രൈസിംഗ് അതോറിറ്റിയുടെ വിലനിയന്ത്രണ പട്ടികയില്‍ ഉള്‍പ്പെടുന്ന 871 ഓളം രാസമൂലകങ്ങള്‍ അടങ്ങിയ മരുന്നുകള്‍ക്ക് 10. 7 ശതമാനം വിലവര്‍ദ്ധന നടപ്പാക്കിയാണ് സര്‍ക്കാര്‍ ഇരുട്ടടി നല്‍കിയത്. സാധാരണ ഒന്ന് മുതല്‍ നാല് ശതമാനം വരെ മാത്രമാണ് വാര്‍ഷിക വര്‍ദ്ധന അനുവദിക്കുന്നത്. എന്‍.പി.പി.എ പട്ടികയില്‍ വരുന്ന 30,000 മുതല്‍ 40,000 വരെ ബ്രാന്റുകളിലുള്ള മരുന്നുകളാണ് വിപണിയിലുള്ളത്. പാരസെറ്റാമോള്‍ അടക്കമുള്ള വേദനസംഹാരികളും ആന്റിബയോട്ടിക്കുകളും ഇതില്‍ ഉള്‍പ്പെടും. പ്രമേഹം, കാന്‍സര്‍, ഹൃദ്രോഗം അടക്കമുള്ള രോഗികള്‍ക്ക് ഇനിമുതല്‍ കൂടുതല്‍ തുക മരുന്നിനായി കണ്ടെത്തേണ്ടി വരും. ഔഷധവില 20 ശതമാനം വരെ ഉടന്‍ വദ്ധിപ്പിക്കണമെന്ന് കഴിഞ്ഞ നവംബറില്‍ ആയിരത്തോളം കമ്പനികള്‍ കേന്ദ്രത്തോടാവശ്യപ്പട്ടിരുന്നു.

വിലകുറഞ്ഞതും കൂടിയതുമായ ബ്രാന്‍ഡഡ് മരുന്നുകളെക്കാള്‍ 60 ശതമാനം വരെ വിലക്കുറവില്‍ ജനറിക് മരുന്നുകള്‍ വിപണിയില്‍ ലഭ്യമാണെങ്കിലും സാധാരണക്കാരില്‍ നല്ലൊരു വിഭാഗവും ഇതെക്കുറിച്ച് ഇപ്പോഴും അജ്ഞരാണ്. ജന്‍ ഔഷധി പോലെയുള്ള മെഡിക്കല്‍ സ്റ്റോറുകളിലാണ് വിലക്കുറവില്‍ ജനറിക് മരുന്നുകള്‍ ലഭിക്കുന്നതെന്ന കാര്യം പാവങ്ങളെ അറിയിക്കാന്‍ ആവശ്യമായ പ്രചരണം നടത്തേണ്ട ഘട്ടമാണിത്. 

പൊതു വിപണിയിലെ മരുന്ന് കമ്പനികളുടെ ചൂഷണത്തില്‍ നിന്നും സാധാരണക്കാരേയും രോഗികള്‍ക്കും ആശ്വാസമേകുക എന്ന ലക്ഷ്യത്തോടെ കേന്ദ്ര സര്‍ക്കാര്‍ ആരംഭിച്ച പദ്ധതിയാണ് പ്രധാനമന്ത്രി ജന്‍ഔഷധി പരിയോജന. രാജ്യമൊട്ടാകെയുള്ള 8,012 ഓളം ജന്‍ ഔഷധി കേന്ദ്രങ്ങളിലൂടെ മിതമായ വിലയില്‍ മരുന്നുകളുടെ ലഭ്യത ഉറപ്പാക്കുകയാണ് ലക്ഷ്യം. രാജ്യത്തെ പിഎംജെകെ മരുന്ന് സംഭരണ കേന്ദ്രങ്ങള്‍ നിലവിലുള്ള സാഹചര്യത്തില്‍ അഹോരാത്രം പ്രവര്‍ത്തിച്ചു വരികയാണ്.

നിലവില്‍ 726 ജില്ലകളിലായി 6,300ലേറെ പിഎംജെകെ കേന്ദ്രങ്ങള്‍ ആണ് പ്രവര്‍ത്തിക്കുന്നത്. പിഎംബിജെപി പദ്ധതിയില്‍ 1,451 മരുന്നുകളും 240 സര്‍ജിക്കല്‍ ഉല്‍പന്നങ്ങളും ഉള്‍പ്പെടുന്നു.

പദ്ധതിയുടെ ലക്ഷ്യങ്ങള്‍

1. എല്ലാ ജനവിഭാഗങ്ങള്‍ക്കും പ്രത്യേകിച്ച് ദരിദ്രര്‍ക്കും ഗുണനിലവാരമുള്ള മരുന്നുകള്‍ ലഭ്യമാകുമെന്ന് ഉറപ്പാക്കുക.

2. ഉയര്‍ന്ന വിലയുടെ പര്യായമാണ് ഗുണനിലവാരം എന്ന ധാരണയെ ചെറുക്കുന്നതിന് വിദ്യാഭ്യാസത്തിലൂടെയും പ്രചാരണത്തിലൂടെയും ജനറിക് മരുന്നുകളെ കുറിച്ച് അവബോധം സൃഷ്ടിക്കുക.

3. പിഎംബിജെപി കേന്ദ്രങ്ങള്‍ തുറക്കുന്നതില്‍ വ്യക്തിഗത സംരംഭകരെ ഉള്‍പ്പെടുത്തി തൊഴില്‍ സൃഷ്ടിക്കുക.

പ്രധാന സവിശേഷതകള്‍

1. ജന്‍ഔഷധകേന്ദ്ര ഉടമകള്‍ക്ക് നല്‍കുന്ന ഇന്‍സെന്റീവ് നിലവിലുള്ള രൂപയില്‍ നിന്ന് വര്‍ദ്ധിപ്പിച്ചു.
നിലവിലുള്ള 2.50 ലക്ഷത്തില്‍ നിന്നും 5.00 ലക്ഷം രൂപയിലേക്കാണ് ഇത് വര്‍ദ്ധിപ്പിച്ചിരിക്കുന്നത്. അതിനായി പ്രതിമാസ പര്‍ച്ചേസുകളുടെ 15% രൂപ നല്‍കേണ്ടതുണ്ട്.

2. വടക്കുകിഴക്കന്‍ സംസ്ഥാനങ്ങളിലും ഹിമാലയന്‍ പ്രദേശങ്ങളിലും ദ്വീപ് പ്രദേശങ്ങളിലും പിന്നാക്ക പ്രദേശങ്ങളിലും തുറന്നിരിക്കുന്നതോ വനിതാ സംരംഭകര്‍, ദിവ്യാംഗ്, എസ്സി, എസ്ടികള്‍ തുറക്കുന്നതോ ആയ പിഎംബിജെപി കേന്ദ്രങ്ങള്‍ക്ക് ഫര്‍ണിച്ചറുകള്‍ക്കും ഫര്‍ണിച്ചറുകള്‍ക്കും കമ്പ്യൂട്ടറുകള്‍ക്കും പ്രിന്ററുകള്‍ക്കുമായി 2.00 ലക്ഷം നല്‍കും.

3. ജന്‍ ഔഷധി മരുന്നുകളുടെ വില പൊതുവിപണിയിലെ ബ്രാന്‍ഡഡ് മരുന്നുകളുടെ വിലയേക്കാള്‍ 50%-90% കുറവാണ്.

4. ലോകാരോഗ്യ സംഘടനയില്‍ നിന്ന് മാത്രമാണ് മരുന്നുകള്‍ വാങ്ങുന്നത് - ഉല്‍പ്പന്നങ്ങളുടെ ഗുണനിലവാരം ഉറപ്പുവരുത്തുന്നതിനായി നല്ല നിര്‍മ്മാണ രീതികള്‍ (WHO-GMP) സാക്ഷ്യപ്പെടുത്തിയ വിതരണക്കാരില്‍ നിന്നുമാണ് ഇത് വാങ്ങുന്നത്.

5. മികച്ച ഗുണനിലവാരം ഉറപ്പുവരുത്തുന്നതിനായി 'നാഷണല്‍ അക്രഡിറ്റേഷന്‍ ബോര്‍ഡ് ഫോര്‍ ടെസ്റ്റിംഗ് ആന്‍ഡ് കാലിബ്രേഷന്‍ ലബോറട്ടറീസ്' അംഗീകൃത ലബോറട്ടറികളില്‍ ഓരോ ബാച്ച് മരുന്നും പരീക്ഷിക്കുന്നുണ്ട്.

മരുന്നുകളുടെ ലഭ്യത ഉറപ്പാക്കുന്നതിന് ഗുരുഗ്രാമിലെ കേന്ദ്ര സംഭരണകേന്ദ്രത്തിന് പുറമെ ഗുവാഹട്ടിയിലും ചെന്നൈയിലുമുള്ള പ്രാദേശിക സംഭരണശാലകളും 50 ഓളം വിതരണക്കാരും പൂര്‍ണതോതില്‍ പ്രവര്‍ത്തിക്കുകയാണ്.

സമീപത്തെ ജന്‍ഔഷധി കേന്ദ്രം ഏതെന്ന് കണ്ടെത്തുന്നതിനും മരുന്നിന്റെ ലഭ്യതയേയും വിലയേയും കുറിച്ച് അറിയുന്നതിനും 'ജന്‍ഔഷധി സുഖം' എന്ന മൊബൈല്‍ ആപ്ലിക്കേഷനും ലഭ്യമാണ്. ഗൂഗിള്‍ പ്ലേ സ്റ്റോറില്‍ നിന്നോ ഐ ഫോണ്‍ സ്റ്റോറില്‍ നിന്നോ ഈ ആപ്ലിക്കേഷന്‍ ഡൗണ്‍ലോഡ് ചെയ്യാവുന്നതാണ്.


ഇവിടെ പോസ്റ്റു ചെയ്യുന്ന അഭിപ്രായങ്ങൾ THE LOCAL ECONOMY ടേതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും. കേന്ദ്ര സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.