കൊച്ചി: കണ്ടന്റ് ക്രിയേറ്റർമാരുടെ പ്രകടനം മെച്ചപ്പെടുത്താനും കൂടുതൽ വരുമാനം ലഭ്യമാക്കാനുമായി ആമസോൺ ഇൻഫ്ളുവൻസർ പ്രോഗ്രാമുമായി ബന്ധപ്പെട്ട് രൂപകൽപ്പന ചെയ്ത എലിവേറ്റ് പ്രോഗ്രാമിന് ആമസോൺ.ഇൻ തുടക്കം കുറിച്ചു. യോഗ്യരായ ക്രണ്ടന്റ് ക്രിയേറ്റർമാർക്ക് പ്രീമിയം അക്കൗണ്ട്, ഇൻക്രിമെന്റൽ കമ്മീഷൻ, ഉയർന്ന മൂല്യമുള്ള ബ്രാൻഡിലേക്കുള്ള പ്രവേശനം, ആമസോൺ ലൈവിലെ പങ്കാളിത്തം തുടങ്ങി വിവിധ സേവനങ്ങൾ എലിവേറ്റ് പ്രോഗ്രാമിലൂടെ ലഭിക്കും. വിദഗ്ദ്ധരുടെ നേതൃത്വത്തിലുള്ള വർക്ഷോപ്പുകളും പരിശീലന മൊഡ്യൂളുകളും ഉൾപ്പടെ ക്രിയേറ്റർ യൂണിവേഴ്സിറ്റിയിലൂടെയുള്ള നിരവധി നൈപുണ്യ വികസന അവസരങ്ങളും ആമസോൺ വാഗ്ദാനം ചെയ്യുന്നു.

കണ്ടന്റ് ക്രിയേറ്റർമാർക്ക് അവരുടെ ഉള്ളടക്ക തന്ത്രങ്ങൾ പരിഷ്കരിക്കാനും ഡിജിറ്റൽ ട്രെൻഡുകൾക്ക് മുന്നിൽ നിൽക്കാനും സുസ്ഥിര വളർച്ച കൈവരിക്കാനും സഹായിക്കുന്ന തരത്തിലാണിത് രൂപകൽപ്പന ചെയ്തിട്ടുള്ളത്. മികച്ച പ്രകടനം കാഴ്ചവെക്കുന്നവർക്ക് ഇൻസന്റീവുകൾക്ക് അർഹതയുണ്ടായിരിക്കും. 10 മടങ്ങ് അധിക വരുമാനം നേടാനുള്ള സാധ്യതയും പ്രീമിയം ഉൽപ്പന്നങ്ങളിലേക്കുള്ള ആക്സസും ആമസോണിന്റെ പ്രൊഡക്ഷൻ സ്റ്റുഡിയോകളുടെ ഉപയോഗവും ലഭിക്കും.

കണ്ടന്റ് ക്രിയേറ്റർമാർക്ക് തങ്ങൾ വലിയ പ്രാധാന്യമാണ് നൽകുന്നതെന്നും ആമസോണിന്റെ വിപുലമായ ദൗത്യത്തിലൂന്നി ഇവരുടെ വളർച്ചയ്ക്കും വികസനത്തിനും ആവശ്യമായ ഉപകരണങ്ങളും പിന്തുണയും നൽകുന്നതിലേക്കുള്ള പ്രധാനഘട്ടമാണ് എലിവേറ്റ് പ്രോഗ്രാമെന്ന് ഇന്ത്യയിലെയും ആമസോണിന്റെ വളർന്നു വരുന്ന മറ്റ് മാർക്കറ്റുകളിലേയും ഷോപ്പിംഗ് ഇനിഷിയേറ്റീവ്സ് ഡയറക്ടറായ സഹീദ് ഖാൻ പറഞ്ഞു. മുംബൈയിൽ ഇന്ത്യൻ ഇൻസ്റ്റിറ്റ്യൂട്ട് ഓഫ് ക്രിയേറ്റീവ് ടെക്നോളജീസ് സ്ഥാപിച്ചതടക്കം ക്രിയേറ്റർ ഇക്കണോമിയെ ശക്തിപ്പെടുത്താനായി കേന്ദ്ര സർക്കാർ മുന്നോട്ടു വെച്ച പദ്ധതികളുമായി ചേർന്ന് പ്രവർത്തിക്കുന്നതിൽ ആമസോൺ.ഇൻ അഭിമാനിക്കുന്നുണ്ടെന്നും അദ്ദേഹം പറഞ്ഞു.

ആമസോണിന്റെ പുതിയ എലിവേറ്റ് പ്രോഗ്രാം തന്റെ ജീവിതം മാറ്റി മറിക്കുമെന്ന് ആമസോൺ ഇൻഫ്ളുവൻസർ എലിവേറ്റ് പ്രോഗ്രാമിലെ പ്രമുഖ ഹോം & ലൈഫ്സ്റ്റൈൽ ഇൻഫ്ളുവൻസറും ഒരു ദശലക്ഷത്തിലധികം ഫോളോവേഴ്സുമുള്ള സോണിക ഖുരാന സേതി പറഞ്ഞു. കണ്ടന്റ് ക്രിയേറ്ററായി തുടക്കം കുറിക്കുമ്പോൾ ഇതിൽ നിന്നും എങ്ങനെ പണം സമ്പാദിക്കാമെന്ന് അറിയില്ലായിരുന്നു. സഹായിക്കാനും ഉപയോഗിക്കേണ്ട ടൂളുകൾ പരിചയപ്പെടുത്താനും ആരും ഉണ്ടായില്ല. എന്നാൽ ഇന്ന് എലവേറ്റ് പദ്ധതി വഴി തന്നെ സഹായിക്കാൻ ഒരു അക്കൗണ്ട് മാനേജറും വിവിധ ടൂളുകളും ലഭ്യമാണെന്നും ഇതുവഴി കൂടുതൽ വരുമാനം നേടാനാകുന്നുണ്ടെന്നും അവർ പറഞ്ഞു.

അക്കൗണ്ട് മാനേജറുടെ സേവനം, ഇൻസന്റീവുകൾ, അധിക വരുമാന സാധ്യത, അപ്സ്കിൽ വർക്ഷോപ്പുകൾ തുടങ്ങി നിരവധി കാര്യങ്ങളാണ് എലിവേറ്റ് പദ്ധതി വഴി ലഭിക്കുക. വിശദവിവരത്തിന് വെബ്സൈറ്റ്: amazon.in/elevateforcreators.